AIRINDIA BUS | డ్రైవర్ అప్రమత్తతతో ప్రాణనష్టం తప్పింది

ఆకేరు న్యూస్, హైదరాబాద్:

మహానగరంలో మంగళవారం భారీ ప్రమాదం తృటిలో తప్పింది. హైదరాబాద్ ఔటర్ రింగ్ రోడ్డు (ORR) సమీపంలో ప్రయాణికులతో వెళ్తున్న ఎయిర్ ఇండియా సంస్థకు చెందిన ఒక బస్సులో అకస్మాత్తుగా ఘోర అగ్నిప్రమాదం సంభవించింది. పెద్ద అంబర్‌పేట్ సర్వీస్ రోడ్డు వద్ద చోటుచేసుకున్న ఈ ఘటన స్థానికంగా తీవ్ర కలకలం రేపింది. అదృష్టవశాత్తూ డ్రైవర్ సమయస్ఫూర్తి, ప్రయాణికుల అప్రమత్తత వల్ల ఎటువంటి ప్రాణనష్టం జరగకపోవడంతో అందరూ ఊపిరి పీల్చుకున్నారు.

* నిమిషాల్లోనే మంటలు…

నమ్మదగిన సమాచారం ప్రకారం.. ఎయిర్ ఇండియాకు చెందిన ఈ ప్రత్యేక బస్సు శంషాబాద్ అంతర్జాతీయ విమానాశ్రయం (RGIA) వైపు నుంచి ప్రయాణికులతో పెద్ద అంబర్‌పేట్ వైపు వస్తోంది. బస్సు పెద్ద అంబర్‌పేట్ ఓఆర్ఆర్ సర్వీస్ రోడ్డు సమీపంలోకి రాగానే, ఒక్కసారిగా ఇంజన్ భాగం నుండి దట్టమైన పొగలు రావడం ప్రారంభమైంది. దీనిని గమనించిన బస్సు డ్రైవర్ ఏమాత్రం ఆలస్యం చేయకుండా వాహనాన్ని పక్కకు నిలిపివేశారు.
బస్సు ఆపిన వెంటనే అప్రమత్తమైన డ్రైవర్, క్లీనర్ లోపల ఉన్న ప్రయాణికులను తక్షణమే కిందకు దిగిపోవాల్సిందిగా కేకలు వేశారు. ప్రయాణికులందరూ కంగారుగా బస్సులోంచి కిందకు దిగిన కొద్ది నిమిషాల్లోనే మంటలు బస్సు మొత్తానికి వేగంగా వ్యాపించాయి. చూస్తుండగానే బస్సు పూర్తిగా మంటల ముఠాగా మారిపోయింది.

* రంగంలోకి దిగిన అగ్నిమాపక సిబ్బంది…

స్థానికులు, ప్రయాణికులు ఇచ్చిన సమాచారంతో అగ్నిమాపక నియంత్రణ గది అధికారులు తక్షణమే స్పందించారు. ప్రమాద స్థలానికి ఒక ఫైర్ ఇంజన్‌తో చేరుకున్న సిబ్బంది, రసాయనిక శకటాల సహాయంతో మంటలను అదుపులోకి తెచ్చేందుకు తీవ్రంగా శ్రమించారు. దాదాపు గంటపాటు శ్రమించి మంటలను పూర్తిగా ఆర్పివేశారు. అయితే అప్పటికే బస్సు లోపలి భాగం, సీట్లు పూర్తిగా కాలి బూడిదయ్యాయి.

* ఊపిరి పీల్చుకున్న ప్రయాణికులు.. దర్యాప్తు ప్రారంభం

ప్రమాద సమయంలో బస్సులో ఎంతమంది ప్రయాణికులు ఉన్నారనే దానిపై స్పష్టత రావలసి ఉంది. అయితే సమయానికి డ్రైవర్ అలర్ట్ అవ్వడం వల్ల అందరూ సురక్షితంగా బయటపడ్డారని పోలీసులు తెలిపారు. హైవేపై అకస్మాత్తుగా మంటలు చెలరేగడంతో కాసేపు వాహనాల రాకపోకలకు అంతరాయం ఏర్పడింది. పోలీసులు ట్రాఫిక్‌ను క్రమబద్ధీకరించారు. ఈ అగ్నిప్రమాదానికి షార్ట్ సర్క్యూట్ కారణమా? లేక ఇంజన్ వేడెక్కడం వల్ల (Overheating) జరిగిందా? అనే కోణంలో రవాణా శాఖ అధికారులు, పోలీసులు సంయుక్తంగా దర్యాప్తు ప్రారంభించారు. ప్రయాణికులందరినీ ప్రత్యామ్నాయ వాహనాలలో వారి గమ్యస్థానాలకు చేర్చినట్లు సమాచారం.