ఆకేరు న్యూస్, హైదరాబాద్: దక్షిణ అయోధ్యగా విరాజిల్లుతున్న భద్రాచలం శ్రీ సీతారామచంద్రస్వామి వారి దేవస్థానంలో అత్యంత వైభవంగా జరిగే శ్రీరామ నవమి తిరుకళ్యాణ బ్రహ్మోత్సవాలకు ముహూర్తం ఖరారైంది. ఈ ఆధ్యాత్మిక వేడుకల్లో పాల్గొని, స్వామివారి కళ్యాణాన్ని వీక్షించాలని కోరుతూ తెలంగాణ ముఖ్యమంత్రి ఎ. రేవంత్ రెడ్డికి దేవాదాయ శాఖ అధికారులు, ఆలయ అర్చకులు అధికారికంగా ఆహ్వానం పలికారు.
బ్రహ్మోత్సవాల షెడ్యూల్ ఇదే..
ఈ ఏడాది శ్రీరామ నవమి ఉత్సవాలను మార్చి 19 నుంచి ఏప్రిల్ 2వ తేదీ వరకు అత్యంత ఘనంగా నిర్వహించనున్నారు. 15 రోజుల పాటు సాగే ఈ బ్రహ్మోత్సవాల్లో భాగంగా భద్రాద్రి క్షేత్రం భక్తజన సంద్రం కానుంది. లోక కళ్యాణం కోసం జరిగే శ్రీ సీతారామచంద్ర స్వామి వారి తిరుకళ్యాణ మహోత్సవం ఈ నెల 27న అత్యంత వైభవంగా జరగనుంది. కళ్యాణం మరుసటి రోజు అంటే మార్చి 28న శ్రీరామ పట్టాభిషేక మహోత్సవాన్ని నిర్వహించనున్నారు.
ముఖ్యమంత్రికి ఆహ్వాన పత్రం అందజేత…
ముఖ్యమంత్రి రేవంత్ రెడ్డిని కలిసిన దేవాదాయ శాఖ ప్రతినిధులు, ఆలయ ప్రధాన అర్చకులు వేద మంత్రోచ్ఛారణల మధ్య ఆయనకు ఆహ్వాన పత్రికను అందజేశారు. స్వామివారి శేషవస్త్రం, ప్రసాదాలను అందజేసి ఆశీర్వచనాలు పలికారు. రాష్ట్ర ప్రభుత్వం తరపున స్వామివారికి పట్టువస్త్రాలు, ముత్యాల తలంబ్రాలు సమర్పించాలని ఈ సందర్భంగా కోరారు.
ఈ కార్యక్రమంలో ఉప ముఖ్యమంత్రి శ్రీ మల్లు భట్టి విక్రమార్క, మంత్రులు శ్రీమతి కొండా సురేఖ, శ్రీ తుమ్మల నాగేశ్వర రావు, శ్రీ పొంగులేటి శ్రీనివాస రెడ్డి పాల్గొన్నారు. వీరితో పాటు రాజ్యసభ సభ్యుడు శ్రీ వేం నరేందర్ రెడ్డి, ఇతర ప్రజాప్రతినిధులు, దేవాదాయ శాఖ డైరెక్టర్ హనుమంతరావు, ఆలయ ఈవో దామోదర్ రావు తదితరులు ముఖ్యమంత్రి వెంట ఉన్నారు.
ఏర్పాట్లపై సమీక్ష:
వేసవి దృష్ట్యా భద్రాచలానికి వచ్చే భక్తులకు ఎటువంటి ఇబ్బందులు కలగకుండా తగిన ఏర్పాట్లు చేయాలని ప్రభుత్వం భావిస్తోంది. తాగునీరు, చలువ పందిళ్లు, క్యూ లైన్ల నిర్వహణపై ఇప్పటికే అధికారులకు ఆదేశాలు అందాయి. భద్రాద్రి రామయ్య కళ్యాణాన్ని కనులారా వీక్షించేందుకు తెలుగు రాష్ట్రాల నుంచే కాకుండా దేశవ్యాప్తంగా భక్తులు తరలివచ్చే అవకాశం ఉండటంతో భద్రతను కూడా కట్టుదిట్టం చేస్తున్నారు.
About the Author
