Nushrratt Bharuccha| నుష్రత్‌కు ఏమైంది?

Published: 03 Oct 2026 • 06:55 PM

Nushrratt Bharuccha| ఆకేరు న్యూస్, ముంబై: బాలీవుడ్ నటి నుష్రత్ భరూచా బాలి పర్యటనలో ప్రమాదానికి గురయ్యారు. ఈ ఘటనలో ఆమె వెన్నెముకకు ఫ్రాక్చర్ అయినట్లు ఆమె బృందం అధికారికంగా వెల్లడించింది. తొలుత బాలిలోని ఆస్పత్రిలో చికిత్స పొందిన ఆమెను తదుపరి వైద్య చికిత్స కోసం ముంబైకి తరలించారు.

బాలి నుంచి ముంబైకి..

పని, విహారయాత్రలో భాగంగా బాలి వెళ్లిన నుష్రత్ అక్కడ ప్రమాదానికి గురయ్యారు. వెన్నెముకకు గాయం కావడంతో వైద్యులు ఆమెను ఆస్పత్రిలో చేర్చి పర్యవేక్షణలో ఉంచారు. అయితే ప్రమాదం ఎలా జరిగిందన్న పూర్తి వివరాలను ఆమె బృందం వెల్లడించలేదు. ప్రస్తుతం ఆమె ఆరోగ్యం, చికిత్సకే ప్రాధాన్యం ఇస్తున్నట్లు తెలిపింది.

ఎయిర్ అంబులెన్స్‌లో తరలింపు

బాలిలో వైద్యుల పరిశీలన అనంతరం మెరుగైన చికిత్స కోసం నుష్రత్‌ను ముంబైకి తీసుకురావాలని నిర్ణయించారు. దీంతో ఆమెను ఎయిర్ అంబులెన్స్ ద్వారా ముంబైకి తరలించారు. ముంబై చేరుకున్న తర్వాత ఆమెను స్ట్రెచర్‌పై ఆస్పత్రికి తీసుకెళ్తున్న దృశ్యాలు కూడా బయటకు వచ్చాయి.

శస్త్రచికిత్సకు ఏర్పాట్లు

ముంబైలో నుష్రత్‌కు వెన్నెముకకు శస్త్రచికిత్స చేయనున్నట్లు ఆమె బృందం తెలిపింది. వైద్యుల తదుపరి మూల్యాంకనం ఆధారంగా చికిత్స కొనసాగనుంది. గాయం, శస్త్రచికిత్స కారణంగా ఆమెకు విశ్రాంతి అవసరం కావడంతో రాబోయే కొన్ని వారాల వృత్తిపరమైన కార్యక్రమాలపై ప్రభావం ఉండొచ్చని బృందం పేర్కొంది.

అభిమానుల్లో ఆందోళన

నుష్రత్ ప్రమాదానికి గురైన విషయం తెలియడంతో అభిమానుల్లో ఆందోళన నెలకొంది. ఆమె త్వరగా కోలుకోవాలని సోషల్ మీడియాలో అభిమానులు ఆకాంక్షిస్తున్నారు. ఇదే సమయంలో చికిత్స, రికవరీపై దృష్టి పెట్టేందుకు నుష్రత్ వ్యక్తిగత గోప్యతను గౌరవించాలని ఆమె బృందం కోరింది.