Rahul Gandhi in Lok Sabha | విద్యార్థులకు రాహుల్ మద్దతు

Published: 29 Jul 2026 • 02:48 PM

* ఢిల్లీ వీధుల్లో జరిగింది నిరసన కాదు, భావ వ్యక్తీకరణ

* విద్యార్థుల ఆందోళనలపై లోక్‌సభలో రాహుల్ వ్యాఖ్యలు

ఆకేరు న్యూస్, డెస్క్: దేశవ్యాప్తంగా తీవ్ర కలకలం రేపిన పేపర్ లీకేజీల వ్యవహారంపై పార్లమెంట్ వేదికగా రచ్చ కొనసాగుతోంది. బుధవారం లోక్‌సభలో ప్రవేశపెట్టిన ‘యాంటీ పేపర్ లీక్ బిల్లు’పై జరిగిన సుదీర్ఘ చర్చలో లోక్‌సభ ప్రతిపక్ష నేత రాహుల్ గాంధీ తీవ్ర స్థాయిలో ధ్వజమెత్తారు. దేశంలో లక్షలాది మంది విద్యార్థులు, యువత ఆకాంక్షలను అన్ని రాజకీయ పార్టీలు ముక్తకంఠంతో స్వాగతించాల్సిన అవసరం ఉందని ఆయన స్పష్టం చేశారు.

* యువత ఆందోళనలను దేశం అర్థం చేసుకుంది

సభలో బిల్లుపై మాట్లాడుతూ రాహుల్ గాంధీ కేంద్ర ప్రభుత్వ తీరును తీవ్రంగా తప్పుపట్టారు. “దేశంలో నానాటికీ పెరిగిపోతున్న పేపర్ లీకేజీల వల్ల యువత తీవ్ర నిరాశా నిస్పృహల్లో కూరుకుపోతోంది. వారు చేపట్టిన ఆందోళనల వెనుక ఉన్న ఆవేదనను, ఆందోళనలను దేశ ప్రజలందరూ స్పష్టంగా అర్థం చేసుకున్నారు. విద్యార్థులు ఎంతో శాంతియుత మార్గంలో తమ నిరసనను వ్యక్తం చేశారు. ఢిల్లీ వీధుల్లో జరిగింది కేవలం నిరసన మాత్రమే కాదు, అది వారి భవిష్యత్తు కోసం జరిగిన ఆక్రందన, ఒక భావ వ్యక్తీకరణ” అని ఆయన పేర్కొన్నారు.

* ఈ ప్రభుత్వం మా మాట వినదు..

తమ నిరసనల సందర్భంగా ఒక విద్యార్థిని వ్యక్తపరిచిన ఆవేదనను రాహుల్ గాంధీ సభ దృష్టికి తీసుకొచ్చారు. “ఇటీవల ఒక యువతి నాతో మాట్లాడుతూ.. ‘ఈ ప్రభుత్వంలో ఉన్న వ్యక్తులు ఎంత చెప్పినా మా మాట వినరు, మన విన్నపాలను పట్టించుకోరు’ అని తీవ్ర ఆవేదన వ్యక్తం చేసింది. దేశ యువతకు ప్రభుత్వంపై నమ్మకం సడలిపోతోదనడానికి ఇది ప్రత్యక్ష నిదర్శనం. విద్యార్థుల భవిష్యత్తుతో ఆడుకుంటున్న కేంద్ర ప్రభుత్వం, వారి సమస్యల పట్ల అత్యంత మూర్ఖంగా, బాధ్యతారాహిత్యంగా వ్యవహరించింది” అని విమర్శించారు.

* విద్యా వ్యవస్థ నాశనం..

దేశంలో విద్యారంగాన్ని పక్కదారి పట్టించారని రాహుల్ ఆరోపించారు. వర్తమాన విద్యా వ్యవస్థను పూర్తిగా అవినీతిమయం చేశారని, పరీక్షల నిర్వహణలో పారదర్శకత లోపించడం వల్ల అర్హులైన ప్రతిభావంతులకు తీవ్ర అన్యాయం జరుగుతోందని దుయ్యబట్టారు. పేపర్ లీకేజీలను అరికట్టేందుకు చట్టాలు తీసుకురావడమే కాకుండా, విద్యా వ్యవస్థలో పేరుకుపోయిన అవినీతి మూలాలను తుడిచిపెట్టాలని ఆయన డిమాండ్ చేశారు.