BRS Assembly Protest | అసెంబ్లీ వద్ద ఉద్రిక్తత

Published: 07 Sep 2026 • 10:32 AM Updated: 07 Sep 2026 • 10:34 AM

* టీషర్ట్ విప్పి హరీష్ రావు ధర్నా..

* అసెంబ్లీ ముట్టడికి BRS యత్నం..

* పోలీసులతో తోపులాట

ఆకేరు న్యూస్, హైదరాబాద్ : తెలంగాణ అసెంబ్లీ సమావేశాల ప్రారంభం సందర్భంగా అసెంబ్లీ ప్రవేశ ద్వారం (Main Gate) వద్ద తీవ్ర ఉద్రిక్త వాతావరణం నెలకొంది. రాష్ట్ర ప్రభుత్వ తీరుకు నిరసనగా, కాంగ్రెస్ ఇచ్చిన హామీల అమలు మరియు ప్రజా సమస్యలపై నిలదీసేందుకు Bharat Rashtra Samithi (BRS) ఎమ్మెల్యేలు, ఎమ్మెల్సీలు నల్ల టీషర్టులు (Black T-Shirts) ధరించి అసెంబ్లీకి చేరుకున్నారు.

* పోలీసుల అడ్డంకులు – వాగ్వాదం…

నల్ల టీషర్టులతో లోపలికి వెళ్లేందుకు యత్నించిన BRS ప్రజాప్రతినిధులను అసెంబ్లీ గేటు వద్ద పోలీసులు తీవ్రంగా అడ్డుకున్నారు. నిరసన దుస్తులతో లోపలికి అనుమతించబోమని పోలీసులు తెగేసి చెప్పడంతో నేతలకు, పోలీసులకు మధ్య తీవ్ర వాగ్వాదం చోటుచేసుకుంది. ఈ క్రమంలో అసెంబ్లీ ప్రవేశ ద్వారం వద్ద BRS నేతలు బైఠాయించి ప్రభుత్వం, పోలీసుల వైఖరికి వ్యతిరేకంగా పెద్ద ఎత్తున నినాదాలు చేశారు.

* టీషర్ట్లు విప్పి హరీష్ రావు నిరసన…

పోలీసుల అభ్యంతరంతో మాజీ మంత్రి హరీష్ రావుతో పాటు ఎమ్మెల్యేలు కేపీ వివేక్, సుధీర్ రెడ్డిలు తమ నల్ల టీషర్టులను విప్పివేసి బనియన్లతోనే అసెంబ్లీ లోపలికి వెళ్లేందుకు ప్రయత్నించారు. ఈ సమయంలో పోలీసులు వారిని లోపలికి వెళ్లకుండా గట్టిగా నిరోధించడంతో తీవ్ర తోపులాట జరిగింది.

* కంటతడి పెట్టిన సునీతా లక్ష్మారెడ్డి..

పోలీసుల తోపులాటలో పలువురు మహిళా ఎమ్మెల్యేలు కిందపడిపోయారు. పోలీసులు తమ పట్ల అమానుషంగా ప్రవర్తించారని, మహిళా ప్రజాప్రతినిధులమని కూడా చూడకుండా తీవ్రంగా అవమానించారని ఆవేదన వ్యక్తం చేస్తూ BRS మహిళా ఎమ్మెల్యే సునీతా లక్ష్మారెడ్డి అసెంబ్లీ గేటు వద్దే కన్నీళ్లు పెట్టుకున్నారు. ఈ గందరగోళం మరియు తోపులాటల క్రమంలో ఎమ్మెల్యే జగదీష్ రెడ్డి కాలికి తీవ్ర గాయమైంది.

* KTR, హరీష్ రావు అరెస్ట్…

ప్రభుత్వం ఉద్దేశపూర్వకంగానే ప్రతిపక్షాల గొంతు నొక్కేందుకు యత్నిస్తోందని, ప్రజాస్వామ్యాన్ని ఖూనీ చేస్తోందని BRS వర్కింగ్ ప్రెసిడెంట్ KTR ఆగ్రహం వ్యక్తం చేశారు. శాంతియుతంగా నిరసన తెలుపుతున్న తమపై పోలీసులు ఉక్కుపాదం మోపడం దారుణమన్నారు. పరిస్థితి చెయ్యి దాటిపోతుండటంతో పోలీసులు కేటీఆర్, హరీష్ రావుతో పాటు పలువురు BRS ఎమ్మెల్యేలు, ఎమ్మెల్సీలను అదుపులోకి తీసుకుని పోలీస్ స్టేషన్‌కు తరలించారు. ఈ ఘటనతో అసెంబ్లీ ప్రాంగణంలో కాసేపు తీవ్ర గందరగోళం, ఉద్రిక్తత నెలకొంది.