తరుణ్ భాస్కర్, విశ్వక్ సేన్
* ఫ్యామిలీతో వచ్చి ఎంజాయ్ చేయండి – తరుణ్ భాస్కర్
* తరుణ్ ప్రాణం పెట్టి సినిమా చేశారు..
* నవ్విస్తూనే భావోద్వేగానికి గురిచేస్తుంది – హీరో విశ్వక్ సేన్
ENE 2 Repeat| ఆకేరు న్యూస్, సినిమా: ‘ఈ నగరానికి ఏమైంది’.. తెలుగు ప్రేక్షకుల్లో ప్రత్యేక గుర్తింపు తెచ్చుకున్న కల్ట్ మూవీ. ఆ సినిమాలోని స్నేహితుల గ్యాంగ్ మరోసారి ప్రేక్షకులను అలరించేందుకు సిద్ధమైంది. ఈ చిత్రానికి సీక్వెల్‌గా తెరకెక్కిన ‘ఈఎన్ఈ రిపీట్’ ట్రైలర్‌ను చిత్రబృందం తాజాగా విడుదల చేసింది. తరుణ్ భాస్కర్ ధాస్యం రచన, దర్శకత్వం వహించిన ఈ సినిమాలో విశ్వక్ సేన్, అభినవ్ గోమఠం, వెంకటేష్ కాకుమాను, శ్రీనాథ్ మాగంటి మరోసారి కలిసి నటిస్తున్నారు. నవంబర్ 19న ఈ సినిమా ప్రపంచవ్యాప్తంగా థియేటర్లలో విడుదల కానుంది.
ఎస్ ఒరిజినల్స్, రూట్‌నోడ్ సినిమా బ్యానర్లపై సృజన్ యరబోలు, సందీప్ నాగిరెడ్డి ఈ చిత్రాన్ని నిర్మిస్తున్నారు. ఒరిజినల్ సినిమాలోని స్నేహితుల గ్యాంగ్ తిరిగి తెరపై కనిపించనుండటంతో అభిమానుల్లో ఈ సినిమాపై ఆసక్తి నెలకొంది.
* వైల్డ్ సర్వైవల్ ఫిల్మ్ కోసం స్నేహితుల ప్రయాణం
మొదటి పార్ట్ ఎక్కడ ముగిసిందో అక్కడి నుంచే ‘ఈఎన్ఈ రిపీట్’ కథ ప్రారంభమవుతుంది. వివేక్ తన స్నేహితులతో కలిసి ఓ వైల్డ్ సర్వైవల్ ఫిల్మ్ తీయడానికి బయలుదేరతాడు. ఈ ప్రయాణంలో వారికి ఎదురయ్యే విచిత్రమైన సంఘటనలు, గందరగోళాలు, అనూహ్య మలుపులతో కథ సాగుతుంది. ఫన్, మ్యాడ్‌నెస్, థ్రిల్స్‌తో కూడిన ఈ ప్రయాణాన్ని ట్రైలర్‌లో ఆసక్తికరంగా చూపించారు. విశ్వక్ సేన్ వివేక్‌గా, అభినవ్ గోమఠం కౌశిక్‌గా, వెంకటేష్ కాకుమాను ఉప్పుగా, శ్రీనాథ్ మాగంటి కార్తీక్‌గా కనిపించనున్నారు. ఈ గ్యాంగ్‌తో పాటు అనీషా అంబ్రోస్ కూడా ట్రైలర్‌లో కనిపించారు. కొత్తగా శివాత్మిక రాజశేఖర్, ప్రియదర్శిని రామ్ ఈ సీక్వెల్‌లో చేరారు.
* ఫ్యామిలీతో కలిసి థియేటర్లకు రండి – తరుణ్ భాస్కర్
ట్రైలర్ లాంచ్ కార్యక్రమంలో దర్శకుడు తరుణ్ భాస్కర్ మాట్లాడుతూ.. ‘పెళ్లి చూపులు విజయం తర్వాత ఎలాంటి సినిమా చేయాలని ఆలోచిస్తున్న సమయంలో నా చుట్టూ ఎప్పుడూ నలుగురు స్నేహితులు ఉండేవారు. అలాంటి స్నేహం గురించి సినిమా చేయాలనే ఆలోచనతోనే ‘ఈ నగరానికి ఏమైంది’ రూపొందించాను. ఇప్పుడు సీక్వెల్ చేస్తున్నప్పుడు కూడా మా ముందున్న అసలైన పోటీ ప్రేక్షకుల అంచనాలే. ఈ సినిమాకు ఎలాంటి ట్రైలర్ ఇవ్వాలా అని ఆలోచించి, మొదటి సినిమాకు ఒక ఎపిక్ వెర్షన్‌లా ఉండేలా దీన్ని రూపొందించాం.
చాలా పాజిటివ్ ఎనర్జీతో ఈ సినిమా చేశాం. ఆ ఎనర్జీ ప్రేక్షకులకు కూడా చేరుతుంది. ఎక్కడికి వెళ్లినా ‘ఈ నగరానికి ఏమైంది 2 ఎప్పుడు వస్తుంది?’ అని అడుగుతున్నారు. మీ అందరి ప్రేమను తిరిగి ఇవ్వడానికి ఈ సినిమాతో వస్తున్నాం. సినిమా మీద చాలా కాన్ఫిడెంట్‌గా ఉన్నాను. మీరందరూ ఫ్యామిలీతో కలిసి హ్యాపీగా థియేటర్లకు వచ్చి ఎంజాయ్ చేస్తారు’ అన్నారు.
