Konda Surekha Counter
* మళ్లీ తూర్పు నుంచే.. సురేఖ సంచలనం
* సారయ్య, నాయినికి కొండా సురేఖ కౌంటర్
* కొండా సురేఖ
ఆకేరు న్యూస్, వరంగల్: మాజీ మంత్రి, వరంగల్ తూర్పు ఎమ్మెల్యే కొండా సురేఖ కీలక వ్యాఖ్యలు చేశారు. తాను కాంగ్రెస్ పార్టీని వీడే ప్రసక్తే లేదని స్పష్టం చేశారు. రానున్న ఎన్నికల్లో కాంగ్రెస్ పార్టీ తరఫున వరంగల్ తూర్పు నియోజకవర్గం నుంచే పోటీ చేస్తానని ధీమా వ్యక్తం చేశారు. గత పది రోజులుగా కార్యకర్తలు ఎంతో బాధపడుతున్నారని సురేఖ తెలిపారు. వారిని కలవడం ఆలస్యం కావడానికి సుమంత్ బెయిల్ వ్యవహారమే కారణమని చెప్పారు. తాను ఎప్పుడూ పదవుల కోసం ఆరాటపడలేదని, పదవి అనేది కేవలం అలంకారం మాత్రమేనని అన్నారు. ప్రజలకు, కార్యకర్తలకు సేవ చేయాలంటే పదవి అవసరం లేదని పేర్కొన్నారు.
* గత రాజకీయాలను గుర్తుచేసుకున్న సురేఖ
వైఎస్సార్ మరణం తర్వాత తమను కొందరు మోసం చేశారని కొండా సురేఖ ఆరోపించారు. అప్పట్లో కేసీఆర్ సూచనతో వరంగల్ తూర్పు నుంచి పోటీ చేసి, అప్పటి మంత్రిని 55 వేల మెజారిటీతో ఓడించానని గుర్తు చేశారు. ప్రస్తుతం కొందరు నాయకులు ఉదయం ఒక పార్టీలో, మధ్యాహ్నం మరో పార్టీలో తిరుగుతున్నారని విమర్శించారు.
* మూడు శాఖలను సమర్థంగా నిర్వహించా
తాను మంత్రిగా ఉన్న సమయంలో ఎలాంటి తప్పు చేయకుండా, ఎలాంటి మచ్చ లేకుండా మూడు శాఖలను సమర్థవంతంగా నిర్వహించానని సురేఖ అన్నారు. తనను మంత్రివర్గం నుంచి బర్తరఫ్ చేసినందుకు బాధపడటం లేదని చెప్పారు. పదవి పోయినా ప్రజల మధ్య ఉండి సేవ చేయవచ్చని పేర్కొన్నారు. పరకాల ఎమ్మెల్యే చల్లా ధర్మారెడ్డిపై కూడా సురేఖ తీవ్ర ఆరోపణలు చేశారు. తమ గురించి ఎవరైనా మాట్లాడే ముందు ఒళ్లు దగ్గర పెట్టుకుని మాట్లాడాలని హెచ్చరించారు.
* కాంగ్రెస్లోనే కొనసాగుతా
తాము ఏ ఇతర పార్టీలోకి వెళ్లే ఆలోచనలో లేమని కొండా సురేఖ స్పష్టం చేశారు. కాంగ్రెస్ పార్టీలోనే పుట్టి, కాంగ్రెస్ పార్టీలోనే పెరిగామని అన్నారు. అనివార్య పరిస్థితుల్లో గతంలో టీఆర్ఎస్లోకి వెళ్లామని, అయితే ఎవరూ తమను ఆ పార్టీ నుంచి వెళ్లగొట్టలేదని తెలిపారు. పైస్థాయి నుంచి కూడా తమకు ఫోన్లు వస్తున్నాయని ఆమె పేర్కొన్నారు. అయినప్పటికీ పార్టీ మారే ఆలోచన లేదని స్పష్టం చేశారు. రానున్న ఎన్నికల్లో కాంగ్రెస్ పార్టీ నుంచే పోటీ చేసి గెలుస్తామని, తిరిగి కాంగ్రెస్ పార్టీని అధికారంలోకి తీసుకొస్తామని ధీమా వ్యక్తం చేశారు.
