Penchikalpet| విద్యార్థుల ధర్నా

Published: 22 Sep 2026 • 05:45 PM

* రోడ్డు సమస్య పరిష్కరించాలని డిమాండ్

* ఎమ్మెల్యేకు వ్యతిరేకంగా నినాదాలు

Penchikalpet| ఆకేరు న్యూస్, కొమురం భీమ్ ఆసిఫాబాద్: రహదారి అధ్వానంగా మారడంతో పాఠశాలలకు వెళ్లేందుకు ఇబ్బందులు ఎదురవుతున్నాయని ఆరోపిస్తూ విద్యార్థులు ఆందోళన చేపట్టారు. కొమురం భీమ్ ఆసిఫాబాద్ జిల్లా పెంచికల్‌పేట మండలం లోడ్‌పల్లి వద్ద విద్యార్థులు రోడ్డుపై బైఠాయించి ధర్నా నిర్వహించారు.

లోడ్‌పల్లి పరిసరాల్లో రహదారి గుంతలమయంగా మారడంతో నిత్యం రాకపోకలకు ఇబ్బందులు ఎదురవుతున్నాయని విద్యార్థులు తెలిపారు. వర్షాలు కురిసిన సమయంలో గుంతల్లో నీరు చేరడంతో సమస్య మరింత తీవ్రంగా మారుతోందని పేర్కొన్నారు. దీంతో పాఠశాలలకు సమయానికి చేరుకోవడం కష్టంగా మారుతోందని ఆవేదన వ్యక్తం చేశారు.

* వెంటనే మరమ్మతులు చేపట్టాలి

రోడ్డుకు తక్షణమే మరమ్మతులు చేపట్టి మెరుగైన రవాణా సౌకర్యం కల్పించాలని విద్యార్థులు డిమాండ్ చేశారు. సమస్యను పలుమార్లు అధికారుల దృష్టికి తీసుకెళ్లినా పరిష్కారం కాలేదని తెలిపారు. రహదారికి శాశ్వత పరిష్కారం చూపాలని కోరారు.

* ఎమ్మెల్యేకు వ్యతిరేకంగా నినాదాలు

ధర్నా సందర్భంగా విద్యార్థులు బీజేపీ ఎమ్మెల్యే పాల్వాయి హరీశ్‌బాబుకు వ్యతిరేకంగా నినాదాలు చేశారు. తమ ప్రాంతంలోని రహదారి సమస్యను పరిష్కరించేందుకు చొరవ తీసుకోవాలని డిమాండ్ చేశారు. విద్యార్థుల ఆందోళనతో లోడ్‌పల్లి వద్ద కొంతసేపు ఉద్రిక్త పరిస్థితి నెలకొంది. అధికారులు స్పందించి రహదారి పరిస్థితిని పరిశీలించి తక్షణ చర్యలు చేపట్టాలని స్థానికులు కోరుతున్నారు.