KALVAKUNTLA KAVITHA | తెలంగాణ ప్రజలకు కవిత పిలుపు...

* రాజ్యాధికారం సాధిద్దాం

ఆకేరు న్యూస్, హైదరాబాద్: తెలంగాణ రాష్ట్ర రాజకీయాల్లో శనివారం ఒక అనూహ్యమైన, చారిత్రాత్మక మలుపు చోటుచేసుకుంది. తెలంగాణ జాగృతి అధ్యక్షురాలు, ఉద్యమ నేత కల్వకుంట్ల కవిత ‘తెలంగాణ రాష్ట్ర సేన’ అనే నూతన రాజకీయ పార్టీని అధికారికంగా ప్రకటించారు. ఈ సందర్భంగా ఏర్పాటు చేసిన భారీ బహిరంగ సభలో ఆమె ప్రసంగిస్తూ.. అటు అధికార కాంగ్రెస్ పార్టీపై, ఇటు ప్రతిపక్ష టీఆర్ఎస్ మరియు బీజేపీలపై యుద్ధం ప్రకటించారు. ముఖ్యంగా తన తండ్రి కేసీఆర్ తీరుపై ఆమె చేసిన వ్యాఖ్యలు రాష్ట్ర రాజకీయాల్లో ప్రకంపనలు సృష్టిస్తున్నాయి.

* తెలంగాణ ఆత్మను కోల్పోయిన కేసీఆర్
సభలో కవిత మాట్లాడుతూ తన తండ్రి కేసీఆర్ పై అత్యంత భావోద్వేగపూరిత, విమర్శనాత్మక వ్యాఖ్యలు చేశారు. “నాటి ఉద్యమ రథసారథి కేసీఆర్ వేరు, నేటి కేసీఆర్ వేరు. అధికార మమకారంలో ఆయన తెలంగాణ ఆత్మను కోల్పోయారు. సామాజిక తెలంగాణ రథచక్రాలు విరిగి ముక్కలయ్యాయి. ఒక కన్నతండ్రిగా ఆయనపై నాకు గౌరవం ఉన్నప్పటికీ, ఒక రాజకీయ నాయకుడిగా ఆయన దారి తప్పారు. అవినీతి చేసిన పందికొక్కులను పక్కన కూర్చోబెట్టుకుని, ఉద్యమకారులను దూరం చేసుకున్నారు. ఆయన ఇప్పుడు కేవలం ఒక మరబొమ్మలా మారారు. అందుకే తెలంగాణ ప్రజల కోసం, సామాజిక న్యాయం కోసం నేను యుద్ధం ప్రకటించక తప్పడం లేదు” అని కవిత స్పష్టం చేశారు.

* కాంగ్రెస్, బీజేపీలపై విమర్శల వర్షం
ప్రస్తుత రేవంత్ రెడ్డి ప్రభుత్వాన్ని ‘హిట్లర్ పాలన’తో పోల్చిన కవిత.. రాష్ట్రంలో నిరంకుశత్వం రాజ్యమేలుతోందని విమర్శించారు. నిరుపేదల ఇళ్లను అర్ధరాత్రి పూట కూల్చివేయడం, దళిత యువకుల కస్టడీ మరణాలు, గురుకులాల్లో విద్యార్థుల మృత్యుఘోషపై ప్రభుత్వం మౌనంగా ఉండటం దారుణమని మండిపడ్డారు. మరోవైపు, బీజేపీ ఎంపీలు తెలంగాణకు అన్యాయం జరుగుతుంటే నోరు మెదపకుండా ఢిల్లీకి బానిసలుగా మారారని ఎద్దేవా చేశారు. భద్రాచలం పరిసర గ్రామాలు ఆంధ్రాలో కలిసినా పట్టించుకోని బీజేపీ నేతలకు తెలంగాణ బిడ్డలమని చెప్పుకునే అర్హత లేదని సవాల్ విసిరారు.

* సామాజిక న్యాయమే లక్ష్యం – ‘పాంచజన్యం’ ప్రపోజల్
తెలంగాణ రాష్ట్ర సేన కేవలం ఎన్నికల కోసం పుట్టిన పార్టీ కాదని, దీనికి ఒక ఆత్మ, ఒక లక్ష్యం ఉందని ఆమె పేర్కొన్నారు. కాన్షీరాం స్పూర్తితో “ప్రశ్నించడమే కాదు.. పరిష్కారం చూపాలి” అనే నినాదంతో ‘పాంచజన్యం’ పేరుతో ఐదు ప్రధాన అంశాలను ప్రజల ముందుకు తెచ్చారు…
విద్య: ప్రతి ఊరిలో ఒక బడి, ప్రతి తరగతికి ఒక టీచర్. ప్రభుత్వ పాఠశాలలను గుడి అంత పవిత్రంగా తీర్చిదిద్దడం.
వైద్యం: సామాన్యులకు ఉచిత మరియు నాణ్యమైన కార్పొరేట్ వైద్యం అందించడం.
నీళ్లు & నిధులు: ప్రాజెక్టుల పేరుతో జరిగిన లక్షల కోట్ల అవినీతిని అంతం చేసి, సాగునీటిని రైతులకు చేరవేయడం.
సామాజిక న్యాయం: అట్టడుగు వర్గాలకు, మహిళలకు రాజకీయ ప్రాధాన్యత కల్పించడం.
నిరుద్యోగ భృతి & నియామకాలు: నిరుద్యోగ యువతకు భరోసా ఇస్తూ ఖాళీలను పారదర్శకంగా భర్తీ చేయడం.

* తెలంగాణ బిడ్డలకు ‘అమ్మ’గా ఉంటాను
“నేను ఈ రాష్ట్రంలోని మూడున్నర కోట్ల ప్రజలకు ఒక తల్లిలా సేవ చేయాలనుకుంటున్నాను. బిడ్డలకు కష్టం వస్తే అమ్మ హృదయం ఎలా బద్దలవుతుందో, నా పరిపాలన కూడా ప్రజల కష్టాలపై అలాగే స్పందిస్తుంది” అని కవిత భావోద్వేగానికి లోనయ్యారు. గత 11 నెలలుగా తెలంగాణ జాగృతి చేసిన పోరాటాలను ఇకపై రాజకీయ శక్తితో ముందుకు తీసుకెళ్తామని, రాబోయే రెండేళ్లలో తెలంగాణ రాష్ట్ర సేన ప్రధాన ప్రతిపక్షంగా ఎదిగి, తదుపరి అధికారంలోకి రావడం ఖాయమని ఆమె ధీమా వ్యక్తం చేశారు.