* తూర్పులో టికెట్ నాకే
ఎన్ని కుట్రలు చేసినా వరంగల్ తూర్పు నియోజకవర్గంలో మళ్లీ తనకే కాంగ్రెస్ పార్టీ టికెట్ వస్తుందని కొండా సురేఖ ధీమా వ్యక్తం చేశారు. రాబోయే కార్పొరేషన్ ఎన్నికల్లో నవీన్ రాజ్ భుజాలపై 24 మంది కార్పొరేటర్లను గెలిపించుకుందామని కార్యకర్తలకు పిలుపునిచ్చారు. స్థానిక డివిజన్లో కనీసం ఒక కార్పొరేటర్ను గెలిపించుకునే స్థాయి సారయ్యకు కూడా లేదని ఆమె విమర్శించారు. కార్యకర్తలు అధైర్యపడాల్సిన అవసరం లేదని, తాము ఎప్పటికీ ప్రజల మధ్యే ఉంటామని స్పష్టం చేశారు.
* మళ్లీ మంత్రి అవుతా
కాంగ్రెస్ పార్టీని వీడేది లేదని మరోసారి స్పష్టం చేసిన కొండా సురేఖ.. రానున్న ఎన్నికల్లో కాంగ్రెస్ పార్టీ తరఫున పోటీ చేసి విజయం సాధిస్తానని అన్నారు. కాంగ్రెస్ ప్రభుత్వం మళ్లీ అధికారంలోకి వస్తుందని, తాను తిరిగి మంత్రి అవుతానని ధీమా వ్యక్తం చేశారు. కార్యకర్తలు, అనుచరులు ఎలాంటి ఆందోళన చెందాల్సిన అవసరం లేదని పేర్కొన్నారు.
* నేతల వ్యాఖ్యలపై సురేఖ మండిపాటు
మాజీ మంత్రి కొండా సురేఖ బసవరాజు సారయ్య, వరంగల్ పశ్చిమ ఎమ్మెల్యే నాయిని రాజేందర్ రెడ్డిపై తీవ్రస్థాయిలో విమర్శలు చేశారు. మైక్ దొరకగానే కొందరు నాయకులు ఆవేశంతో మాట్లాడుతున్నారని ఎద్దేవా చేశారు. మైక్ చూసి చాలా రోజులైందని, ఇప్పుడు మైక్ కనిపించగానే కొందరు నాయకులు ఆవేశంతో మాట్లాడుతున్నారని సురేఖ వ్యాఖ్యానించారు. తనపై పోటీ చేసి ఎమ్మెల్యేగా గెలుస్తానని బసవరాజు సారయ్య చెబుతున్నారని పేర్కొంటూ.. ముందుగా తన అనుచరులపై కార్పొరేటర్గా గెలిచి చూపించాలని సవాల్ చేశారు.
* నాయినిపై ఘాటు వ్యాఖ్యలు
వరంగల్ పశ్చిమ ఎమ్మెల్యే నాయిని రాజేందర్ రెడ్డిపైనా సురేఖ తీవ్ర వ్యాఖ్యలు చేశారు. గతంలో బీఆర్ఎస్ నేత దాస్యం వినయ్ భాస్కర్ను ఎదుర్కోలేక నియోజకవర్గంలోని కార్యక్రమాలకు తమను బతిమాలి తీసుకెళ్లేవారని ఆరోపించారు. ప్రస్తుతం పరిస్థితులు మారడంతో తమపైనే విమర్శలు చేస్తున్నారని మండిపడ్డారు.
* భద్రకాళి ఆలయ పదవిపై ప్రశ్నలు
భద్రకాళి ఆలయ పదవి విషయంలో గతంలో పెద్ద ఎత్తున హంగామా చేసిన నాయిని రాజేందర్ రెడ్డి.. వెంకట్ రెడ్డి పదవి కోల్పోయిన సమయంలో ఎందుకు మౌనంగా ఉన్నారని సురేఖ ప్రశ్నించారు. తనపై విమర్శలు చేసే ముందు గతంలో తమతో కలిసి ఎలా వ్యవహరించారో గుర్తు చేసుకోవాలని సూచించారు. కొండా సురేఖ తాజా వ్యాఖ్యలతో వరంగల్ కాంగ్రెస్లో అంతర్గత రాజకీయాలు మరోసారి వేడెక్కినట్లు రాజకీయ వర్గాల్లో చర్చ జరుగుతోంది.
About the Author
Please tell us what is wrong. Your report will be sent to the website team.
