Vizianagaram Woman Murder
* గోనెసంచిలో మృతదేహం
ఆకేరు న్యూస్, విజయనగరం : విజయనగరం జిల్లాలో ఒక దారుణమైన హత్య ఘటన స్థానికంగా తీవ్ర కలకలం రేపింది. పూసపాటిరేగ మండలం నడిపల్లి గ్రామానికి చెందిన శీల రమ (35) అనుమానాస్పద పరిస్థితుల్లో దారుణ హత్యకు గురైంది. సమాచారం అందుకున్న పోలీసులు రంగంలోకి దిగి విచారణ చేపట్టగా, హత్య చేసి మృతదేహాన్ని గోనెసంచిలో కుక్కి బైక్పై తరలించినట్టు దిగ్భ్రాంతికర వివరాలు వెలుగులోకి వచ్చాయి.
* ఇంటికి వెళ్లిన మహిళ.. ఆ తర్వాత ఏమైంది?..
పోలీసులు, స్థానిక వివరాల ప్రకారం.. నడిపల్లి గ్రామానికి చెందిన శీల రమకు, అదే గ్రామానికి చెందిన లంకలపల్లి బంగారుబాబుతో ముందే పరిచయం ఉంది. బంగారుబాబు పాల వ్యాపారం చేస్తుండేవాడు. ఆ పరిచయం క్రమంగా సన్నిహిత సంబంధంగా మారినట్లు దర్యాప్తులో తేలింది. అయితే, కొంతకాలంగా వీరిద్దరి మధ్య తీవ్ర మనస్పర్థలు రావడం ప్రారంభమైంది. ఈ క్రమంలో సోమవారం రమ భర్త విధులకు వెళ్లిన తర్వాత, ఆమె బంగారుబాబు ఇంటికి వెళ్ళింది. అక్కడ ఇద్దరి మధ్య తీవ్రస్థాయిలో వాగ్వాదం చోటుచేసుకుంది. మాటామాటా పెరిగి ఇద్దరి మధ్య గొడవ శృతిమించింది. దీంతో తీవ్ర ఆగ్రహానికి లోనైన బంగారుబాబు రమపై దాడికి తెగబడ్డాడు. రమ ముఖంపై దిండుతో గట్టిగా అదిమి ఊపిరాడకుండా చేసి హత్య చేసినట్లు తాజా దర్యాప్తులో వెల్లడైంది.
* గోనెసంచిలో కుక్కి ద్విచక్రవాహనంపై తరలింపు..
రమ ప్రాణాలు కోల్పోయిందని నిర్ధారించుకున్న నిందితుడు, ఘటనను కప్పిపుచ్చేందుకు మృతదేహాన్ని ఒక గోనెసంచిలో ఉంచాడు. అనంతరం ఆ గోనెసంచిని తన మోటారు సైకిల్పై వేసుకుని గ్రామానికి దూరంగా తరలించాడు. నెల్లిమర్ల మండలం సారిపల్లి సమీపంలోని పొదల్లో మృతదేహాన్ని పడేసి, ఏమీ తెలియనట్లు తిరిగి తన స్వగ్రామానికి వెళ్లిపోయాడు.
* భర్త ఫిర్యాదుతో దర్యాప్తు ప్రారంభం..
సాయంత్రమైనా రమ ఇంటికి తిరిగి రాకపోవడంతో కుటుంబ సభ్యులలో ఆందోళన మొదలైంది. ఆమె భర్త వెంటనే పూసపాటిరేగ పోలీస్ స్టేషన్కు వెళ్లి తన భార్య కనిపించడం లేదని మిస్సింగ్ ఫిర్యాదు చేశాడు. భర్త ఇచ్చిన ఫిర్యాదు ఆధారంగా కేసు నమోదు చేసుకున్న పోలీసులు దర్యాప్తు ప్రారంభించి, రమతో సంబంధాలు ఉన్న వ్యక్తుల వివరాలను, అనుమానితుల కదలికలను సేకరించడం మొదలుపెట్టారు. ఈ క్రమంలోనే బంగారుబాబు ప్రవర్తనపై పోలీసులకు తీవ్ర అనుమానం వచ్చి అతడిపై నిఘా పెట్టారు.
* కొబ్బరి తోటలో నిందితుడి పట్టివేత..
పూసపాటిరేగ మండలం పోరాం శివారులోని ఒక కొబ్బరి తోటలో దాక్కున్న నిందితుడు బంగారుబాబును పోలీసులు చాకచక్యంగా అదుపులోకి తీసుకున్నారు. అతడిని స్టేషన్కు తరలించి తమదైన శైలిలో విచారించగా హత్య చేసిన విషయాన్ని, మృతదేహాన్ని నెల్లిమర్ల మండలం సారిపల్లి పొదల్లో పడేసిన విషయాన్ని ఒప్పుకున్నాడు.
ఘటనపై నెల్లిమర్ల ఎస్ఐ అరుణ్ కిరణ్ హత్య కేసు నమోదు చేసి దర్యాప్తు వేగవంతం చేశారు. భోగాపురం రూరల్ సీఐ ఎన్. శ్రీనివాసరావు, విజయనగరం ఇన్చార్జి డీఎస్పీ సూరాడ రాఘవులు, మహిళా పోలీస్స్టేషన్ డీఎస్పీ పీవీ నరసింహారావు స్వయంగా ఈ ఘటనపై విచారణ చేపట్టారు.
* ఇద్దరు చిన్నారులకు తల్లి దూరం..
హత్యకు గురైన శీల రమ విశాఖపట్నంలోని ఒక ప్రైవేటు కళాశాలలో హౌస్కీపింగ్ పనులు చేస్తూ కుటుంబాన్ని పోషించుకునేది. వినాయక చవితి సెలవు కావడంతో సోమవారం ఇంట్లోనే ఉంది. ఆమెకు ఇద్దరు చిన్నారులు ఉన్నారు. తల్లి దారుణ హత్యకు గురికావడంతో ఆ చిన్నారులు కన్నీరుమున్నీరుగా విలపిస్తున్నారు. కుటుంబానికి ఆసరాగా ఉన్న మహిళ అకస్మాత్తుగా మృతి చెందడంతో గ్రామంలో తీవ్ర శోకఛాయలు అలముకున్నాయి.
* అన్ని కోణాల్లో పోలీసుల విచారణ..
మృతదేహాన్ని స్వాధీనం చేసుకున్న పోలీసులు పోస్టుమార్టం నిమిత్తం ఆసుపత్రికి తరలించారు. సాంకేతిక ఆధారాలతో పోలీసులు లోతుగా విచారణ జరుపుతున్నారు. పోస్టుమార్టం నివేదిక వచ్చిన తర్వాత మరిన్ని అధికారిక వివరాలు వెల్లడిస్తామని అధికారులు తెలిపారు.
About the Author
Please tell us what is wrong. Your report will be sent to the website team.
