Ashutosh Dixit | భారత వాయుసేన కొత్త చీఫ్ ప్రస్థానం ఇదే

Published: 07 Oct 2026 • 08:26 AM

* అశుతోష్ దీక్షిత్ ఎవరో తెలుసా?

ఆకేరు న్యూస్, న్యూఢిల్లీ : భారత వాయుసేనకు తదుపరి చీఫ్‌గా ఎయిర్ మార్షల్ అశుతోష్ దీక్షిత్ నియమితులయ్యారు. ప్రస్తుతం వైస్ చీఫ్ ఆఫ్ ది ఎయిర్ స్టాఫ్‌గా పనిచేస్తున్న ఆయన.. అక్టోబర్ 31, 2026 మధ్యాహ్నం నుంచి 29వ చీఫ్ ఆఫ్ ది ఎయిర్ స్టాఫ్‌గా, ఎయిర్ చీఫ్ మార్షల్ హోదాలో బాధ్యతలు చేపట్టనున్నారు.

ప్రస్తుత వాయుసేన చీఫ్ ఎయిర్ చీఫ్ మార్షల్ అమర్ ప్రీత్ సింగ్ అదే రోజు పదవీ విరమణ చేయనున్నారు. ఈ విషయాన్ని కేంద్ర రక్షణ మంత్రిత్వ శాఖ అధికారికంగా ప్రకటించింది.

*డిసెంబర్ 9, 1966న జననం..

అశుతోష్ దీక్షిత్ 1966 డిసెంబర్ 9న జన్మించారు. దీక్షిత్ దేశంలోని ప్రతిష్ఠాత్మక సైనిక విద్యా సంస్థల్లో విద్యాభ్యాసం చేశారు. ఆయన నేషనల్ డిఫెన్స్ అకాడమీ (NDA) పూర్వ విద్యార్థి. అలాగే బంగ్లాదేశ్‌లోని డిఫెన్స్ సర్వీసెస్ స్టాఫ్ కాలేజ్లో స్టాఫ్ కోర్సును, న్యూఢిల్లీలోని నేషనల్ డిఫెన్స్ కాలేజ్ (NDC)లో ఉన్నత స్థాయి కోర్సును పూర్తి చేశారు.

*1986లో వాయుసేనలోకి..

అశుతోష్ దీక్షిత్ 1986 డిసెంబర్ 6న భారత వాయుసేన ఫైటర్ స్ట్రీమ్‌లో కమిషన్ పొందారు. అప్పటి నుంచి దాదాపు నాలుగు దశాబ్దాలుగా వాయుసేనలో వివిధ కీలక బాధ్యతలు నిర్వర్తిస్తున్నారు. ఫైటర్ పైలట్‌గా ఆయనకు విస్తృత అనుభవం ఉంది.

మిరాజ్-2000, వివిధ మిగ్‌ విమానాలు, కిరణ్, జాగ్వార్, IL-78, హాక్, తేజస్ తదితర విమానాలను నడిపిన అనుభవం ఆయనకు ఉంది. ఆయన ఎక్స్‌పెరిమెంటల్ టెస్ట్ పైలట్, క్వాలిఫైడ్ ఫ్లయింగ్ ఇన్‌స్ట్రక్టర్ కూడా. ఇప్పటివరకు 3,500 గంటలకు పైగా విమాన ప్రయాణ అనుభవం ఉన్నట్లు రక్షణ మంత్రిత్వ శాఖ పేర్కొంది.

*మిరాజ్-2000 స్క్వాడ్రన్‌కు కమాండర్‌గా..

దీక్షిత్ కెరీర్‌లో మిరాజ్-2000కు ప్రత్యేక స్థానం ఉంది. కమాండింగ్ ఆఫీసర్‌గా ఒక స్క్వాడ్రన్‌ను మిరాజ్-2000 విమానాలతో పునఃసన్నద్ధం చేయడంలో ఆయన కీలకంగా వ్యవహరించారు. అనంతరం పశ్చిమ సెక్టార్‌లోని ఫ్రంట్‌లైన్ ఫైటర్ ఎయిర్‌బేస్‌కు, దక్షిణ సెక్టార్‌లోని ప్రముఖ ఫైటర్ ట్రైనింగ్ బేస్‌కు కమాండ్ చేశారు.

*టెస్ట్ పైలట్‌గా కీలక సేవలు..

ఎయిర్ ఫోర్స్ టెస్ట్ పైలట్స్ స్కూల్‌లో డైరెక్టింగ్ స్టాఫ్‌గా కూడా పనిచేశారు. విమానాల పరీక్షలు, ఆధునికీకరణ, సాంకేతిక సామర్థ్యాల పెంపు వంటి అంశాల్లో ఆయనకు ప్రత్యేక అనుభవం ఉంది.

ఎయిర్ హెడ్‌క్వార్టర్స్‌లో ప్రిన్సిపల్ డైరెక్టర్ ఎయిర్ స్టాఫ్ రిక్వైర్‌మెంట్స్, అసిస్టెంట్ చీఫ్ ఆఫ్ ది ఎయిర్ స్టాఫ్‌ (ప్రాజెక్ట్స్), అసిస్టెంట్ చీఫ్ ఆఫ్ ది ఎయిర్ స్టాఫ్‌ (ప్లాన్స్) వంటి కీలక బాధ్యతలు నిర్వహించారు.

