COLLECTOR CHAHAT BAJPAI | ముందస్తు నిర్ధారణే ప్రాణరక్ష

* ఆరోగ్య శిబిరాలను వాడుకుందాం రండి

ఆకేరు న్యూస్, హన్మకొండ: సమాజంలో ఆరోగ్య పరిరక్షణే ధ్యేయంగా, ముఖ్యంగా హైరిస్క్ ఉన్న వర్గాల కోసం వైద్య ఆరోగ్యశాఖ నిర్వహిస్తున్న ఉచిత క్షయవ్యాధి (టీబీ), అసంక్రమిత వ్యాధుల (ఎన్‌సీడీ) స్క్రీనింగ్ శిబిరాలను ప్రజలందరూ సద్వినియోగం చేసుకోవాలని హనుమకొండ జిల్లా కలెక్టర్ చాహత్ బాజ్ పాయ్ పిలుపునిచ్చారు. ముందస్తు వ్యాధి నిర్ధారణ ద్వారా ఎలాంటి ప్రాణాంతక వ్యాధుల నుంచైనా ప్రాణాలను కాపాడుకోవచ్చని ఆమె స్పష్టం చేశారు.

శనివారం హసన్‌పర్తి ప్రాథమిక ఆరోగ్య కేంద్రం పరిధిలోని భీమారం పాత గ్రామపంచాయతీ కార్యాలయ ప్రాంగణంలో ‘టీబీ ముక్త్ భారత్ అభియాన్’ కార్యక్రమంలో భాగంగా ప్రత్యేక వైద్య శిబిరాన్ని ఏర్పాటు చేశారు. ఈ శిబిరాన్ని జిల్లా కలెక్టర్ చాహత్ బాజ్ పాయ్ స్వయంగా సందర్శించి, అక్కడ జరుగుతున్న పరీక్షల తీరును, వైద్య సేవలను క్షుణ్ణంగా పరిశీలించారు. శిబిరానికి వచ్చిన ప్రజలతో ముఖాముఖి మాట్లాడి, వారికి అందుతున్న వైద్య సేవలపై ఆరా తీశారు. అనంతరం టీబీ చికిత్స పొందుతున్న లబ్ధిదారులకు ప్రభుత్వ నిబంధనల ప్రకారం ఉచిత పోషకాహార కిట్లను పంపిణీ చేశారు.

* అందుబాటులో అత్యాధునిక పరీక్షలు…

ఇన్‌చార్జి డీఎంహెచ్‌వో ఈ సందర్భంగా ఇన్‌చార్జి జిల్లా వైద్య ఆరోగ్యశాఖ అధికారి (డీఎంహెచ్‌వో) డాక్టర్ మదన్ మోహన్ రావు శిబిరం ద్వారా అందిస్తున్న సేవలపై కలెక్టర్‌కు సమగ్ర వివరణ ఇచ్చారు.

* అసంక్రమిత వ్యాధుల (NCD) స్క్రీనింగ్…

30 సంవత్సరాలు పైబడిన ప్రతి ఒక్కరికీ ఉచితంగా రక్తపోటు (బీపీ), మధుమేహం (షుగర్) పరీక్షలతో పాటు ప్రాథమిక దశలోనే నోటి, రొమ్ము, గర్భాశయ ముఖద్వార క్యాన్సర్‌లను గుర్తించే స్క్రీనింగ్ పరీక్షలు నిర్వహిస్తున్నట్లు తెలిపారు.

మొబైల్ డిజిటల్ ఎక్స్‌రే సేవలు… 60 ఏళ్లు పైబడిన వృద్ధులు, మధుమేహ రోగులు, గతంలో టీబీ బారిన పడి కోలుకున్న వారు, పోషకాహార లోపంతో బాధపడుతున్న వారు, ధూమపాన వ్యసనపరులతో పాటు.. రెండు వారాలకు పైబడి దగ్గు, జ్వరం ఉన్న వారికి అత్యాధునిక మొబైల్ డిజిటల్ ఎక్స్‌రే వాహనం ద్వారా అక్కడికక్కడే ఉచితంగా ఊపిరితిత్తుల పరీక్షలు నిర్వహిస్తున్నట్లు వివరించారు.

* ప్రభుత్వం నుంచి ఉచిత చికిత్స, ఆర్థిక సాయం…

కలెక్టర్ శిబిరంలో డిజిటల్ రికార్డుల నమోదు ప్రక్రియ (నిక్షయ్ పోర్టల్, ఎన్‌సీడీ ఆన్‌లైన్ పోర్టల్)ను పరిశీలించిన అనంతరం కలెక్టర్ చాహత్ బాజ్ పాయ్ మీడియాతో మాట్లాడారు.

భారతదేశాన్ని క్షయవ్యాధి రహిత దేశంగా మార్చడమే ‘టీబీ ముక్త్ భారత్ అభియాన్’ ముఖ్య ఉద్దేశమని చెప్పారు.
టీబీ వ్యాధిపై సమాజంలో ఉన్న అపోహలను వీడాలని, వ్యాధి నిర్ధారణ అయిన వారికి ప్రభుత్వం అత్యంత ఖరీదైన, ఆధునిక చికిత్సను పూర్తిగా ఉచితంగా అందిస్తోందని భరోసా ఇచ్చారు.

* నిక్షయ్ పోషణ్ యోజన…

టీబీ రోగులకు చికిత్స కాలంలో నాణ్యమైన పోషకాహారం అందించేందుకు ప్రభుత్వం ‘నిక్షయ్ పోషణ్ యోజన’ పథకం కింద ప్రతి నెలా రూ.1,000 చొప్పున నేరుగా రోగి బ్యాంకు ఖాతాలోనే (డీబీటీ) జమ చేస్తోందని కలెక్టర్ వెల్లడించారు.

రెండు వారాలకు పైగా తగ్గని దగ్గు, సాయంత్రం వేళల్లో జ్వరం రావడం, ఆకలి లేకపోవడం, బరువు తగ్గడం వంటి లక్షణాలు ఉంటే ఏమాత్రం నిర్లక్ష్యం చేయకుండా వెంటనే సమీప ప్రభుత్వ ఆరోగ్య కేంద్రాన్ని సంప్రదించాలని సూచించారు. ఆరోగ్యకరమైన సమాజ నిర్మాణంలో ప్రజల భాగస్వామ్యం అత్యంత కీలకమని, ప్రతి ఒక్కరూ బాధ్యతగా ఈ ఉచిత వైద్య శిబిరాలను ఉపయోగించుకోవాలని కోరారు.

* హాజరైన ప్రముఖులు…

ఈ విస్తృత వైద్య శిబిరంలో ట్రైనీ స్పెషల్ డిప్యూటీ కలెక్టర్ రోహిత్, ఇన్‌చార్జి డీఎంహెచ్‌వో డాక్టర్ మదన్ మోహన్ రావు, డిప్యూటీ డీఎంహెచ్‌వో డాక్టర్ ప్రదీప్ రెడ్డి, హసన్‌పర్తి తహసీల్దార్ కిరణ్ కుమార్, వైద్యాధికారులు డాక్టర్ భరత్, డాక్టర్ మానస, జిల్లా మాస్ మీడియా అధికారి వి. అశోక్ రెడ్డి, టీబీ యూనిట్ సమన్వయకర్తలు, ల్యాబ్ టెక్నీషియన్లు, ఆశా కార్యకర్తలు, వైద్య ఆరోగ్యశాఖ సిబ్బంది మరియు స్థానిక భీమారం ప్రజలు పెద్ద సంఖ్యలో పాల్గొన్నారు.