TGSRTC| ఆర్టీసీ దసరా ప్లాన్

Published: 07 Oct 2026 • 09:04 PM

* 7 వేల ప్రత్యేక బస్సులు

* కీలక తేదీలు ఇవే

ఆకేరు న్యూస్ , హైదరాబాద్ : తెలంగాణ రాష్ట్ర రోడ్డు రవాణా సంస్థ (టీజీఎస్‌ఆర్టీసీ) దసరా పండుగ రద్దీని దృష్టిలో పెట్టుకుని భారీ ఏర్పాట్లు చేస్తోంది. పండుగ సందర్భంగా సొంతూళ్లకు వెళ్లే ప్రయాణికుల కోసం రాష్ట్రవ్యాప్తంగా 7 వేల ప్రత్యేక బస్సులను నడిపేందుకు సంస్థ సిద్ధమైంది. ముఖ్యంగా హైదరాబాద్ నుంచి ఉమ్మడి జిల్లాలు, ఇతర ప్రాంతాలకు వెళ్లే ప్రయాణికుల రద్దీని దృష్టిలో పెట్టుకుని కరీంనగర్, హైదరాబాద్, గ్రేటర్ హైదరాబాద్ జోన్ల పరిధిలో అదనపు సర్వీసులను అందుబాటులోకి తీసుకురానున్నారు.

7 వేల ప్రత్యేక బస్సులు

దసరా పండుగ సందర్భంగా సాధారణ బస్సులతో పాటు ప్రత్యేక బస్సులను పెద్ద సంఖ్యలో నడపాలని టీజీఎస్‌ఆర్టీసీ నిర్ణయించింది. పండుగకు ముందు నగరం నుంచి సొంతూళ్లకు వెళ్లే ప్రయాణికుల సంఖ్య భారీగా పెరిగే అవకాశం ఉండటంతో రద్దీకి అనుగుణంగా బస్సులను అందుబాటులో ఉంచనున్నారు. కరీంనగర్, హైదరాబాద్, గ్రేటర్ హైదరాబాద్ జోన్ల నుంచి ప్రత్యేక బస్సులను వివిధ ప్రాంతాలకు నడపనున్నారు. ప్రయాణికులు చివరి నిమిషంలో ఇబ్బందులు పడకుండా ముందుగానే రవాణా సౌకర్యాలను సిద్ధం చేస్తున్నట్లు ఆర్టీసీ అధికారులు తెలిపారు.

ఆ తేదీల్లో భారీ రద్దీ

దసరా సెలవులు, పండుగను పురస్కరించుకుని ఈ నెల 9, 10, 16, 17 తేదీల్లో ప్రయాణికుల రద్దీ ఎక్కువగా ఉండే అవకాశం ఉందని టీజీఎస్‌ఆర్టీసీ అంచనా వేస్తోంది. ఈ తేదీల్లో హైదరాబాద్ నుంచి జిల్లాలకు వెళ్లే ప్రయాణికుల కోసం అదనపు ప్రత్యేక బస్సులను నడపనున్నారు. అలాగే పండుగ అనంతరం నగరానికి తిరిగి వచ్చే ప్రయాణికుల రద్దీని దృష్టిలో పెట్టుకుని 25, 26 తేదీల్లోనూ అదనపు బస్సులను అందుబాటులో ఉంచనున్నారు. ప్రయాణికుల అవసరాన్ని బట్టి మరిన్ని బస్సులను కూడా అందుబాటులోకి తీసుకురావడానికి అధికారులు ఏర్పాట్లు చేస్తున్నారు.

ప్రత్యేక సర్వీసులు

హైదరాబాద్ నగరంలో ప్రయాణికుల రద్దీని నియంత్రించేందుకు ప్రధాన బస్ స్టేషన్లు, రద్దీ ప్రాంతాల నుంచి ప్రత్యేక బస్సులను నడపనున్నారు. ఎంజీబీఎస్, జేబీఎస్, ఉప్పల్, ఆరాంఘర్, ఎల్బీనగర్, కేపీహెచ్‌బీ, బోయినపల్లి, గచ్చిబౌలి ప్రాంతాల నుంచి ప్రత్యేక సర్వీసులు అందుబాటులో ఉండనున్నాయి. ప్రయాణికులకు ఎలాంటి ఇబ్బందులు తలెత్తకుండా ఆయా ప్రాంతాల్లో తాత్కాలిక వసతులు కల్పించనున్నారు. ప్రత్యేక బస్సులు బయలుదేరే ప్రాంతాల్లో షామియానాలు, తాగునీరు, మొబైల్ టాయిలెట్లు ఏర్పాటు చేయనున్నారు. రద్దీ సమయంలో ప్రయాణికులకు అవసరమైన సమాచారం అందించేందుకు సిబ్బందిని కూడా అందుబాటులో ఉంచనున్నారు.

చార్జీలు పెంపు

దసరా ప్రత్యేక బస్సుల్లో టికెట్ చార్జీలకు సంబంధించి కూడా టీజీఎస్‌ఆర్టీసీ స్పష్టత ఇచ్చింది. రాష్ట్ర ప్రభుత్వం జారీ చేసిన జీవో ప్రకారం ప్రత్యేక బస్సుల్లో సాధారణ చార్జీల కంటే గరిష్ఠంగా 1.5 రెట్లు వరకు టికెట్ చార్జీలు సవరించనున్నారు. అయితే ఈ పెరిగిన చార్జీలు అన్ని రోజుల్లో వర్తించవని ఆర్టీసీ స్పష్టం చేసింది. 9, 10, 16, 17, 25, 26 తేదీల్లో మాత్రమే ప్రత్యేక బస్సులకు సవరించిన చార్జీలు అమలు చేయనున్నారు. సాధారణంగా నడిచే రెగ్యులర్ బస్సుల్లో మాత్రం ఎలాంటి అదనపు చార్జీలు ఉండవని సంస్థ తెలిపింది. దీంతో ప్రత్యేక బస్సుల్లో ప్రయాణించాలనుకునే వారు టికెట్ బుక్ చేసుకునే ముందు చార్జీల వివరాలను పరిశీలించాలని ఆర్టీసీ సూచిస్తోంది.

ఉచిత ప్రయాణం

దసరా పండుగ రద్దీ సమయంలోనూ మహాలక్ష్మి పథకం కింద మహిళలకు ఉచిత ప్రయాణ సదుపాయం యథావిధిగా కొనసాగనుంది. రెగ్యులర్ బస్సులతో పాటు ప్రత్యేక బస్సుల్లోనూ ఈ పథకం వర్తిస్తుందని టీజీఎస్‌ఆర్టీసీ స్పష్టం చేసింది.దీంతో పండుగ సందర్భంగా సొంతూళ్లకు వెళ్లే మహిళా ప్రయాణికులకు ప్రత్యేక బస్సుల్లోనూ ఉచిత ప్రయాణ సౌకర్యం అందుబాటులో ఉండనుంది.

ముందస్తు రిజర్వేషన్‌కు అవకాశం

దసరా సమయంలో రద్దీ ఎక్కువగా ఉండే అవకాశం ఉన్నందున ప్రయాణికులు చివరి నిమిషం వరకు వేచి ఉండకుండా ముందుగానే టికెట్లు రిజర్వ్ చేసుకోవాలని టీజీఎస్‌ఆర్టీసీ సూచించింది. tgsrtcbus.in ద్వారా ఆన్‌లైన్‌లో ముందస్తు రిజర్వేషన్ చేసుకోవచ్చని తెలిపింది.