CP Swetha | వరంగల్ ట్రైసిటీలో ట్రాఫిక్ కష్టాలకు చెక్

Published: 20 Aug 2026 • 07:56 PM

*రంగంలోకి పోలీస్, మున్సిపల్, R&B అధికారులు

ఆకేరు న్యూస్, వరంగల్: వరంగల్ ట్రైసిటీ పరిధిలో ట్రాఫిక్ రద్దీని నియంత్రించడంతో పాటు రోడ్డు ప్రమాదాలను అరికట్టడమే ప్రధాన లక్ష్యంగా వివిధ ప్రభుత్వ శాఖలు సమన్వయంతో ముందుకు సాగాలని వరంగల్ పోలీస్ కమిషనర్ ఎన్. శ్వేత, ఐపీఎస్ స్పష్టం చేశారు.

* సమన్వయమే శ్రేయస్కరం..

గురువారం రోజున వరంగల్ పోలీస్ కమిషనరేట్‌లో నిర్వహించిన ఉన్నత స్థాయి ‘ప్రత్యేక ట్రాఫిక్ మేనేజ్‌మెంట్ సమావేశం’లో పోలీస్, గ్రేటర్ వరంగల్ మున్సిపల్ కార్పొరేషన్ (GWMC), జాతీయ రహదారుల సంస్థ (NHAI), రోడ్లు-భవనాల శాఖ (R&B) అధికారులు పాల్గొని నగరాభివృద్ధి, రవాణా వ్యవస్థ మెరుగుదలపై సుదీర్ఘంగా చర్చించారు. ఈ సందర్భంగా సీపీ మాట్లాడుతూ, నగరంలో శాంతిభద్రతల పరిరక్షణ ఎంత ముఖ్యమో, ట్రాఫిక్ నిర్వహణ మరియు రోడ్డు భద్రత కూడా అంతే ప్రాధాన్యమైనవని పునరుద్ఘాటించారు.

* బ్లాక్ స్పాట్లు – పవర్‌పాయింట్ ప్రజెంటేషన్..

సమావేశంలో ట్రాఫిక్ విభాగం అధికారులు నగరంలో తరచుగా ప్రమాదాలు జరుగుతున్న ‘బ్లాక్ స్పాట్లను’ శాస్త్రీయంగా గుర్తించి, వాటి నివారణకు తీసుకోవాల్సిన తక్షణ చర్యలపై ఒక సమగ్ర పవర్‌పాయింట్ ప్రజెంటేషన్ ఇచ్చారు. ముఖ్యంగా వరంగల్, హన్మకొండ, కాజీపేట జంక్షన్లలో వాహనాల రద్దీని తట్టుకునేలా నూతన సాంకేతికతతో కూడిన సిగ్నలింగ్ వ్యవస్థలను ఏర్పాటు చేయడంపై సుదీర్ఘంగా చర్చించారు.

* క్షేత్రస్థాయి సమస్యలు – తీసుకునే చర్యలు..

కాలినడకన వెళ్లేవారికి, వాహనదారులకు ఇబ్బందిగా మారిన అనధికార ఆక్రమణలను తక్షణమే తొలగించాలని నిర్ణయించారు.

రహదారుల విస్తరణకు ఆటంకంగా మారిన పాత టెలిఫోన్, విద్యుత్ స్తంభాలను సురక్షిత ప్రాంతాలకు తరలించడం.

ట్రైసిటీ వ్యాప్తంగా రాత్రిపూట వెలుతురు సరిగా లేని 159 ప్రాంతాలను పోలీస్ శాఖ గుర్తించింది. ఆయా ప్రాంతాల్లో తక్షణమే వీధి దీపాలు (Street Lights) ఏర్పాటు చేయాలని మున్సిపల్ అధికారులను సీపీ కోరారు.

రోడ్లపై అనధికారికంగా వాహనాలు నిలిపే ప్రదేశాలను నియంత్రించి, శాస్త్రీయ పద్ధతిలో కొత్త పార్కింగ్ స్థలాలను, నిర్దేశిత ఆటో స్టాండ్లను కేటాయించడం.

ప్రమాదకర మలుపులు, యూ-టర్న్ వద్ద సోలార్ బ్లింకర్లు, సైన్ బోర్డులు మరియు అత్యవసర రోడ్డు మరమ్మతులు చేపట్టడం.

* జాయింట్ ఇన్స్‌పెక్షన్లకు గ్రేటర్ మున్సిపల్ కమిషనర్ నిర్ణయం..

గ్రేటర్ వరంగల్ మున్సిపల్ కమిషనర్ వెంకన్న మాట్లాడుతూ, ట్రాఫిక్ పోలీసులు అందించిన నివేదికపై ప్రత్యేక దృష్టి సారిస్తామన్నారు. నగరంలో సమస్య తీవ్రత ఎక్కువగా ఉన్న ప్రాంతాల్లో పోలీస్, మున్సిపల్ శాఖల అధికారులు సంయుక్తంగా క్షేత్రస్థాయిలో పర్యటించి (Joint Field Inspection), సమస్యలకు శాశ్వత పరిష్కారం చూపుతామని హామీ ఇచ్చారు.

* హాజరైన ఉన్నతాధికారులు..

ఈ అత్యున్నత స్థాయి సమావేశంలో మున్సిపల్ కమిషనర్ వెంకన్న, ఎన్‌హెచ్‌ఏఐ పీడీ భరద్వాజ్, సెంట్రల్ జోన్ డీసీపీ దారా కవిత, హన్మకొండ ఏసీపీ నర్సింరావు, ట్రాఫిక్ ఏసీపీ సత్యనారాయణలతో పాటు ట్రైసిటీ పరిధిలోని సీఐలు, ఐటికోర్, టీటీఐ ఇన్‌స్పెక్టర్లు, ఆర్‌అండ్‌బీ మరియు మున్సిపల్ విభాగాధిపతులు పాల్గొన్నారు.