CM SIDDARAMAIAH | మంత్రుల భేటీలో ఎమోషనల్ సీన్

Published: 28 May 2026 • 06:27 AM

ఆకేరు న్యూస్, డెస్క్: కన్నడనాట అధికార కాంగ్రెస్ పార్టీలో గత కొద్దిరోజులుగా సాగుతున్న అంతర్గత చర్చలు చివరి అంకానికి చేరుకున్నట్లు కనిపిస్తోంది. కర్ణాటక ముఖ్యమంత్రి సిద్ధరామయ్య తన పదవికి రాజీనామా చేసేందుకు సిద్ధపడ్డారనే వార్తలు రాజకీయ వర్గాల్లో ప్రకంపనలు సృష్టిస్తున్నాయి. గురువారం ఉదయం ముఖ్యమంత్రి అధికారిక నివాసమైన ‘కావేరి’లో క్యాబినెట్ సహచరులతో జరిగిన ప్రత్యేక అల్పాహార సమావేశం దీనికి వేదికైంది.

* మంత్రుల భేటీలో ఎమోషనల్ సీన్..

ఈ ఉదయం జరిగిన క్యాబినెట్ సహచరుల భేటీలో సిద్ధరామయ్య తన భవిష్యత్ కార్యాచరణపై మంత్రులకు ఒక స్పష్టత ఇచ్చినట్లు సమాచారం. కాంగ్రెస్ హైకమాండ్ పెద్దల సూచనల మేరకు తాను పదవి నుంచి తప్పుకోవాలని నిర్ణయించుకున్నట్లు ఆయన మంత్రులతో పంచుకున్నారు. ఈ క్రమంలోనే డిప్యూటీ సీఎం డీకే శివకుమార్, ముఖ్యమంత్రిని ఆత్మీయంగా అక్కున చేర్చుకున్నారు. అంతేకాకుండా సిద్ధరామయ్య పాదాలను తాకి ఆయన ఆశీస్సులు అందుకున్నారు. దీనికి సంబంధించిన దృశ్యాలు ప్రస్తుతం నెట్టింట హల్‌చల్ చేస్తున్నాయి.

* రాజీనామా ముహూర్తం గవర్నర్ పర్యటనతో మార్పు..

ముందుగా అనుకున్న షెడ్యూల్ ప్రకారం సిద్ధరామయ్య గురువారం మధ్యాహ్నం 3 గంటల ప్రాంతంలో రాజ్ భవన్‌కు వెళ్లి తన రాజీనామా లేఖను సమర్పించాల్సి ఉంది. అయితే కర్ణాటక గవర్నర్ థావర్ చంద్ గెహ్లాట్ ప్రస్తుతం బెంగళూరులో అందుబాటులో లేరు. ఆయన వ్యక్తిగత పర్యటన నిమిత్తం మధ్యప్రదేశ్‌లోని ఇండోర్‌కు వెళ్లడంతో, సిద్ధరామయ్య తన లేఖను గవర్నర్ కార్యాలయానికి పంపే అవకాశం ఉన్నట్లు తెలుస్తోంది.
దిల్లీ పెద్దల మంతనాలు
ఈ అధికార బదిలీ ప్రక్రియలో ఎలాంటి వివాదాలు తలెత్తకుండా చూసేందుకు అఖిల భారత కాంగ్రెస్ కమిటీ (AICC) ప్రతినిధులు రంగంలోకి దిగారు. కర్ణాటక కాంగ్రెస్ వ్యవహారాల ఇన్‌ఛార్జ్ రణదీప్ సింగ్ సూర్జేవాలా ఇప్పటికే బెంగళూరు చేరుకుని సీనియర్ నేతలతో సంప్రదింపులు జరుపుతున్నారు. హైకమాండ్ సిద్ధరామయ్యకు జాతీయ స్థాయిలో తగిన ప్రాధాన్యత ఇస్తామని, రాజ్యసభ స్థానాన్ని కేటాయిస్తామని ప్రతిపాదించినట్లు సమాచారం.

* తదుపరి సీఎం…

రేపు (శుక్రవారం) కాంగ్రెస్ శాసనసభా పక్ష (CLP) అత్యవసర సమావేశం జరగనుంది. ఈ సమావేశంలో కొత్త నాయకుడి ఎన్నికపై అధికారిక ప్రకటన వెలువడనుంది. ప్రస్తుతం రేసులో డిప్యూటీ సీఎం డీకే శివకుమార్ పేరు ముందంజలో ఉంది. అంతా సవ్యంగా సాగితే ఈ వారాంతంలోనే (శని లేదా ఆదివారం) కొత్త ముఖ్యమంత్రి ప్రమాణ స్వీకార కార్యక్రమం ఉండే అవకాశం ఉందని పార్టీ వర్గాలు అంచనా వేస్తున్నాయి. ఈ లోపే డీకే శివకుమార్ నివాసం వద్ద ఆయన మద్దతుదారులు అప్పుడే సంబరాలు, మిఠాయిల పంపిణీ మొదలుపెట్టారు.

* ఇన్‌సైడర్ టాక్ ..

ముఖ్యమంత్రి పదవిని వదులుకుంటున్న సిద్ధరామయ్య, తన వర్గానికి చెందిన ఎమ్మెల్యేలకు మంత్రివర్గంలో కీలక శాఖలు కేటాయించాలని, అలాగే రాష్ట్ర కాంగ్రెస్ అధ్యక్ష పదవిని (KPCC) కూడా తన అనుచరులకే ఇవ్వాలని అధిష్ఠానం వద్ద పట్టుబడుతున్నట్లు తెలుస్తోంది. రేపటి సీఎల్‌పీ సమావేశం ముగిస్తేనే కర్ణాటక నూతన ముఖ్యమంత్రి ఎవరనే దానిపై పూర్తి స్పష్టత రానుంది.