Police Martyrs Tributes | అమరవీరుల త్యాగాలు చిరస్మరణీయం

Published: 21 Oct 2026 • 02:46 PM

* విధి నిర్వహణలో ప్రాణాలర్పించిన వీరులకు ఘన నివాళులు

ఆకేరు న్యూస్, హనుమకొండ : దేశ రక్షణతో పాటు ప్రజల ప్రాణాలు, ఆస్తుల పరిరక్షణ కోసం విధి నిర్వహణలో ప్రాణత్యాగం చేసిన పోలీసు అమరవీరుల త్యాగాలు చిరస్మరణీయమని వరంగల్ పోలీస్ కమిషనర్ ఎన్. శ్వేత ఐపీఎస్ అన్నారు. పోలీసు అమరవీరుల సంస్మరణ దినోత్సవం సందర్భంగా బుధవారం హనుమకొండలోని పోలీస్ హెడ్‌క్వార్టర్స్‌లో ఉన్న అమరవీరుల స్తూపం వద్ద పోలీసు అమరవీరులకు ఘనంగా నివాళులర్పించారు.

ఈ కార్యక్రమంలో హనుమకొండ జిల్లా కలెక్టర్ చాహత్ బాజ్‌పాయి, వరంగల్ జిల్లా కలెక్టర్ డాక్టర్ సత్య శారద, వర్ధన్నపేట ఎమ్మెల్యే కేఆర్ నాగరాజు, వరంగల్ పోలీస్ కమిషనర్ ఎన్. శ్వేతతో పాటు అమరవీరుల కుటుంబ సభ్యులు, పోలీసు ఉన్నతాధికారులు పాల్గొన్నారు. దేశం కోసం ప్రాణాలర్పించిన పోలీసుల సేవలను స్మరించుకుంటూ పుష్పాంజలి ఘటించారు.

హాట్ స్ప్రింగ్స్ ఘటనకు గుర్తుగా సంస్మరణ దినోత్సవం

1959 అక్టోబర్ 21న లడఖ్‌లోని హాట్ స్ప్రింగ్స్ ప్రాంతంలో చైనా సైనికుల దాడిలో ప్రాణాలు కోల్పోయిన పది మంది సీఆర్‌పీఎఫ్ సిబ్బంది వీరమరణానికి గుర్తుగా ప్రతి సంవత్సరం పోలీసు అమరవీరుల సంస్మరణ దినోత్సవాన్ని నిర్వహిస్తున్నట్లు కమిషనర్ ఎన్. శ్వేత తెలిపారు.

విధి నిర్వహణలో ప్రాణాలను సైతం లెక్కచేయకుండా ప్రజల రక్షణ కోసం పనిచేసిన పోలీసు అమరవీరుల ధైర్యం, కర్తవ్యనిష్ఠ, అంకితభావం ప్రతి ఒక్కరికీ ఆదర్శమని పేర్కొన్నారు. ప్రజలు ప్రశాంతంగా జీవించేందుకు పోలీసు శాఖ నిరంతరం సేవలందిస్తోందని, శాంతిభద్రతల పరిరక్షణలో పోలీసులు ఎన్నో సవాళ్లను ఎదుర్కొంటూ విధులు నిర్వహిస్తున్నారని తెలిపారు.

నేరాల నియంత్రణలో పోలీసుల కీలక పాత్ర

సమాజంలో శాంతిభద్రతలను కాపాడటంతో పాటు నేరాల నియంత్రణ, మహిళలు, చిన్నారుల భద్రత, రోడ్డు ప్రమాదాల నివారణ, సైబర్ నేరాలపై ప్రజలకు అవగాహన కల్పించడం, మాదకద్రవ్యాల నిర్మూలన వంటి అంశాల్లో పోలీసులు కీలక పాత్ర పోషిస్తున్నారని కమిషనర్ వివరించారు.

అమరవీరుల త్యాగాలను స్ఫూర్తిగా తీసుకుని యువత దేశభక్తి, క్రమశిక్షణ, సేవాభావాన్ని అలవర్చుకోవాలని పిలుపునిచ్చారు. ప్రజల భద్రత, సమాజ శ్రేయస్సు కోసం ప్రతి ఒక్కరూ తమ వంతు బాధ్యతను నిర్వర్తించాలని సూచించారు.

వరంగల్ కమిషనరేట్ పరిధిలో 25 మంది అమరులు

వరంగల్ పోలీస్ కమిషనరేట్ పరిధిలో ఇప్పటివరకు విధి నిర్వహణలో 25 మంది పోలీసు అధికారులు, సిబ్బంది అమరులయ్యారని ఎన్. శ్వేత తెలిపారు. ప్రజల ప్రాణాలు, ఆస్తుల రక్షణతో పాటు శాంతిభద్రతల పరిరక్షణ కోసం వారు చేసిన త్యాగాలను ఎప్పటికీ మరచిపోలేమని అన్నారు. వారి సేవా స్ఫూర్తిని ప్రతి ఒక్కరూ ఆదర్శంగా తీసుకోవాలని పేర్కొన్నారు.

అమరుల కుటుంబాలకు అండగా పోలీసు శాఖ

ఈ సందర్భంగా పోలీసు అమరవీరుల కుటుంబ సభ్యులతో కమిషనర్ ఎన్. శ్వేత ప్రత్యేకంగా మాట్లాడారు. వారి సమస్యలను అడిగి తెలుసుకున్నారు. అమరుల కుటుంబాల సంక్షేమానికి పోలీసు శాఖ కట్టుబడి ఉందని, వారి సమస్యల పరిష్కారం కోసం ప్రభుత్వంతో చర్చించి అవసరమైన చర్యలు తీసుకుంటామని హామీ ఇచ్చారు. అనంతరం అమరవీరుల కుటుంబ సభ్యులకు బహుమతులు అందజేశారు.

దేశ రక్షణ, ప్రజల భద్రత కోసం ప్రాణాలను అర్పించిన పోలీసు అమరవీరులకు అధికారులు, సిబ్బంది ఘనంగా నివాళులర్పించారు. వారి త్యాగాలను స్మరించుకుంటూ ప్రజాసేవలో మరింత నిబద్ధతతో పనిచేయాలని ఈ సందర్భంగా ప్రతిజ్ఞ చేశారు.

పలువురు పోలీసు అధికారులు హాజరు

ఈ కార్యక్రమంలో ఈస్ట్ జోన్ డీసీపీ అంకిత్ కుమార్, అడిషనల్ డీసీపీలు రాయల ప్రభాకర్ రావు, బాలస్వామి, సురేష్, శ్రీనివాస్‌తో పాటు ఏసీపీలు, సీఐలు, ఆర్‌ఐలు, ఎస్‌ఐలు, ఆర్‌ఎస్‌ఐలు, ఇతర పోలీసు అధికారులు, సిబ్బంది, పోలీసు అమరవీరుల కుటుంబ సభ్యులు పాల్గొన్నారు.