LPG GAS PRICE HIKE | ఒక్కసారిగా రూ.993 పెంపు!

*ఎన్నికలు ముగిశాయో లేదో.. సామాన్యుడిపై ధరల వాత

ఆకేరు న్యూస్, హైదరాబాద్: దేశంలో ఐదు రాష్ట్రాల ఎన్నికల సందడి ముగిసిందో లేదో, అప్పుడే ధరల సెగ మొదలైంది. కేంద్ర ప్రభుత్వం సామాన్యులకు, ముఖ్యంగా వాణిజ్య వర్గాలకు భారీ షాక్ ఇస్తూ కమర్షియల్ గ్యాస్ సిలిండర్ ధరలను భారీగా పెంచింది. చమురు మార్కెటింగ్ కంపెనీలు మే 1వ తేదీ (నేటి) నుంచే ఈ పెంచిన ధరలు అమలులోకి వస్తాయని ప్రకటించాయి. తాజా నిర్ణయంతో హోటల్ యజమానులు, చిరు వ్యాపారుల పరిస్థితి అగమ్యగోచరంగా మారింది.

*ఒక్కసారిగా రూ. 993 పెంపు
సాధారణంగా గ్యాస్ ధరలు పదుల సంఖ్యలో పెరగడం చూస్తుంటాం. కానీ, ఈసారి ఏకంగా 19 కిలోల కమర్షియల్ సిలిండర్ ధరపై రూ. 993 మేర భారాన్ని మోపడం గమనార్హం. అంతర్జాతీయ మార్కెట్‌లో ముడి చమురు ధరల్లో హెచ్చుతగ్గులు, దిగుమతి వ్యయాలు పెరగడమే ఈ భారీ పెంపునకు ప్రధాన కారణమని తెలుస్తోంది.

*మెట్రో నగరాల్లో ధరల పరిస్థితి
ఈ పెంపుతో దేశంలోని ప్రధాన నగరాల్లో కమర్షియల్ సిలిండర్ ధరలు సామాన్యుడికి అందనంత ఎత్తుకు చేరాయి.
హైదరాబాద్: గతంలో ఉన్న ధరలకు అదనంగా పెరిగి ప్రస్తుతం రూ. 3,069 వద్ద ఉంది.
ఢిల్లీ: దేశ రాజధానిలో ఈ ధర రూ. 3,071కి చేరుకుంది.
ముంబై, చెన్నై వంటి నగరాల్లోనూ ఇంచుమించుగా ఇదే స్థాయి ధరలు అమల్లోకి వచ్చాయి.

*డొమెస్టిక్ గ్యాస్ వినియోగదారులకు ఊరట
కమర్షియల్ గ్యాస్ ధరలు ఆకాశాన్ని తాకినప్పటికీ, గృహ అవసరాలకు వాడే (14.2 కిలోల) ఎల్పీజీ సిలిండర్ వినియోగదారులకు కేంద్రం ఊరటనిచ్చింది. ప్రస్తుతానికి డొమెస్టిక్ గ్యాస్ సిలిండర్ ధరల్లో ఎటువంటి మార్పు చేయలేదు. అయితే, కమర్షియల్ గ్యాస్ ధర పెరగడం వల్ల హోటళ్లలో ఆహార పదార్థాల ధరలు పెరిగే అవకాశం ఉందని, ఇది పరోక్షంగా సామాన్యుడి జేబుకు చిల్లు పెడుతుందని విశ్లేషకులు భావిస్తున్నారు.

*ఎన్నికల కోడ్ ముగియగానే షాక్
ఐదు రాష్ట్రాల ఎన్నికల పోలింగ్ ముగిసిన కొన్ని గంటల్లోనే ఈ నిర్ణయం వెలువడటంపై విపక్షాలు తీవ్ర స్థాయిలో విమర్శలు గుప్పిస్తున్నాయి. ఎన్నికలు ఉన్నంత వరకు ధరలను నియంత్రించి, ఓటింగ్ ముగియగానే బాంబు పేల్చడం ఏంటని ప్రజలు సైతం ప్రశ్నిస్తున్నారు.

వేసవి కాలంలో పెళ్లిళ్లు, ఇతర శుభకార్యాలతో పాటు హోటల్ వ్యాపారం పుంజుకుంటున్న తరుణంలో ఈ ‘బిగ్ షాక్’ వ్యాపారుల నడ్డి విరిచినట్లయింది. గ్యాస్ మంట సామాన్యుడిని ఇంకెంత కాలం వేధిస్తుందో చూడాలి.