Visakhapatnam House Pattas | విశాఖ పేదలకు గుడ్ న్యూస్..

Published: 18 Sep 2026 • 02:25 PM

* 28,445 పేద కుటుంబాలకు ఇంటి పట్టాలు

* రూ.8,874 కోట్ల విలువైన ప్రభుత్వ స్థలాల క్రమబద్ధీకరణ.

* 11 మండలాల్లో లబ్ధిదారులకు పట్టాల పంపిణీ

ఆ కేరు న్యూస్, విశాఖపట్నం : ప్రభుత్వ స్థలాల్లో ఇళ్లు నిర్మించుకుని నివసిస్తున్న పేద కుటుంబాలకు ఇంటి పట్టాలు అందించేందుకు ఆంధ్రప్రదేశ్ ప్రభుత్వం చర్యలు చేపట్టింది. ఇందులో భాగంగా 28,445 కుటుంబాలకు ఇంటి పట్టాలు పంపిణీ చేయనున్నట్లు సీఎం చంద్రబాబు ప్రకటించారు.

ఈ కార్యక్రమంలో భాగంగా రేపు విశాఖపట్నంలో పర్యటించనున్నట్లు సీఎం చంద్రబాబు తెలిపారు. పేదల సొంతింటి కలను సాకారం చేయడమే లక్ష్యంగా ప్రభుత్వ స్థలాల్లో ఇళ్లు నిర్మించుకున్న అర్హులైన కుటుంబాలకు పట్టాలు అందిస్తామని వెల్లడించారు.

విశాఖ జిల్లాలోని 11 మండలాల పరిధిలో రూ.8,874 కోట్ల విలువైన స్థలాలను క్రమబద్ధీకరించనున్నట్లు సీఎం పేర్కొన్నారు. దీని ద్వారా దీర్ఘకాలంగా ప్రభుత్వ స్థలాల్లో నివాసం ఉంటున్న అర్హులైన పేద కుటుంబాలకు భూమిపై హక్కు కల్పించే అవకాశం ఏర్పడనుంది.

* 28,445 కుటుంబాలకు ప్రయోజనం..

ప్రభుత్వ స్థలాల్లో ఇళ్లు నిర్మించుకుని నివసిస్తున్న పేదల వివరాలను పరిశీలించి అర్హత ఉన్న కుటుంబాలకు ఇంటి పట్టాలు అందించనున్నట్లు ప్రభుత్వం తెలిపింది. పట్టాలు అందడంతో ఆయా కుటుంబాలకు తమ నివాస స్థలంపై చట్టబద్ధమైన హక్కు కలగనుంది.

పేదల జీవన ప్రమాణాలను మెరుగుపరిచేందుకు ప్రభుత్వం చేపడుతున్న చర్యల్లో భాగంగా ఈ కార్యక్రమాన్ని అమలు చేస్తున్నట్లు సీఎం చంద్రబాబు వెల్లడించారు. రేపు విశాఖలో జరిగే కార్యక్రమంలో లబ్ధిదారులకు పట్టాల పంపిణీ చేయనున్నారు. “28,445 కుటుంబాల కల సాకారం చేస్తాం.. పేదలకు ఇంటి పట్టాలు ఇస్తాం” అని సీఎం చంద్రబాబు పేర్కొన్నారు.