కులాంతర వివాహ జంటలపై దాడులు
* ప్రేమ పేరుతో మోసం
* కులాంతర వివాహ జంటలపై దాడులు
* బాధితులకు న్యాయం చేయాలని ప్రజాసంఘాల డిమాండ్
ఆకేరు న్యూస్, పాలకుర్తి: తెలంగాణ సాయుధ రైతాంగ పోరాట చరిత్రకు సాక్షిగా నిలిచిన పాలకుర్తి ప్రాంతంలో కుల వివక్ష, దాడుల ఘటనలు చర్చనీయాంశంగా మారుతున్నాయి. ప్రేమ పేరుతో యువతులను మోసం చేస్తున్న ఘటనలు, కులాంతర వివాహాలు చేసుకున్న జంటలపై దాడులు ఆందోళన కలిగిస్తున్నాయి. మరోవైపు బాధితులకు తక్షణ న్యాయం అందించడంలో అధికార యంత్రాంగం నిర్లక్ష్యంగా వ్యవహరిస్తోందని ప్రజాసంఘాలు ఆరోపిస్తున్నాయి.
నాలుగేళ్ల ప్రేమ.. పెళ్లి తర్వాత ముఖం చాటేసి!
మండలంలోని శాతపురం గ్రామంలో వెలుగులోకి వచ్చిన ఘటన స్థానికంగా చర్చనీయాంశమైంది. నాలుగేళ్ల పాటు ప్రేమించి, హైదరాబాద్‌లో రహస్యంగా వివాహం చేసుకున్న యువకుడు.. యువతి గర్భవతి అయిన తర్వాత ఆమెకు దూరమయ్యాడని ఆరోపణలు వస్తున్నాయి. ఫోన్ స్విచ్ఛాఫ్ చేసి అందుబాటులో లేకుండా పోవడంతో బాధితురాలు న్యాయం కోసం భర్త ఇంటి ఎదుట ఆందోళనకు దిగినట్లు తెలుస్తోంది. ఈ ఘటనపై అధికారులు స్పందించి బాధితురాలికి న్యాయం చేయాలని ప్రజాసంఘాలు కోరుతున్నాయి.
గత ఘటనలతో పెరుగుతున్న ఆందోళన
పాలకుర్తి పరిధిలో గతంలో చోటుచేసుకున్న పలు ఘటనలు కుల వివక్ష సమస్య తీవ్రతను మరోసారి తెరపైకి తెస్తున్నాయి. గూడూరులో జరిగిన పరువు హత్య ఘటనతో పాటు చెన్నూరులో దళిత బాలిక, ఆమె తల్లిని చెట్టుకు కట్టేసి కళ్లలో కారం చల్లి దాడి చేసిన ఘటనలు కలకలం రేపాయి. కోతులబాధ, బమ్మెర, మంచుప్పుల గ్రామాల్లో బలహీన వర్గాలపై జరిగినట్లు ఆరోపణలు ఎదుర్కొంటున్న దాడులు కూడా ఆందోళనకు కారణమవుతున్నాయి.
అధికారుల తీరుపై విమర్శలు
బాధితులు పోలీసులను ఆశ్రయించినప్పటికీ సత్వర న్యాయం అందడం లేదని ప్రజాసంఘాలు ఆరోపిస్తున్నాయి. ఫిర్యాదులపై సమగ్ర విచారణ చేపట్టడం, నిందితులపై చట్టపరమైన చర్యలు తీసుకోవడం, బాధితులకు రక్షణ కల్పించడంలో జాప్యం జరుగుతోందని విమర్శిస్తున్నాయి. ముఖ్యంగా కుల, రాజకీయ ఒత్తిళ్ల కారణంగా కేసుల దర్యాప్తు ప్రభావితమవుతోందన్న ఆరోపణలు కూడా వినిపిస్తున్నాయి. అయితే ఈ ఆరోపణలపై సంబంధిత అధికారుల వివరణ వెలువడాల్సి ఉంది.
బాధితురాలికి న్యాయం చేయాలి: సీపీఐ (ఎంఎల్) లిబరేషన్
శాతపురం ఘటనను సీపీఐ (ఎంఎల్) లిబరేషన్ జనగామ జిల్లా కార్యదర్శి గుమ్మడిరాజుల సాంబయ్య తీవ్రంగా ఖండించారు. బాధితురాలికి తక్షణ న్యాయం చేయాలని, ఆమెను మోసం చేసినట్లు ఆరోపణలు ఎదుర్కొంటున్న యువకుడిపై చట్ట ప్రకారం చర్యలు తీసుకోవాలని డిమాండ్ చేశారు.
కుల, రాజకీయ ఒత్తిళ్లకు తలొగ్గకుండా పోలీసులు రాజ్యాంగబద్ధంగా వ్యవహరించాలని కోరారు. కులాంతర వివాహాలు చేసుకున్న జంటలకు రక్షణ కల్పించాలని, కుల వివక్షతో దాడులకు పాల్పడేవారిపై కఠిన చర్యలు తీసుకోవాలని స్పష్టం చేశారు. బాధితులకు న్యాయం జరగకపోతే ప్రజాసంఘాలను కలుపుకుని ఆందోళనలు ఉధృతం చేస్తామని హెచ్చరించారు.
ఇప్పటికైనా స్పందిస్తారా?
పాలకుర్తి ప్రాంతంలో వెలుగుచూస్తున్న కుల వివక్ష, దాడుల ఆరోపణలపై అధికారులు సమగ్ర విచారణ చేపట్టాల్సిన అవసరం ఉందని ప్రజలు కోరుతున్నారు. శాతపురం బాధితురాలికి న్యాయం చేయడంతో పాటు గత ఘటనల్లో బాధితులకు న్యాయం జరిగేలా చర్యలు తీసుకోవాలని డిమాండ్ చేస్తున్నారు. కుల వివక్షకు తావులేకుండా ప్రతి ఒక్కరికీ రాజ్యాంగం కల్పించిన హక్కులు, రక్షణ అందించడంలో యంత్రాంగం ఎలాంటి చర్యలు తీసుకుంటుందో వేచి చూడాలి.
About the Author
Please tell us what is wrong. Your report will be sent to the website team.
