Central Government EV Policy | కార్ల కొనుగోలుపై కేంద్రం కొత్త రూల్స్

Published: 11 Nov 2026 • 12:31 PM

* EVలకు రూ.20 లక్షలు
* పెట్రోల్, డీజిల్‌కు రూ.10 లక్షలే

ఆకేరు న్యూస్, డెస్క్ : కేంద్ర ప్రభుత్వ కార్యాలయాల్లో అధికారిక వాహనాల కొనుగోలుకు సంబంధించి ఆర్థిక శాఖ కీలక మార్గదర్శకాలను జారీ చేసింది. ప్రభుత్వ శాఖలు ఇకపై కొత్తగా అధికారిక కార్లను కొనుగోలు చేసేటప్పుడు ఎలక్ట్రిక్ వాహనాలకే (EVs) మొదటి ప్రాధాన్యం ఇవ్వాలని స్పష్టం చేసింది. ఈ మేరకు కేంద్ర ఆర్థిక శాఖ పరిధిలోని వ్యయ విభాగం (Department of Expenditure) నవంబర్ 10న కొత్త ఉత్తర్వులు జారీ చేసింది. ఎలక్ట్రిక్ వాహనాల కొనుగోలు ధర పరిమితిని రూ.10 లక్షల నుంచి రూ.20 లక్షలకు పెంచింది. పెట్రోల్, డీజిల్, హైబ్రిడ్ కార్లకు మాత్రం రూ.10 లక్షల పరిమితిని కొనసాగించింది.

ఈవీల ధర పరిమితి రూ.20 లక్షలు

కొత్త మార్గదర్శకాల ప్రకారం కేంద్ర ప్రభుత్వ మంత్రిత్వ శాఖలు, విభాగాలు కొనుగోలు చేసే అధికారిక కార్లకు నెట్ డీలర్ ప్రైస్ (NDP) పరిమితులను సవరించారు.
– ఎలక్ట్రిక్ వాహనాలు: రూ.20 లక్షలు
– పెట్రోల్ వాహనాలు: రూ.10 లక్షలు
– డీజిల్ వాహనాలు: రూ.10 లక్షలు
– హైబ్రిడ్ వాహనాలు: రూ.10 లక్షలు
గతంలో ఎలక్ట్రిక్ కార్ల కొనుగోలుకు కూడా రూ.10 లక్షల పరిమితి ఉండేది. తాజాగా దీనిని రెట్టింపు చేస్తూ రూ.20 లక్షలకు పెంచారు. దీంతో ప్రభుత్వ కార్యాలయాలు మరింత విస్తృతమైన ఈవీ మోడళ్లను ఎంపిక చేసుకునే అవకాశం ఉంటుంది.

ఈవీలే డిఫాల్ట్ ఎంపిక

ఇకపై ప్రభుత్వ శాఖల్లో ఇప్పటికే వినియోగిస్తున్న పెట్రోల్, డీజిల్ కార్ల కాలపరిమితి ముగిసినప్పుడు లేదా వాటిని తొలగించి కొత్త వాహనాలను కొనుగోలు చేయాల్సి వచ్చినప్పుడు సాధారణంగా ఎలక్ట్రిక్ కార్లనే తీసుకోవాలి. ఈవీలను డిఫాల్ట్, ప్రాధాన్య ఎంపికగా కేంద్రం ప్రకటించింది. అయితే కొన్ని ప్రత్యేక పరిస్థితుల్లో ఎలక్ట్రిక్ వాహనాల వినియోగం సాధ్యం కాదని సంబంధిత శాఖ భావిస్తే, అందుకు సరైన కారణాలను వివరిస్తూ ప్రతిపాదన సమర్పించాలి. సంబంధిత శాఖ కార్యదర్శి ఆమోదం, ఆర్థిక సలహాదారు సమ్మతితో వ్యయ విభాగానికి పంపాలి. అక్కడి నుంచి ప్రత్యేక మినహాయింపు పొందిన తర్వాతే పెట్రోల్ లేదా డీజిల్ వాహనాల కొనుగోలుకు అవకాశం ఉంటుంది.

అద్దె వాహనాల్లోనూ ఈవీలకే ప్రాధాన్యం

ప్రభుత్వ కార్యాలయాలకు అవసరమైన వాహనాలను అద్దెకు తీసుకునే విషయంలోనూ ఎలక్ట్రిక్ వాహనాల వినియోగానికి కేంద్రం ప్రాధాన్యం ఇచ్చింది. ఇప్పటికే అమల్లో ఉన్న ఈవీ అద్దె మార్గదర్శకాలను కొనసాగించాలని స్పష్టం చేసింది. తప్పనిసరి పరిస్థితుల్లోనే ఇతర ఇంధనాలతో నడిచే వాహనాలను అద్దెకు తీసుకోవాలని, అందుకు కూడా ప్రత్యేక అనుమతులు పొందాలని పేర్కొంది.

పర్యావరణ పరిరక్షణే లక్ష్యం

దేశంలో ఎలక్ట్రిక్ వాహనాల వినియోగాన్ని పెంచడం, పెట్రోల్, డీజిల్ వంటి శిలాజ ఇంధనాలపై ఆధారపడటాన్ని తగ్గించడం ఈ నిర్ణయం ప్రధాన ఉద్దేశం. ప్రభుత్వ వాహనాల్లో ఈవీల వినియోగం పెరిగితే కర్బన ఉద్గారాలు, వాయు కాలుష్యాన్ని తగ్గించేందుకు దోహదపడుతుందని కేంద్రం భావిస్తోంది. అంతేకాకుండా ముడిచమురు దిగుమతులపై దేశానికి ఉన్న భారాన్ని తగ్గించేందుకు కూడా ఈ నిర్ణయం ఉపయోగపడనుంది. కేంద్ర ఆర్థిక శాఖ నవంబర్ 10, 2026న జారీ చేసిన ఈ ఉత్తర్వులు తక్షణమే అమల్లోకి వచ్చాయి. అయితే ఇవి కేంద్ర ప్రభుత్వ మంత్రిత్వ శాఖలు, విభాగాల అధికారిక స్టాఫ్ కార్ల కొనుగోలు, అద్దె మార్గదర్శకాలకు సంబంధించినవి.