BRS MLCs Tatha Madhu Naveen Kumar Reddy Arrest
* తాతా మధు, నవీన్ రెడ్డి పై కేసు నమోదు
ఆకేరు న్యూస్, హైదరాబాద్: బీఆర్ఎస్ ఖమ్మం ఎమ్మెల్సీ తాతా మధుసూదన్ను (తాతా మధు) మంగళవారం ఉదయం సైఫాబాద్ పోలీసులు అరెస్ట్ చేశారు. రాజ్యాంగబద్ధమైన శాసనసభ స్పీకర్ స్థానాన్ని ఉద్దేశించి అనుచిత, వివాదాస్పద వ్యాఖ్యలు చేశారన్న తీవ్ర ఆరోపణల నేపథ్యంలో ఆయనపై ఎస్సీ, ఎస్టీ అట్రాసిటీ కేసు నమోదు అరెస్ట్ చేశారు.
హైదరాబాద్లోని న్యూ ఎమ్మెల్యే క్వార్టర్స్లో ఉన్న ఎమ్మెల్సీ తాతా మధు నివాసానికి మంగళవారం ఉదయం 7 గంటల ప్రాంతంలో పోలీసులు భారీగా చేరుకున్నారు. న్యూ ఎమ్మెల్యే క్వార్టర్స్ పరిసర ప్రాంతాలను తమ అదుపులోకి తీసుకున్న సైఫాబాద్ పోలీసులు, అక్కడే ఉన్న తాతా మధును అదుపులోకి తీసుకున్నారు.
* మరో ఎమ్మెల్సీ నవీన్ కుమార్ రెడ్డి అరెస్ట్
బీఆర్ఎస్ ఎమ్మెల్సీ నవీన్ కుమార్ రెడ్డిని పోలీసులు అరెస్ట్ చేశారు. సభలో చోటుచేసుకున్న పరిణామాల వేళ స్పీకర్ హోదా, వర్గాన్ని ఉద్దేశించి చేసిన వ్యాఖ్యలు ఎస్సీ, ఎస్టీ చట్టం పరిధిలోకి వస్తాయని, బాధితుల ఫిర్యాదు మేరకు ఈ కేసు నమోదు చేసినట్లు పోలీసులు తెలిపారు.
* వివాదం నేపథ్యం – అసెంబ్లీలో రచ్చ
తెలంగాణ అసెంబ్లీ బడ్జెట్ సమావేశాల సందర్భంగా చోటుచేసుకున్న పరిణామాల క్రమంలో ఎమ్మెల్సీ తాతా మధు చేసిన కొన్ని వ్యాఖ్యలు ఈ వివాదానికి మూల కారణమయ్యాయి. స్పీకర్ను ఉద్దేశించి ఆయన చేసిన మాటలు అనుచితంగా ఉన్నాయని అధికార పక్షం ఆరోపించింది. కాగా, దీనిపై తాతా మధు అంతకుముందే విచారం వ్యక్తం చేస్తూ ప్రకటన విడుదల చేశారు. తాను స్పీకర్ వ్యవస్థను, వ్యక్తిగతంగా స్పీకర్ను ఎంతో గౌరవిస్తానని, శాసనసభ వద్ద తోపులాట జరిగినప్పుడు ఎమ్మెల్యేలపై పోలీసుల దాడిని ప్రశ్నిస్తూ అన్న మాటలను స్పీకర్కు ఆపాదించడం సరైంది కాదని వివరణ ఇచ్చారు.
* నాంపల్లి కోర్టులో హాజరు – చంచల్గూడ జైలుకు తరలింపు?
పోలీసులు ఇద్దరు ఎమ్మెల్సీలను అదుపులోకి తీసుకున్న తర్వాత ప్రాథమిక వైద్య పరీక్షల నిమిత్తం ఆసుపత్రికి తరలించే అవకాశాలు ఉన్నాయి. ఆ తదనంతరం వారిని నాంపల్లిలోని ప్రజాప్రతినిధుల కోర్టు (స్పెషల్ కోర్టు) ముందు హాజరుపరచనున్నారు. న్యాయస్థానంలో రిమాండ్ రిపోర్టును సమర్పించి, తదుపరి చట్టపరమైన ప్రక్రియను పూర్తి చేసిన అనంతరం ఇద్దరు నేతలను చంచల్గూడ కేంద్ర కారాగారానికి తరలించేందుకు పోలీసులు సిద్ధమవుతున్నారు.
* రాజకీయ వర్గాల్లో తీవ్ర కలకలం
సిట్టింగ్ ఎమ్మెల్సీలను ఉదయాన్నే క్వార్టర్స్ నుంచి అరెస్ట్ చేయడం పట్ల బీఆర్ఎస్ శ్రేణులు, నేతలు తీవ్ర నిరసన వ్యక్తం చేస్తున్నారు. ప్రతిపక్షాల గొంతు నొక్కేందుకే రేవంత్ రెడ్డి ప్రభుత్వం కక్షసాధింపు చర్యలకు పాల్పడుతోందని బీఆర్ఎస్ వర్గాలు ఆరోపిస్తున్నాయి.
About the Author
Please tell us what is wrong. Your report will be sent to the website team.
