Supreme Court Diwali Guidelines| దీపావళి పటాకులపై సుప్రీంకోర్టు కీలక ఆదేశాలు

Published: 02 Nov 2026 • 05:50 PM

* రెండు రోజులే అనుమతి

* గ్రీన్ క్రాకర్స్‌కే ఓకే

Supreme Court Diwali Guidelines| ఆకేరు న్యూస్, డెస్క్: దీపావళి పండుగ వేళ బాణసంచా కాల్చుకునే విషయంలో సుప్రీంకోర్టు కీలక ఆదేశాలు జారీ చేసింది. ఢిల్లీలో పెరుగుతున్న వాయు కాలుష్యాన్ని దృష్టిలో ఉంచుకుని, ఈ ఏడాది దీపావళి సందర్భంగా కేవలం గ్రీన్ క్రాకర్స్ వినియోగానికే అనుమతి ఇచ్చింది. నవంబర్ 7, 8 తేదీల్లో నిర్ణీత సమయాల్లో మాత్రమే వీటిని కాల్చుకోవాలని స్పష్టం చేసింది. నవంబర్ 9 నుంచి పటాకుల వినియోగంపై పూర్తిస్థాయి నిషేధం అమల్లో ఉంటుందని పేర్కొంది. సుప్రీంకోర్టులో జస్టిస్ ఎం.ఎం. సుంద్రేశ్, జస్టిస్ ప్రసన్న బి. వరాలేలతో కూడిన ధర్మాసనం ఈ ఆదేశాలు ఇచ్చింది. కోర్టు సూచనల ప్రకారం నవంబర్ 7, 8 తేదీల్లో ఉదయం 6 నుంచి 7 గంటల వరకు, రాత్రి 8 నుంచి 10 గంటల వరకు మాత్రమే గ్రీన్ క్రాకర్స్ కాల్చుకోవడానికి అవకాశం ఉంటుంది. ఈ సమయాలను తప్పనిసరిగా పాటించాలని స్పష్టం చేసింది.

బేరియం ఉన్న పటాకులకు అనుమతి లేదు

గ్రీన్ క్రాకర్స్ పేరుతో విక్రయించే అన్ని రకాల పటాకులకూ అనుమతి లేదని సుప్రీంకోర్టు స్పష్టం చేసింది. బేరియం కలిగిన బాణసంచాను వినియోగించరాదని తెలిపింది. అలాగే CSIR-NEERI సంస్థ ఆమోదించని పటాకులను కూడా గ్రీన్ క్రాకర్స్‌గా పరిగణించబోమని పేర్కొంది. అనుమతి లేని బాణసంచా విక్రయాలు, వినియోగంపై నిషేధం కొనసాగుతుందని స్పష్టం చేసింది. పటాకుల శబ్దం, పొగ కారణంగా రోగులు, వృద్ధులు ఇబ్బందులు పడకుండా ఉండేందుకు ప్రత్యేక ఆంక్షలు విధించింది. ఆసుపత్రులు, నర్సింగ్‌ హోమ్‌లు, ప్రాథమిక ఆరోగ్య కేంద్రాలు, జిల్లా ఆరోగ్య కేంద్రాలు, వృద్ధాశ్రమాలు, సైలెన్స్‌ జోన్లకు 300 మీటర్ల పరిధిలో బాణసంచా కాల్చకూడదని ఆదేశించింది. ఈ నిబంధనలను ఉల్లంఘించిన వారిపై చట్టప్రకారం చర్యలు తీసుకోవాలని పోలీసులకు సూచించింది.

కాలుష్య నియంత్రణే ప్రధాన లక్ష్యం

ఢిల్లీ పరిసర ప్రాంతాల్లో వాయు కాలుష్యం తీవ్ర సమస్యగా మారుతున్న నేపథ్యంలో పటాకుల వినియోగంపై ఈ నిర్ణయం తీసుకున్నట్లు తెలుస్తోంది. దీపావళి వేడుకలు జరుపుకునే సమయంలో ప్రజల ఆరోగ్యానికి, పర్యావరణానికి హాని కలగకుండా పరిమితులు విధించింది. గ్రీన్ క్రాకర్స్ వినియోగం కూడా కోర్టు నిర్దేశించిన తేదీలు, సమయాలు, నిబంధనలకు లోబడి ఉండాలని స్పష్టం చేసింది. ఢిల్లీ కాలుష్యానికి సంబంధించిన అంశంతో పాటు పటాకుల నిషేధంపై దాఖలైన పిటిషన్ల విచారణ సందర్భంగా సుప్రీంకోర్టు ఈ ఆదేశాలు జారీ చేసింది. పండుగ వేళ ప్రజలు నిబంధనలు పాటించాలని, నిషేధిత పటాకులకు దూరంగా ఉండాలని సూచించింది.