Dr Perumandla Ramakrishna | ప్రజాసేవకు గుర్తింపు ఇవ్వండి

Published: 10 Oct 2026 • 02:36 PM Updated: 10 Oct 2026 • 03:05 PM

* గవర్నర్ కోటా ఎమ్మెల్సీ కేటాయించాలి : డీఎస్పీ డిమాండ్

ఆకేరు న్యూస్, ఆత్మకూరు : తెలంగాణ రాష్ట్రంలో వైద్య, సామాజిక, విద్యా రంగాల్లో పునీత సేవలు అందిస్తున్న ప్రముఖ వైద్యాధికారి, విద్యావేత్త, మాదిగ హక్కుల దండోరా రాష్ట్ర గౌరవ అధ్యక్షుడు మరియు సీనియర్ కాంగ్రెస్ నాయకులు డాక్టర్ పెరుమాండ్ల రామకృష్ణకు గవర్నర్ కోటాలో శాసనమండలి సభ్యుడిగా (ఎమ్మెల్సీ) అవకాశం కల్పించాలని ధర్మ సమాజ్ పార్టీ (డీఎస్పీ) ఆత్మకూరు మండల అధ్యక్షుడు బాగాజీ రజినీకాంత్ డిమాండ్ చేశారు.

శుక్రవారం ఆత్మకూరు మండల కేంద్రంలో నిర్వహించిన విలేకరుల సమావేశంలో ఆయన మాట్లాడుతూ — డాక్టర్ పెరుమాండ్ల రామకృష్ణ గారు గత ఇరవై ఏళ్లుగా పేద, బడుగు, బలహీన వర్గాల ప్రజలకు నిరంతరం ఉచిత వైద్య సేవలందిస్తూ, వెనుకబడిన నిరుపేద విద్యార్థుల ఉన్నత చదువులకు అండగా నిలుస్తున్నారని కొనియాడారు. సామాజిక సమత, రాజ్యాంగ పరిరక్షణే శ్వాసగా ఆయన క్షేత్రస్థాయిలో విశేష కృషి చేస్తున్నారని తెలిపారు.

రాజ్యాంగ స్పూర్తి ప్రకారం గవర్నర్ కోటా ఎమ్మెల్సీ స్థానాలను విద్య, వైద్యం, సాహిత్యం, సమాజసేవ వంటి రంగాలలో అసమాన ప్రతిభ చూపిన ప్రముఖులకు కేటాయించాల్సి ఉంటుందని, సదరు విశిష్ట అర్హతలన్నీ డాక్టర్ రామకృష్ణకు పుష్కలంగా ఉన్నాయని రజినీకాంత్ స్పష్టం చేశారు. బహుజన వర్గాలకు అండగా నిలిచే ఇటువంటి నిస్వార్థ ప్రజాసేవకుడికి చట్టసభల్లో స్థానం కల్పించడం సముచితమని అభిప్రాయపడ్డారు.

ఈ విషయమై రాష్ట్ర ముఖ్యమంత్రి అనుముల రేవంత్ రెడ్డి, గౌరవనీయ గవర్నర్ తక్షణమే సానుకూలంగా స్పందించి డాక్టర్ పెరుమాండ్ల రామకృష్ణను గవర్నర్ కోటా కింద ఎమ్మెల్సీగా నియమించి తగిన గౌరవం అందించాలని ఆకేర్ న్యూస్ వేదికగా విజ్ఞప్తి చేశారు. ఈ కార్యక్రమంలో ధర్మ సమాజ్ పార్టీ ప్రతినిధులు, స్థానిక నాయకులు, కార్యకర్తలు పాల్గొన్నారు.