Mulugu | ములుగు జిల్లాలో ఇసుక లారీ బీభత్సం

Published: 08 Oct 2026 • 06:08 PM

* ఇద్దరు సీఆర్‌పీఎఫ్ జవాన్లు మృతి

ఆకేరు న్యూస్, ములుగు: ములుగు జిల్లాలో ఘోర రోడ్డు ప్రమాదం చోటుచేసుకుంది. పస్రా–తాడ్వాయి మధ్య అటవీశాఖ చెక్‌పోస్ట్ సమీపంలో ఓ ఇసుక లారీ అదుపుతప్పి వరుసగా రెండు వాహనాలను ఢీకొట్టింది. ఈ ప్రమాదంలో ఇద్దరు సీఆర్‌పీఎఫ్ జవాన్లు మృతి చెందగా, పలువురు గాయపడ్డారు. క్షతగాత్రులను సమీపంలోని ఆసుపత్రికి తరలించి చికిత్స అందిస్తున్నారు. ప్రమాదం కారణంగా కొద్దిసేపు రహదారిపై వాహనాల రాకపోకలకు అంతరాయం ఏర్పడింది.

* డీసీఎంను ఢీకొట్టిన లారీ

స్థానికంగా అందిన సమాచారం ప్రకారం.. పస్రా నుంచి తాడ్వాయి వైపు ఇసుక లారీ వేగంగా వెళ్తున్న సమయంలో అటవీశాఖ చెక్‌పోస్ట్ సమీపంలో అదుపుతప్పింది. అదే సమయంలో సీఆర్‌పీఎఫ్ జవాన్లు ప్రయాణిస్తున్న డీసీఎం వాహనాన్ని లారీ బలంగా ఢీకొట్టింది. ఢీకొన్న అనంతరం లారీ అక్కడ ఆగకుండా ముందుకు వెళ్లింది. ఈ ప్రమాదంలో డీసీఎంలో ప్రయాణిస్తున్న ఇద్దరు సీఆర్‌పీఎఫ్ జవాన్లు తీవ్రంగా గాయపడి అక్కడికక్కడే మృతి చెందారు. ప్రమాద తీవ్రతకు డీసీఎం వాహనం దెబ్బతింది. ఘటనను గమనించిన స్థానికులు వెంటనే పోలీసులకు సమాచారం అందించారు.

* మరో కారును ఢీకొన్న లారీ

డీసీఎంను ఢీకొట్టిన అనంతరం కూడా లారీ ఆగకుండా ముందుకు వెళ్లి ఎదురుగా వస్తున్న మరో కారును ఢీకొట్టి కారులో రెవెన్యూ శాఖకు చెందిన ఇద్దరు ఉద్యోగులు లారీ ఢీకొనడంతో వారిద్దరూ తీవ్రంగా గాయపడ్డారు. వెంటనే స్థానికులు వారిని బయటకు తీసి చికిత్స నిమిత్తం ఆసుపత్రికి తరలించారు.

* ఓవర్‌స్పీడ్ కారణంగానేనా?

ప్రాథమికంగా లారీ అతివేగంగా నడపడం, డ్రైవర్ నిర్లక్ష్యం కారణంగానే ప్రమాదం జరిగినట్లు పోలీసులు అనుమానిస్తున్నారు. అయితే ప్రమాదానికి ఖచ్చితమైన కారణాలు పోలీసుల దర్యాప్తు పూర్తయిన తర్వాతే స్పష్టమయ్యే అవకాశం ఉంది. లారీ డ్రైవర్ ప్రమాదం అనంతరం అక్కడి నుంచి పరారైయ్యారు.

* డ్రైవర్ కోసం పోలీసుల గాలింపు

ఘటనపై పోలీసులు కేసు నమోదు చేసి దర్యాప్తు చేపట్టారు. ప్రమాదానికి కారణమైన లారీని గుర్తించి, పరారీలో ఉన్న డ్రైవర్‌ను పట్టుకునేందుకు గాలింపు చర్యలు చేపట్టారు. ప్రమాదం జరిగిన ప్రదేశాన్ని పరిశీలించిన పోలీసులు వివరాలను సేకరిస్తున్నారు. లారీ వేగం, ప్రమాదానికి ముందు డ్రైవర్ వాహనాన్ని ఎలా నడిపాడు, వరుసగా రెండు వాహనాలను ఢీకొట్టడానికి దారితీసిన పరిస్థితులపై పోలీసులు విచారణ చేస్తున్నారు.