CM REVANTH REDDY | కేంద్ర మంత్రులను కలిసిన సీఎం

ఆకేరు న్యూస్ న్యూ ఢిల్లీ :

తెలంగాణ పారిశ్రామికాభివృద్ధిని పరుగులు పెట్టించే లక్ష్యంతో ముఖ్యమంత్రి శ్రీ అనుముల రేవంత్ రెడ్డి సరికొత్త ప్రణాళికలను కేంద్రం ముందు ఉంచారు. బుధవారం ఢిల్లీ పర్యటనలో భాగంగా ఆయన కేంద్ర ఉక్కు, భారీ పరిశ్రమల శాఖ మంత్రి శ్రీ హెచ్‌.డి. కుమారస్వామి, ఉక్కు శాఖ సహాయ మంత్రి శ్రీ భూపతిరాజు శ్రీనివాస వర్మలతో భేటీ అయ్యారు. ఈ సందర్భంగా రాష్ట్రంలో భారీ పరిశ్రమల ఏర్పాటు, పర్యావరణ హిత సాంకేతికత వినియోగంపై సుదీర్ఘంగా చర్చించారు.
బయ్యారం కలకు కొత్త రూపం

దశాబ్దాలుగా పెండింగ్‌లో ఉన్న బయ్యారం ఉక్కు పరిశ్రమ అంశాన్ని సీఎం రేవంత్ రెడ్డి ఈ భేటీలో ప్రధానంగా ప్రస్తావించారు. అయితే, దీనిని సంప్రదాయ పద్ధతిలో కాకుండా ‘గ్రీన్ స్టీల్ ప్లాంట్’ గా ఏర్పాటు చేయాలని కోరారు. హైడ్రోజన్ టెక్నాలజీతో నడిచే ఈ ప్లాంట్ వల్ల పర్యావరణానికి మేలు కలుగుతుందని, అదే సమయంలో దేశంలో ఉన్న ఉక్కు కొరతను కూడా అధిగమించవచ్చని సీఎం వివరించారు. దీనివల్ల వెనుకబడిన ప్రాంతాల్లో భారీగా ఉపాధి అవకాశాలు లభిస్తాయని ఆయన పేర్కొన్నారు.

*పారిశ్రామిక హబ్‌గా హైదరాబాద్*

రాష్ట్ర ప్రభుత్వం ప్రతిష్టాత్మకంగా రూపొందించిన #TelanganaRising2047 విజన్ డాక్యుమెంట్‌లోని అంశాలను సీఎం కేంద్ర మంత్రులకు వివరించారు. హైదరాబాద్ భౌగోళిక స్థితిగతులు, మౌలిక సదుపాయాలు పారిశ్రామిక ప్రగతికి ఎంతగానో దోహదపడతాయని తెలిపారు.

*ముఖ్యమైన ప్రతిపాదనలు*

రీసైక్లింగ్ పరిశ్రమ: పాత వాహనాల స్క్రాప్‌తో ఉక్కును పునరుద్ధరించే (Recycling) యూనిట్లను రాష్ట్రంలో ఏర్పాటు చేయాలని కోరారు.

*ఈవీ బ్యాటరీ తయారీ*

ఎలక్ట్రిక్ వాహనాలకు డిమాండ్ పెరుగుతున్న నేపథ్యంలో, బ్యాటరీల తయారీకి హైదరాబాద్‌ను హబ్‌గా మార్చాలని విజ్ఞప్తి చేశారు.

*మెషిన్ టూల్స్ & రోబోటిక్స్ పార్క్:*

ఆధునిక పరికరాల తయారీ కోసం ప్రత్యేకంగా ఒక పార్కును కేటాయించాలని కోరారు.

*రక్షణ రంగం*

ఆటో మరియు రక్షణ రంగాలకు అవసరమైన ఉత్పత్తుల తయారీ కేంద్రాలను తెలంగాణకు కేటాయించాలని విన్నవించారు.

*2034 నాటికి కాలుష్య రహిత నగరం*

హైదరాబాద్‌ను 2034 నాటికి కాలుష్యం లేని నగరంగా తీర్చిదిద్దాలన్నది ప్రభుత్వ సంకల్పమని సీఎం వెల్లడించారు. నగరంలోని వాహనాలను ఈవీలుగా మార్చే ప్రక్రియలో కేంద్రం సహకరించాలని కోరారు. అంతేకాకుండా, అంతర్జాతీయ స్థాయిలో నైపుణ్యం కలిగిన మానవ వనరులను తయారు చేసేందుకు జాతీయ స్థాయి నైపుణ్య శిక్షణ సంస్థలను హైదరాబాద్‌లో ఏర్పాటు చేయాలని విజ్ఞప్తి చేశారు.
ముఖ్యమంత్రి ప్రతిపాదనలపై కేంద్ర మంత్రులు సానుకూలంగా స్పందించినట్లు తెలుస్తోంది. ఈ సమావేశంలో ముఖ్యమంత్రి ప్రిన్సిపల్ సెక్రటరీ శ్రీనివాసరాజు, ప్రాజెక్టుల సమన్వయ ప్రత్యేక కార్యదర్శి అద్వైత్ కుమార్ సింగ్ తదితర అధికారులు పాల్గొన్నారు.