TGNPDCL
TGNPDCL: ఆకేరు న్యూస్, హనుమకొండ: ప్రజా పోరాటాల స్ఫూర్తితో ప్రజలకు నాణ్యమైన సేవలు అందించడమే నేటి తరానికి ఉన్న బాధ్యత అని టీజీఎన్పీడీసీఎల్ సీఎండీ కర్నాటి వరుణ్రెడ్డి అన్నారు. ప్రజా పాలన దినోత్సవం సందర్భంగా గురువారం హనుమకొండ నక్కలగుట్టలోని విద్యుత్ భవన్ ప్రధాన కార్యాలయంలో వేడుకలు నిర్వహించారు.
ఈ సందర్భంగా సీఎండీ కర్నాటి వరుణ్రెడ్డి జాతీయ పతాకాన్ని ఆవిష్కరించి జాతీయ గీతాన్ని ఆలపించారు. అనంతరం అమరవీరుల స్థూపం వద్ద పూలమాలలు వేసి నివాళులర్పించారు.
ప్రజా పోరాటాల స్ఫూర్తి
ఉద్యోగులను ఉద్దేశించి సీఎండీ మాట్లాడుతూ.. నిజాం పాలనలో ఫ్యూడల్ వ్యవస్థలు, రజాకార్ల అరాచకాలతో తెలంగాణ ప్రజలు తీవ్ర ఇబ్బందులు ఎదుర్కొన్నారని తెలిపారు. హక్కులు, స్వేచ్ఛ కోసం ప్రజలు సంఘటితమై పోరాడారని పేర్కొన్నారు. భూమి, భుక్తి, వెట్టిచాకిరీ విముక్తి కోసం సాగిన ప్రజా పోరాటాలు తెలంగాణ చరిత్రలో కీలక ఘట్టాలుగా నిలిచాయని అన్నారు.
సెప్టెంబర్ 17 ప్రాధాన్యత
1947లో భారత్కు స్వాతంత్ర్యం వచ్చినప్పటికీ హైదరాబాద్ సంస్థానం వెంటనే భారత యూనియన్లో విలీనం కాలేదని వరుణ్రెడ్డి తెలిపారు. అనంతరం సర్దార్ వల్లభ్భాయ్ పటేల్ నేతృత్వంలో జరిగిన ఆపరేషన్ పోలో నేపథ్యంలో నిజాం పాలన ముగిసి, 1948 సెప్టెంబర్ 17న హైదరాబాద్ సంస్థానం భారతదేశంలో విలీనమైందని వివరించారు.
నాణ్యమైన విద్యుత్ అందించాలి
స్వేచ్ఛ, సమానత్వం కోసం పోరాడిన ప్రజల స్ఫూర్తిని ఉద్యోగులు తమ పని సంస్కృతిలో ప్రతిబింబించాలని సీఎండీ సూచించారు. ప్రజలకు నాణ్యమైన, అంతరాయం లేని విద్యుత్ను అందించడమే ప్రజా పోరాటాలకు నిజమైన నివాళి అని స్పష్టం చేశారు. టీజీఎన్పీడీసీఎల్ను మరింత ఉన్నత స్థాయికి తీసుకెళ్లేందుకు ఉద్యోగులు అంకితభావంతో పనిచేయాలని కోరారు. పారదర్శకంగా, ప్రజానుకూలంగా సేవలు అందించి సంస్థపై ప్రజల విశ్వాసాన్ని పెంచాలని పిలుపునిచ్చారు.
ఈ కార్యక్రమంలో డైరెక్టర్లు వి. తిరుపతిరెడ్డి, టి. మధుసూదన్, సి. ప్రభాకర్, సీవీవో బోనాల కిషన్, చీఫ్ ఇంజినీర్లు కె. తిరుమల్రావు, అశోక్, అన్నపూర్ణ, వెంకటరమణ, గౌతమ్రెడ్డి, మల్లికార్జున్, సీజీఎంలు చరణ్దాస్, కిషన్, కంపెనీ సెక్రటరీ కె. వెంకటేశం, జాయింట్ సెక్రటరీలు రమేష్, శ్రీకృష్ణతో పాటు జనరల్ మేనేజర్లు, ఇతర అధికారులు, ఉద్యోగులు పాల్గొన్నారు.
About the Author
Please tell us what is wrong. Your report will be sent to the website team.
