CITU Jangaon| అంగన్వాడీలకు కష్టాలు.. ఖాళీల భర్తీకి డిమాండ్!

Published: 01 Nov 2026 • 07:17 PM

* టీచర్లు, ఆయా పోస్టులను వెంటనే భర్తీ చేయాలి

* సీఐటీయూ జిల్లా కార్యదర్శి సుంచు విజేందర్

CITU Jangaon| ఆకేరు న్యూస్, పాలకుర్తి: జనగామ జిల్లాలో అంగన్వాడీ కేంద్రాలు అనేక సమస్యలతో సతమతమవుతున్నాయని సీఐటీయూ జిల్లా కార్యదర్శి సుంచు విజేందర్ ఆవేదన వ్యక్తం చేశారు. జిల్లాలో ఖాళీగా ఉన్న అంగన్వాడీ టీచర్, ఆయా పోస్టులను వెంటనే భర్తీ చేయాలని ప్రభుత్వాన్ని డిమాండ్ చేశారు. అంగన్వాడీ సిబ్బందికి కనీస వసతులు కల్పించకుండా, ఆన్‌లైన్ యాప్‌లు, అధికారుల వేధింపులతో ఇబ్బందులకు గురిచేయడం సరికాదని మండిపడ్డారు. ప్రభుత్వం తక్షణమే స్పందించి సమస్యలను పరిష్కరించకపోతే పెద్దఎత్తున ఆందోళనలు చేపడతామని హెచ్చరించారు.

ఆదివారం పాలకుర్తి మండల కేంద్రంలో పి. భిక్షం అధ్యక్షతన అంగన్వాడీ యూనియన్ జిల్లా కమిటీ సమావేశం నిర్వహించారు. ఈ సమావేశానికి ముఖ్య అతిథిగా హాజరైన సుంచు విజేందర్ మాట్లాడుతూ.. జిల్లా కలెక్టర్, ఐసీడీఎస్ ఆధ్వర్యంలో అమలు చేస్తున్న ఆన్‌లైన్ ‘శిశు మహిళా సమృద్ధి యాప్’లో సాంకేతిక సమస్యలు ఉన్నప్పటికీ వాటిని పరిష్కరించకుండా టీచర్లపై పని ఒత్తిడి పెంచుతున్నారని విమర్శించారు. యాప్ సమస్యల కారణంగా సిబ్బంది తీవ్ర ఇబ్బందులు ఎదుర్కొంటున్నారని తెలిపారు.

సరుకుల సరఫరాలో జాప్యం

గత నెల రోజులుగా అంగన్వాడీ కేంద్రాలకు పప్పులు, గుడ్లు, బాలామృతం వంటి పోషకాహార సరుకులు సకాలంలో సరఫరా కావడం లేదని ఆయన పేర్కొన్నారు. దీంతో గర్భిణులు, బాలింతలు, చిన్నారులకు అందాల్సిన పోషకాహార పంపిణీపై ప్రభావం పడుతోందని ఆందోళన వ్యక్తం చేశారు. సరుకుల సరఫరాలో జాప్యానికి బాధ్యత వహించేది ఎవరని ప్రశ్నించారు.

కనీస వసతులు కరువు

జిల్లాలోని అనేక అంగన్వాడీ కేంద్రాలకు సొంత భవనాలు లేవని, ఉన్న కేంద్రాల్లోనూ కనీస మౌలిక వసతులు అందుబాటులో లేవని తెలిపారు. రికార్డులను భద్రపరిచేందుకు బీరువాలు, ఫర్నిచర్ కూడా లేక సిబ్బంది ఇబ్బందులు పడుతున్నారని అన్నారు. అసంపూర్తిగా నిలిచిపోయిన అంగన్వాడీ భవనాల నిర్మాణాలను వెంటనే పూర్తి చేయాలని డిమాండ్ చేశారు.

బీఎల్ఓ బిల్లులు చెల్లించాలి

రాష్ట్రంలోని ఇతర జిల్లాల్లో బీఎల్ఓ (BLO) విధుల బిల్లులు మంజూరైనప్పటికీ జనగామ జిల్లాలో మాత్రం చెల్లింపులు నిలిచిపోయాయని విజేందర్ ఆరోపించారు. అదేవిధంగా సాయంత్రం నాలుగు గంటల తర్వాత కూడా నివేదికలు తీసుకువచ్చి మండల కేంద్రంలో అందించాలని కొందరు సూపర్వైజర్లు ఒత్తిడి చేస్తున్నారని, దీంతో అంగన్వాడీ టీచర్లు మానసికంగా ఇబ్బందులు ఎదుర్కొంటున్నారని పేర్కొన్నారు.

జిల్లా కలెక్టర్ వెంటనే స్పందించి అంగన్వాడీ సిబ్బంది సమస్యలను పరిష్కరించాలని, ఖాళీ పోస్టులను భర్తీ చేయడంతో పాటు పెండింగ్ బిల్లులు చెల్లించాలని కోరారు.

ఈ సమావేశంలో అంగన్వాడీ యూనియన్ జిల్లా కార్యదర్శి బైరాగోని అంజుమ్, జిల్లా ఉపాధ్యక్షులు కొమ్ము మంగమ్మ, సహాయ కార్యదర్శి ఎరవెల్లి సంతోష, ఉపాధ్యక్షులు వినోద, అమరావతి, జిల్లా కమిటీ సభ్యులు శ్రావణి, విజయలక్ష్మి, లలిత, అరుణ, విమల, నిర్మల, జ్యోతి, శోభారాణి, రజిత, రమ, యాదమ్మ తదితరులు పాల్గొన్నారు.