National Lok Adalat | జాతీయ లోక్ అదాలత్ ప్రారంభం

Published: 12 Sep 2026 • 05:18 PM

* రాజీ మార్గంలో కేసుల పరిష్కారం

* న్యాయవాదులు, అధికారులు హాజరు

ఆకేరు న్యూస్, హనుమకొండ: వరంగల్, హనుమకొండ జిల్లాల్లో మూడో జాతీయ లోక్ అదాలత్ కార్యక్రమం శనివారం ప్రారంభమైంది. న్యాయస్థానాల్లో పెండింగ్‌లో ఉన్న కేసులతో పాటు, ఇరుపక్షాల పరస్పర అంగీకారంతో పరిష్కరించుకునే వివాదాలకు సత్వర పరిష్కారం చూపించేందుకు ఈ కార్యక్రమాన్ని నిర్వహిస్తున్నారు. న్యాయ సేవా సదనం భవనంలో నిర్వహించిన కార్యక్రమాన్ని వరంగల్, హనుమకొండ జిల్లాల ప్రధాన న్యాయమూర్తులు, జిల్లా న్యాయ సేవాధికార సంస్థల చైర్‌పర్సన్లు బి.వి. నిర్మలా గీతాంబ, ఎం. రామకృష్ణ సునీత ప్రారంభించారు.

* రాజీ ద్వారా కేసుల పరిష్కారం

లోక్ అదాలత్‌లో రాజీకి అవకాశం ఉన్న కేసులను సంబంధిత పక్షాలతో చర్చించి పరిష్కరించే ప్రక్రియ చేపట్టారు. దీంతో కక్షిదారులకు సమయం, ఖర్చు తగ్గడంతో పాటు త్వరితగతిన న్యాయం పొందే అవకాశం ఉంటుంది. వివిధ విభాగాలకు సంబంధించిన కేసుల పరిష్కారం కోసం ప్రత్యేక బెంచ్‌లను ఏర్పాటు చేశారు.

* న్యాయవాదులు, అధికారులు హాజరు

కార్యక్రమంలో వరంగల్ పోలీస్ కమిషనర్ ఎన్. శ్వేత, డీసీపీ ధార కవిత, వరంగల్ జిల్లా న్యాయ సేవాధికార సంస్థ కార్యదర్శి కందుకూరి పూజ, పలువురు న్యాయమూర్తులు, న్యాయవాదులు, పోలీసు అధికారులు పాల్గొన్నారు. న్యాయవాదుల సంఘాల అధ్యక్షులు సి.హెచ్. ఉపేందర్, సి.హెచ్. రామకృష్ణ, చకిలం ఉపేందర్, చొల్లేటి రామకృష్ణ తదితరులు హాజరయ్యారు. వివిధ బ్యాంకులు, బీమా సంస్థల అధికారులు కూడా లోక్ అదాలత్‌లో పాల్గొని సంబంధిత వివాదాల పరిష్కారానికి కక్షిదారులు, న్యాయవాదులతో చర్చలు జరిపారు. వరంగల్, హనుమకొండ జిల్లాల్లో లోక్ అదాలత్‌లో ఎన్ని కేసులు పరిష్కరించబడ్డాయి, ఎన్ని కేసుల్లో రాజీ కుదిరిందనే పూర్తి వివరాలను సాయంత్రం వెల్లడించనున్నట్లు జిల్లా న్యాయ సేవాధికార సంస్థలు తెలిపాయి.