SHABAD POCSO CASE MUR*DER | పోక్సో కేసు కక్షతోనే దారుణం

ఆకేరు న్యూస్, షాబాద్: రంగారెడ్డి జిల్లాలో అత్యంత ఘోరమైన, మానవత్వాన్ని శంకించే దారుణ ఘటన చోటుచేసుకుంది. షాబాద్ మండలం దైవాలగూడ గ్రామంలో ఓ వ్యక్తి కిరాతకుడిగా మారి ఒకేసారి ఆరుగురిని కత్తితో పొడిచి అత్యంత అమానుషంగా హత్య చేశాడు. తనపై పోక్సో కేసు పెట్టారనే పగతోనే నిందితుడు ఈ సామూహిక నరమేధానికి ఒడిగట్టినట్లు ప్రాథమిక సమాచారం ద్వారా తెలుస్తోంది. ఈ ఘాతుకం స్థానికంగా తీవ్ర కలకలం రేపింది.

* పోలీసుల ప్రాథమిక దర్యాప్తు వివరాల ప్రకారం..

దైవాలగూడకు చెందిన రాజ్‌కుమార్ అనే వ్యక్తిపై గత మే 16వ తేదీన ఒక బాలిక తల్లి పోక్సో (POCSO) చట్టం కింద కేసు నమోదు చేయించింది. ఈ కేసులో పోలీసులు రాజ్‌కుమార్‌ను అరెస్ట్ చేసి జైలుకు పంపారు. అయితే, ఇటీవలె అతడు బెయిల్‌పై జైలు నుంచి బయటకు వచ్చాడు. జైలుకు వెళ్లడానికి కారణమైన బాధిత కుటుంబంపై తీవ్ర కక్ష పెంచుకున్న రాజ్‌కుమార్, వారిని అంతమొందించాలని పథకం పన్నాడు.

* ఆరుగురిపై కత్తితో విచక్షణారహితంగా దాడి

నిర్ణీత పథకం ప్రకారం రంగంలోకి దిగిన నిందితుడు రాజ్‌కుమార్.. తను అనుకున్నట్లే పోక్సో కేసు పెట్టిన కుటుంబంపై కత్తితో విచక్షణారహితంగా దాడి చేశాడు. ఈ దాడిలో బాధిత బాలిక, ఆమె తల్లి, అలాగే బాలిక నానమ్మ అక్కడికక్కడే రక్తపు మడుగులో ప్రాణాలు విడిచారు. అంతటితో ఆగని నిందితుడు.. తన భార్య, ఇద్దరు పిల్లలను కూడా అత్యంత క్రూరంగా కత్తితో పొడిచి హత్య చేశాడు. ఇలా మొత్తం ఆరుగురిని బలితీసుకున్నాడు.

* తల్లిదండ్రులకు ఫోన్ చేసి.. ఆపై పరార్

ఈ ఘోరానికి పాల్పడిన అనంతరం నిందితుడు రాజ్‌కుమార్ నేరుగా తన తల్లిదండ్రులకు ఫోన్ చేసినట్లు సమాచారం. తాను ఆరుగురిని హత్య చేశానని, ఇక తాను కూడా ఆత్మహత్య చేసుకుంటున్నానని ఫోన్లో చెప్పినట్లు తెలుస్తోంది. ఆ తర్వాత అతడు అక్కడి నుంచి పరారయ్యాడు.

* రంగంలోకి దిగిన ఉన్నతాధికారులు.. దర్యాప్తు ముమ్మరం

ఒకే గ్రామంలో, ఒకేసారి ఆరుగురు హత్యకు గురైన విషయం తెలియగానే రంగారెడ్డి జిల్లా పోలీసు యంత్రాంగం ఉలిక్కిపడింది. సమాచారం అందుకున్న వెంటనే సైబరాబాద్ పోలీస్ కమిషనర్ తరుణ్ జోషి, డీసీపీ యోగేష్ గౌతమ్ హుటాహుటిన దైవాలగూడ ఘటనా స్థలానికి చేరుకున్నారు. క్లూస్ టీం, డాగ్ స్క్వాడ్‌తో ఘటనా స్థలాన్ని నిశితంగా పరిశీలించారు.

హత్యలకు దారితీసిన ఖచ్చితమైన పరిస్థితులు, ఘటనకు ముందు ఏం జరిగిందనే కోణంలో పోలీసులు విచారణను వేగవంతం చేశారు. పరారీలో ఉన్న నిందితుడు రాజ్‌కుమార్ కోసం పోలీసులు ప్రత్యేక బృందాలను ఏర్పాటు చేసి గాలింపు చర్యలను ముమ్మరం చేశారు. ఒకేసారి ఆరుగురు ప్రాణాలు కోల్పోవడంతో దైవాలగూడ గ్రామంలో విషాద ఛాయలు అలముకున్నాయి, స్థానికులు భయాందోళనలకు గురవుతున్నారు.