Raiparthy | గ్యాస్ రిపేర్ల పేరుతో డబ్బులు వసూలు

Published: 16 Aug 2026 • 11:25 AM

* అనుమానిత వ్యక్తుల సంచారం పట్ల ప్రజలు అప్రమత్తంగా ఉండాలి ఎస్సై ముత్యం రాజేందర్

ఆకేరు న్యూస్,రాయపర్తి:

మండల కేంద్రంతో పాటు వివిధ గ్రామాల్లో కొత్త గ్యాస్ కనెక్షన్లు, ఈ-కేవైసీ (e-KYC) ప్రక్రియ పూర్తి చేస్తామని, గ్యాస్ స్టవ్‌లు, పొయ్యిలు పాడైతే ఉచితంగా లేదా తక్కువ ధరకే బాగు చేస్తామని చెబుతూ మోసాలకు పాల్పడుతున్న అనుమానిత వ్యక్తుల పట్ల ప్రజలు అత్యంత అప్రమత్తంగా ఉండాలని రాయపర్తి ఎస్సై ముత్యం రాజేందర్ విజ్ఞప్తి చేశారు.

ఈ సందర్భంగా ఎస్సై మాట్లాడుతూ… గ్రామాల్లోకి కొంతమంది గుర్తుతెలియని వ్యక్తులు వచ్చి మాయమాటలతో అమాయక ప్రజలను బురిడీ కొట్టిస్తున్నట్లు సమాచారం అందిందన్నారు. “ఉచితంగా కొత్త గ్యాస్ కనెక్షన్ రావాలంటే మెడలో బంగారం ఉండకూడదు, దానిని తీసి పక్కన పెట్టండి” అని నమ్మబలికి, బాధితుల దృష్టి మరల్చి మెడలోని బంగారు ఆభరణాలను దోచుకెళ్తున్నారని తెలిపారు.

అంతేకాకుండా, గ్యాస్ లీకేజ్ లేదా రిపేర్లు బాగు చేస్తామని, ఇంటి క్రాప్ లోన్లు ఇప్పిస్తామని నమ్మించి రకరకాల నెపాలతో ప్రజల వద్ద నుంచి డబ్బులు వసూలు చేస్తూ మోసాలకు పాల్పడుతున్నారని హెచ్చరించారు.

అపరిచితులను నమ్మవద్దు: గ్యాస్ రిపేర్లు, కొత్త కనెక్షన్లు, క్రాప్ లోన్ల పేరుతో వచ్చే అనధికారిక వ్యక్తుల మాయమాటలు నమ్మవద్దు.
ఆభరణాలు, నగదు జాగ్రత్త: ఉచితాల పేరుతో బంగారం తీసి పక్కన పెట్టమనడం, ముందస్తుగా పెద్ద మొత్తంలో నగదు వసూలు చేయడం పూర్తి మోసపూరిత చర్యలు.

ఏజెన్సీలను మాత్రమే సంప్రదించండి: గ్యాస్ స్టవ్ రిపేర్లు లేదా కొత్త కనెక్షన్ల కోసం అధికారిక గ్యాస్ ఏజెన్సీ లేదా అధీకృత టెక్నీషియన్లను మాత్రమే ఆశ్రయించాలి.
పోలీసులకు సమాచారం ఇవ్వండి: గ్రామాల్లో ఎవరైనా అనుమానాస్పదంగా తిరుగుతున్నట్లు కనిపిస్తే వెంటనే స్థానిక పోలీస్ స్టేషన్‌కు గానీ, డయల్ 100కు గానీ సమాచారం అందించాలి.

ప్రజలందరూ అప్రమత్తంగా ఉండి మోసగాళ్ల వలలో పడకుండా జాగ్రత్త పడాలని ఎస్సై రాజేందర్ కోరారు.