* నవ్విస్తాం.. భావోద్వేగానికి గురిచేస్తాం – విశ్వక్ సేన్
హీరో విశ్వక్ సేన్ మాట్లాడుతూ.. ‘ఈ ట్రైలర్ చూసినప్పుడు నిజంగా అద్భుతంగా అనిపించింది. నవంబర్ 19న విడుదలవుతున్న ఈ సినిమాను ప్రపంచవ్యాప్తంగా ప్రేక్షకుల ముందుకు తీసుకెళ్తున్నాం. తరుణ్ భాస్కర్ ఈ సినిమా కోసం ప్రాణం పెట్టి పనిచేశారు. ప్రేక్షకులను దృష్టిలో పెట్టుకుని రూపొందించారు. మీరందరూ నవ్వుతారు, ఆనందంతో కన్నీళ్లు పెట్టుకుంటారు. సినిమాలో చాలా ఆసక్తికరమైన విషయాలు జరుగుతాయి. మీ అందరి ప్రేమకు కృతజ్ఞతలు’ అన్నారు.
* ప్రేక్షకుల అంచనాలకు తగ్గ సినిమా – అభినవ్ గోమఠం
అభినవ్ గోమఠం మాట్లాడుతూ.. ‘ఈ నగరానికి ఏమైంది విడుదలైనప్పుడు నాకు పెద్దగా గుర్తింపు లేదు. ఆ సినిమా తర్వాత ప్రేక్షకులు నన్ను ఎంతో అభిమానించారు. ఆ ప్రేమకు ధన్యవాదాలు. మొదటి సినిమాను ఇష్టపడిన అభిమానులను మరోసారి మెప్పించడం అంత సులభం కాదు. తరుణ్ అద్భుతమైన కథ రాశారు. చాలా నిజాయితీగా తెరకెక్కించారు. ప్రేక్షకుల ఎదురుచూపులకు తగ్గ సినిమా వస్తోంది’ అన్నారు.
శ్రీనాథ్ మాగంటి మాట్లాడుతూ.. ట్రైలర్ చూసిన తర్వాత గూస్‌బంప్స్ వచ్చాయని, ఈ సినిమాలో భాగం కావడానికి ఎనిమిదేళ్లు పట్టిందని తెలిపారు. ఇది మంచి ఫన్ రైడ్‌గా ఉంటుందని చెప్పారు. వెంకటేష్ కాకుమాను కూడా మొదటి సినిమాకు ప్రేక్షకులు చూపిన ప్రేమను ఈ సీక్వెల్‌కు కూడా అందించాలని కోరారు.
* కొత్త పాత్రలతో మరింత ఆసక్తి
నటి అనీషా మాట్లాడుతూ.. ‘ఈ నగరానికి ఏమైంది’ సినిమా ప్రేక్షకుల్లో ఒక ప్రత్యేకమైన భావోద్వేగాన్ని కలిగించిందని, రెండో భాగం కూడా మంచి అనుభూతిని అందిస్తుందని ఆశాభావం వ్యక్తం చేశారు. శివాత్మిక రాజశేఖర్ మాట్లాడుతూ తరుణ్ భాస్కర్‌కు తాను అభిమానినని, ఈ సినిమాలో భాగం కావడం సంతోషంగా ఉందని తెలిపారు.
నిర్మాత సృజన్ యరబోలు మాట్లాడుతూ.. ప్రేక్షకులు స్నేహితులతో కలిసి థియేటర్లకు వచ్చి సినిమాను ఎంజాయ్ చేస్తారని, ఆ తర్వాత తమ తల్లిదండ్రులను కూడా సినిమా చూసేందుకు తీసుకొస్తారని ఆశిస్తున్నట్లు చెప్పారు. ఈ చిత్రం తరుణ్ భాస్కర్ స్నేహానికి రాసిన ప్రేమలేఖ లాంటిదని అభివర్ణించారు.
* సాంకేతికంగా..
ఈ చిత్రానికి ఏజే ఆరోన్ సినిమాటోగ్రఫీ అందిస్తున్నారు. వివేక్ సాగర్ సంగీతం సమకూరుస్తున్నారు. ఆయన అందించిన ఎనర్జిటిక్ బ్యాక్‌గ్రౌండ్ స్కోర్ ట్రైలర్‌లో ప్రత్యేక ఆకర్షణగా నిలిచింది. మొత్తంగా ‘ఈఎన్ఈ రిపీట్’ ఒరిజినల్ సినిమాలోని స్నేహం, కామెడీని కొనసాగిస్తూనే కొత్త పాత్రలు, కొత్త సంఘటనలతో ప్రేక్షకులను అలరించేందుకు సిద్ధమవుతోంది. నవంబర్ 19న ఈ సినిమా థియేటర్లలో విడుదల కానుంది.
About the Author
Please tell us what is wrong. Your report will be sent to the website team.
