Sri Sri Release Date | ‘శ్రీ శ్రీ’ రిలీజ్ డేట్ వచ్చేసిందా?

Published: 10 Sep 2026 • 02:00 PM

* దుల్కర్ సల్మాన్, పూజా హెగ్డేల ‘శ్రీ శ్రీ’కి డిసెంబర్ 4 విడుదల తేదీ?

ఆకేరు న్యూస్, హైదరాబాద్: మలయాళ స్టార్ హీరో దుల్కర్ సల్మాన్, టాలీవుడ్ అందాల భామ పూజా హెగ్డే జంటగా నటిస్తున్న తాజా చిత్రం ‘శ్రీ శ్రీ’. రవి నెలకుడిటి దర్శకత్వం వహిస్తున్న ఈ చిత్రం పాన్-ఇండియా రొమాంటిక్ ఎంటర్‌టైనర్‌గా తెరకెక్కుతోంది. దుల్కర్ సల్మాన్ నటిస్తున్న 41వ చిత్రంగా రూపొందుతున్న ఈ సినిమాపై ప్రేక్షకుల్లో ఇప్పటికే మంచి ఆసక్తి నెలకొంది.

తాజా సమాచారం ప్రకారం, ‘శ్రీ శ్రీ’ చిత్రాన్ని డిసెంబర్ 4, 2026న ప్రపంచవ్యాప్తంగా ప్రేక్షకుల ముందుకు తీసుకురావాలని మేకర్స్ భావిస్తున్నట్లు తెలుస్తోంది. అయితే విడుదల తేదీపై అధికారిక ప్రకటన ఇంకా వెలువడాల్సి ఉంది.

* ప్రేమకథగా ‘శ్రీ శ్రీ’

దుల్కర్ సల్మాన్, పూజా హెగ్డే జంటగా నటిస్తున్న ఈ సినిమా ప్రధానంగా ప్రేమకథ చుట్టూ సాగే రొమాంటిక్ ఎంటర్‌టైనర్‌గా రూపొందుతోంది. కుటుంబ ప్రేక్షకులు, యువతను ఆకట్టుకునేలా కథను తెరకెక్కిస్తున్నట్లు సమాచారం.ఈ చిత్రానికి ప్రముఖ సంగీత దర్శకుడు జీవీ ప్రకాశ్ కుమార్ సంగీతం అందిస్తున్నారు. ఇప్పటికే విడుదలైన ఫస్ట్ లుక్, తొలి పాటకు మంచి స్పందన లభించినట్లు చిత్ర బృందం వెల్లడించింది.

* భారీ అంచనాలతో పాన్-ఇండియా మూవీ

దుల్కర్ సల్మాన్‌కు తెలుగు ప్రేక్షకుల్లోనూ మంచి క్రేజ్ ఉంది. ఆయన నటించిన తెలుగు చిత్రాలు విజయవంతం కావడంతో ‘శ్రీ శ్రీ’పై కూడా అంచనాలు పెరిగాయి. మరోవైపు పూజా హెగ్డేకు ఉన్న క్రేజ్ సినిమాకు అదనపు ఆకర్షణగా నిలవనుంది. ఎస్‌ఎల్‌వీ సినిమాస్ బ్యానర్‌పై సుధాకర్ చెరుకూరి ఈ చిత్రాన్ని నిర్మిస్తున్నారు.