Warangal Police | పోలీసు ఉద్యోగార్ధులకు ఉచిత కోచింగ్..

Published: 18 Sep 2026 • 03:04 PM

* 20న స్క్రీనింగ్ టెస్ట్

ఆకేరు న్యూస్, వరంగల్ : ఎస్‌ఐ, కానిస్టేబుల్ ఉద్యోగాల కోసం సిద్ధమవుతున్న అభ్యర్థులకు వరంగల్ పోలీస్ కమిషనరేట్ శుభవార్త తెలిపింది. వరంగల్, హనుమకొండ, జనగామ జిల్లాలకు చెందిన ఎస్‌ఐ, కానిస్టేబుల్ ఉద్యోగ అభ్యర్థులకు ఉచిత పోలీస్ పరీక్షల కోచింగ్ అందించేందుకు స్క్రీనింగ్ టెస్ట్ నిర్వహించనున్నారు.

ప్రజాప్రతినిధులు, జిల్లా కలెక్టర్ల సహకారంతో ఈ ఉచిత కోచింగ్ కార్యక్రమాన్ని నిర్వహించనున్నట్లు వరంగల్ పోలీస్ కమిషనరేట్ వెల్లడించింది. కోచింగ్‌కు అర్హులైన అభ్యర్థులను ఎంపిక చేసేందుకు ముందుగా స్క్రీనింగ్ టెస్ట్ నిర్వహించనున్నారు.

* సెప్టెంబర్ 20న పరీక్ష..

స్క్రీనింగ్ టెస్ట్‌ను 2026 సెప్టెంబర్ 20న ఆదివారం నిర్వహించనున్నారు. ఉదయం 10 గంటల నుంచి మధ్యాహ్నం 1 గంట వరకు పరీక్ష కొనసాగుతుంది. పరీక్షకు హాజరుకావాలనుకునే అభ్యర్థులు ముందుగా ఆన్‌లైన్‌లో తమ వివరాలను నమోదు చేసుకోవాల్సి ఉంటుంది.

అభ్యర్థులు సెప్టెంబర్ 19, శనివారం రాత్రి 8 గంటలలోపు రిజిస్ట్రేషన్ పూర్తి చేసుకోవాలని అధికారులు సూచించారు. ఇందుకోసం ప్రత్యేకంగా గూగుల్ ఫామ్‌ను అందుబాటులో ఉంచారు.

* ఐదు కేంద్రాల్లో స్క్రీనింగ్ టెస్ట్..

అభ్యర్థుల సౌకర్యార్థం వరంగల్ పోలీస్ కమిషనరేట్ పరిధిలోని ఐదు ప్రాంతాల్లో స్క్రీనింగ్ టెస్ట్ నిర్వహించనున్నారు.
వరంగల్ : CKM కాలేజీ, దేశాయిపేట
హనుమకొండ : SVS కాలేజీ, రామారం
జనగామ : CJIT ఇంజినీరింగ్ కాలేజీ, యశ్వంత్‌పూర్ క్రాస్ రోడ్
పరకాల : ప్రభుత్వ జూనియర్ కాలేజీ
నర్సంపేట : BITS కాలేజీ, లక్నేపల్లి

ఎస్‌ఐ, కానిస్టేబుల్ ఉద్యోగాల కోసం ప్రిపేర్ అవుతున్న అభ్యర్థులు ఈ అవకాశాన్ని సద్వినియోగం చేసుకోవాలని పోలీస్ కమిషనరేట్ సూచించింది. ఉచిత కోచింగ్ ద్వారా పోటీ పరీక్షలకు మెరుగైన ప్రిపరేషన్ పొందే అవకాశం ఉంటుందని తెలిపింది.

రిజిస్ట్రేషన్ :

అభ్యర్థులు గూగుల్ ఫామ్ ద్వారా తమ వివరాలను నమోదు చేసుకోవాలి. రిజిస్ట్రేషన్‌కు చివరి సమయం సెప్టెంబర్ 19 రాత్రి 8 గంటలు.