SI Mounika Reddy KPHB Midnight Patrolling
* పోకిరీలకు పోలీసుల స్ట్రాంగ్ వార్నింగ్
ఆకేరు న్యూస్, హైదరాబాద్: కేపీహెచ్బీ పోలీస్ స్టేషన్ పరిధిలో రాత్రివేళల్లో శాంతిభద్రతలకు విఘాతం కలిగించే వ్యక్తులు, అనవసరంగా గుమిగూడే మూకలపై పోలీసులు ప్రత్యేక నిఘా పెట్టారు. కాలనీవాసులు, ఐటీ ఉద్యోగులు, విద్యార్థులు, ముఖ్యంగా రాత్రి వేళల్లో ప్రయాణించే మహిళలకు భద్రత కల్పించడమే లక్ష్యంగా మిడ్నైట్ పెట్రోలింగ్ను ముమ్మరం చేశారు. కేపీహెచ్బీ పరిధిలోని ప్రధాన రహదారులు, ఐటీ కారిడార్కు అనుసంధానమైన ప్రాంతాలు, హాస్టల్ జోన్లు, వాణిజ్య ప్రాంతాల్లో పోలీసులు ఆకస్మిక తనిఖీలు నిర్వహించారు. రాత్రి వేళల్లో రోడ్లపై అనవసరంగా గుమిగూడుతూ హల్చల్ చేస్తున్న వారిని గుర్తించి ప్రశ్నించారు. అనుమానాస్పదంగా కనిపించిన వాహనాలు, వ్యక్తులను తనిఖీ చేశారు.
* ఎస్ఐ మౌనికారెడ్డి నేతృత్వంలో ప్రత్యేక తనిఖీలు
కేపీహెచ్బీ సీఐ విజయ్ కుమార్ పర్యవేక్షణలో ఎస్ఐ మౌనికారెడ్డి నేతృత్వంలో ప్రత్యేక పోలీస్ బృందం మిడ్నైట్ పెట్రోలింగ్ చేపట్టింది. కేపీహెచ్బీ ఫేజ్-1 నుంచి ఫేజ్-9 వరకు పలు ప్రాంతాల్లో పోలీసులు రాత్రివేళల్లో విస్తృతంగా తనిఖీలు నిర్వహించారు. రోడ్లపై ప్రజలకు ఇబ్బంది కలిగించేలా వ్యవహరించిన వారిని పోలీసులు హెచ్చరించారు. నిబంధనలు ఉల్లంఘిస్తూ హల్చల్ చేస్తే చర్యలు తప్పవని స్పష్టం చేశారు. మద్యం సేవించి వాహనాలు నడపడం, ప్రజలకు ఇబ్బంది కలిగించే విధంగా ప్రవర్తించడం వంటి చర్యలను ఎట్టి పరిస్థితుల్లోనూ ఉపేక్షించబోమని పోలీసులు హెచ్చరించారు.
* మహిళల భద్రతకు ప్రాధాన్యం
కేపీహెచ్బీ ప్రాంతం ఐటీ ఉద్యోగులు, విద్యార్థులు, హాస్టళ్లలో నివసించే యువతతో నిత్యం రద్దీగా ఉంటుంది. ఈ నేపథ్యంలో రాత్రివేళల్లో విధులకు వెళ్లే మహిళలు, ఇతర ప్రయాణికుల భద్రతపై పోలీసులు ప్రత్యేక దృష్టి సారించారు. రాత్రివేళల్లో అనుమానాస్పదంగా తిరిగే వ్యక్తులు, వాహనాలపై నిఘా కొనసాగిస్తామని పోలీసులు తెలిపారు. అవసరమైన ప్రాంతాల్లో ఆకస్మిక తనిఖీలు, మిడ్నైట్ పెట్రోలింగ్ మరింత ముమ్మరం చేస్తామని స్పష్టం చేశారు.
* నిరంతరం గస్తీ
ప్రజలకు ఎలాంటి ఇబ్బందులు కలగకుండా శాంతిభద్రతలను కాపాడేందుకు రాత్రివేళల్లో గస్తీని కొనసాగిస్తామని కేపీహెచ్బీ పోలీసులు తెలిపారు. అసాంఘిక కార్యకలాపాలకు పాల్పడే వారిపై చట్టప్రకారం చర్యలు తీసుకుంటామని హెచ్చరించారు.
About the Author
Please tell us what is wrong. Your report will be sent to the website team.