*కీలక ఆపరేషన్లలో భాగస్వామ్యం..

దాదాపు నాలుగు దశాబ్దాల సుదీర్ఘ సేవలో అశుతోష్ దీక్షిత్ పలు ముఖ్యమైన ఆపరేషన్లు, సైనిక విన్యాసాల్లో పాల్గొన్నారు. ఆపరేషన్ సఫేద్ సాగర్, ఆపరేషన్ రక్షక్, కోప్ ఇండియా, ఆపరేషన్ సిందూర్ వంటి కార్యక్రమాల్లో ఆయన అనుభవం ఉంది.

*సెంట్రల్ ఎయిర్ కమాండ్‌కు అధిపతిగా..

2024 సెప్టెంబర్ 1న అశుతోష్ దీక్షిత్ సెంట్రల్ ఎయిర్ కమాండ్ ఎయిర్ ఆఫీసర్ కమాండింగ్-ఇన్-చీఫ్ (AOC-in-C) గా బాధ్యతలు స్వీకరించారు. ఆ సమయంలో 37 ఏళ్లకు పైగా సర్వీస్ అనుభవం ఆయనకు ఉంది.

సెంట్రల్ ఎయిర్ కమాండ్ బాధ్యతల్లో ఉన్న సమయంలో అన్ని పరిస్థితుల్లోనూ వాయుసేన ఆపరేషనల్ రెడీనెస్‌ను బలోపేతం చేయడంపై దృష్టి పెట్టారు.

*చీఫ్ ఆఫ్ ఇంటిగ్రేటెడ్ డిఫెన్స్ స్టాఫ్‌గా..

సెంట్రల్ ఎయిర్ కమాండ్ తర్వాత ఆయన చీఫ్ ఆఫ్ ఇంటిగ్రేటెడ్ డిఫెన్స్ స్టాఫ్ (CISC) గా పనిచేశారు. మూడు సర్వీసుల మధ్య సమన్వయం, జాయింట్‌నెస్‌, ఇంటిగ్రేషన్‌ను బలోపేతం చేయడంలో ఈ బాధ్యత కీలకమైనది. ఆయన హయాంలో జాయింట్ డాక్ట్రిన్లు, ఆర్డర్లు, సమన్వయానికి సంబంధించిన పలు కార్యక్రమాలు ముందుకు వెళ్లాయి.

*వైస్ చీఫ్‌గా.. ఇప్పుడు వాయుసేన చీఫ్‌గా..

2026 జూలై 1న అశుతోష్ దీక్షిత్ వైస్ చీఫ్ ఆఫ్ ది ఎయిర్ స్టాఫ్గా బాధ్యతలు స్వీకరించారు. ఈ హోదాలో వాయుసేన ఆధునీకరణ, ప్రాజెక్టులు, భవిష్యత్ సాంకేతికతలు, ఆపరేషనల్ సామర్థ్యాల వంటి కీలక అంశాల్లో ఆయనకు బాధ్యతలు ఉన్నాయి.

ఇప్పుడు కేంద్ర ప్రభుత్వం ఆయనను భారత వాయుసేన 29వ చీఫ్ ఆఫ్ ది ఎయిర్ స్టాఫ్‌గా నియమించింది. అక్టోబర్ 31న ఎయిర్ చీఫ్ మార్షల్ హోదాలో బాధ్యతలు స్వీకరించనున్నారు.

* దేశ సేవకు గుర్తింపుగా పలు పురస్కారాలు..

అశుతోష్ దీక్షిత్ సుదీర్ఘ సేవలను గుర్తిస్తూ ఆయనకు పలు ప్రతిష్ఠాత్మక సైనిక పురస్కారాలు లభించాయి. 2006లో వాయుసేన మెడల్, 2011లో విశిష్ట సేవా మెడల్, 2023లో అతి విశిష్ట సేవా మెడల్, 2026లో పరమ విశిష్ట సేవా మెడల్ అందుకున్నారు.

*సుదీర్ఘ సైనిక ప్రస్థానం..

ఫైటర్ పైలట్‌గా కెరీర్ ప్రారంభించి, టెస్ట్ పైలట్‌, శిక్షకుడు, స్క్వాడ్రన్ కమాండర్‌, ఎయిర్‌బేస్ కమాండర్‌, ఎయిర్ కమాండ్ అధిపతి, డిప్యూటీ చీఫ్ ఆఫ్ ది ఎయిర్ స్టాఫ్‌, చీఫ్ ఆఫ్ ఇంటిగ్రేటెడ్ డిఫెన్స్ స్టాఫ్‌, వైస్ చీఫ్ ఆఫ్ ది ఎయిర్ స్టాఫ్‌ వంటి కీలక బాధ్యతలను నిర్వహించిన అశుతోష్ దీక్షిత్.. ఇప్పుడు భారత వాయుసేనకు అత్యున్నత నాయకత్వ బాధ్యతలు చేపట్టబోతున్నారు.