Rayaparthy | కేవైసీ పేరుతో అమూల్య గ్యాస్ ఏజెన్సీ అక్రమ వసూళ్లు!

Published: 07 Aug 2026 • 11:43 AM

* గ్రామీణ వినియోగదారుల నుంచి రూ. 240 గుంజుతున్న సిబ్బంది

* ఉచిత సేవపై దోపిడీ.. అధికారుల పర్యవేక్షణ కరవు

* చర్యలు తీసుకోవాలని రాయపర్తి మండల ప్రజల డిమాండ్

ఆకేరు న్యూస్,రాయపర్తి:
రాయపర్తి మండల కేంద్రంలోని ‘అమూల్య గ్యాస్ ఏజెన్సీ’ (హెచ్‌పి గ్యాస్ డిస్ట్రిబ్యూటర్స్) నిర్వాహకులు, సిబ్బంది గ్రామీణ ప్రాంత ప్రజల అమాయకత్వాన్ని ఆసరాగా చేసుకుని అక్రమ వసూళ్లకు పాల్పడుతున్నారు. ప్రభుత్వం ఉచితంగా అందిస్తున్న ఈ-కేవైసీ (e-KYC) ప్రక్రియను ఆసరాగా చేసుకుని, తనిఖీ ఛార్జీల పేరుతో ఒక్కొక్కరి నుంచి రూ. 240 చొప్పున వసూలు చేస్తున్నారనే విమర్శలు వెల్లువెత్తుతున్నాయి.

* ఉచిత సేవపై అదనపు భారం

చమురు సంస్థల నిబంధనల ప్రకారం గ్యాస్ కనెక్షన్ కలిగిన వినియోగదారులు బయోమెట్రిక్ ఈ-కేవైసీ పూర్తి చేసుకోవడం పూర్తిగా ఉచితం. దీనికి సంబంధించి ఏజెన్సీకి ఎలాంటి రుసుము చెల్లించాల్సిన అవసరం లేదు. అయితే రాయపర్తి మండలంలోని గ్రామాల్లో అమూల్య గ్యాస్ ఏజెన్సీ సిబ్బంది తనిఖీ ఛార్జీల (Inspection Charges) పేరు చెప్పి, రూ. 240 ఇస్తేనే ఈ-కేవైసీ ప్రక్రియ పూర్తి చేస్తామని వినియోగదారులను మభ్యపెడుతున్నారని స్థానికులు ఆవేదన వ్యక్తం చేస్తున్నారు.

* రసీదులు లేకుండా దోపిడీ..

ఏజెన్సీ డెలివరీ సిబ్బంది మరియు ప్రతినిధులు గ్రామాల్లోకి వచ్చి, “ఈ-కేవైసీ చేసుకోకపోతే గ్యాస్ సిలిండర్ సరఫరా నిలిచిపోతుంది” అని భయభ్రాంతులకు గురిచేస్తూ డబ్బులు గుంజుతున్నారని, ఈ వసూళ్లకు సంబంధించి సరైన రసీదులు కూడా ఇవ్వడం లేదని పలువురు బాధితులు ఆరోపిస్తున్నారు. రెక్కాడితే గానీ డొక్కాడని పేద, గ్రామీణ ప్రజలపై ఈ రకమైన అదనపు భారం మోపడంపై తీవ్ర ఆగ్రహం వ్యక్తమవుతోంది.

* అధికారులు స్పందించాలి..

ఉచితంగా జరగాల్సిన ప్రక్రియను వ్యాపారంగా మార్చుకుని, అక్రమ వసూళ్లకు పాల్పడుతున్న అమూల్య గ్యాస్ ఏజెన్సీపై పౌర సరఫరాల శాఖ (Civil Supplies) అధికారులు, హెచ్‌పి చమురు సంస్థ ఉన్నతాధికారులు తక్షణమే విచారణ జరిపి కఠిన చర్యలు తీసుకోవాలని మండల ప్రజలు డిమాండ్ చేస్తున్నారు. అలాగే అక్రమంగా వసూలు చేసిన సొమ్మును వినియోగదారులకు తిరిగి ఇప్పించాలని కోరుతున్నారు.

* బాధితులు చేయాల్సిన పని

టోల్ ఫ్రీ నంబర్: హెచ్‌పి గ్యాస్ వినియోగదారుల ఫిర్యాదుల కేంద్రం 1800 233 3555 కు కాల్ చేసి ఏజెన్సీపై ఫిర్యాదు చేయవచ్చు.
పౌర సరఫరాల అధికారి (MRO/DT): స్థానిక తహశీల్దార్ లేదా మండల రెవెన్యూ ఆఫీస్‌లోని సివిల్ సప్లైస్ డెప్యూటీ తహశీల్దార్‌కి రాతపూర్వకంగా ఫిర్యాదు అందజేయవచ్చు