Peddi Sudarshan Reddy Statue
* నర్సంపేటలో ఉద్రిక్తత
ఆకేరు న్యూస్, నర్సంపేట: తెలంగాణ ఉద్యమంలో వరంగల్ జిల్లా నుంచి కీలక పాత్ర పోషించిన నర్సంపేట మాజీ ఎమ్మెల్యే, దివంగత పెద్ది సుదర్శన్ రెడ్డి విగ్రహ ఏర్పాటుకు నిర్మించిన గద్దెను మున్సిపల్ అధికారులు కూల్చివేయడంతో నర్సంపేటలో ఉద్రిక్త పరిస్థితులు నెలకొన్నాయి.
నర్సంపేట ప్రభుత్వ మెడికల్ కాలేజీ ఎదురుగా ఉన్న ప్రైవేట్ స్థలంలో పెద్ది సుదర్శన్ రెడ్డి విగ్రహాన్ని ఏర్పాటు చేసేందుకు గద్దెను నిర్మించారు. అయితే అనుమతులు లేవంటూ మున్సిపల్ అధికారులు ఆదివారం రాత్రి గద్దెను కూల్చివేశారు.
ఈ ఘటనపై బీఆర్ఎస్ నాయకులు, పెద్ది సుదర్శన్ రెడ్డి అభిమానులు, నర్సంపేట నియోజకవర్గ ప్రజలు ఆగ్రహం వ్యక్తం చేస్తున్నారు. రాజకీయ కక్ష సాధింపు చర్యల్లో భాగంగానే గద్దెను కూల్చివేశారని బీఆర్ఎస్ నాయకులు ఆరోపించారు. అయితే అధికారులు అనుమతుల అంశాన్ని కారణంగా చూపుతున్నట్లు తెలుస్తోంది.
గద్దె కూల్చివేసిన స్థలాన్ని మాజీ మంత్రి ఎర్రబెల్లి దయాకర్ రావు, మాజీ ఎంపీ బోయినపల్లి వినోద్ కుమార్ పరిశీలించారు. ఘటనకు సంబంధించిన వివరాలను స్థానిక నాయకులను అడిగి తెలుసుకున్నారు.
* నర్సంపేట చౌరస్తాలో బీఆర్ఎస్ నిరసన
పెద్ది సుదర్శన్ రెడ్డి విగ్రహ ఏర్పాటుకు నిర్మించిన గద్దెను కూల్చివేయడాన్ని నిరసిస్తూ బీఆర్ఎస్ ఆధ్వర్యంలో నర్సంపేట చౌరస్తాలో పెద్ద ఎత్తున నిరసన చేపట్టారు. ఈ సందర్భంగా ప్రభుత్వానికి, మున్సిపల్ అధికారులకు వ్యతిరేకంగా నాయకులు, కార్యకర్తలు నినాదాలు చేశారు.
గద్దె కూల్చివేతకు సంబంధించిన వివాదం నేపథ్యంలో నర్సంపేటలో రాజకీయ వాతావరణం వేడెక్కింది. పరిస్థితుల దృష్ట్యా పోలీసులు బందోబస్తు ఏర్పాటు చేశారు.
About the Author
Please tell us what is wrong. Your report will be sent to the website team.
