Ganesh Immersion Arrangements
* చిన్నవడ్డేపల్లి చెరువును పరిశీలించిన కమిషనర్
* భక్తులకు ఇబ్బందులు లేకుండా చర్యలు
* పారిశుద్ధ్యంపై అధికారులు ప్రత్యేక దృష్టి
ఆకేరు న్యూస్, హన్మకొండ : గ్రేటర్ వరంగల్ మున్సిపల్ కార్పొరేషన్ (GWMC) పరిధిలో నిర్వహించే గణేష్ నిమజ్జన వేడుకలు సజావుగా, ప్రశాంత వాతావరణంలో జరిగేలా ప్రణాళికాబద్ధంగా పకడ్బందీ ఏర్పాట్లు చేయాలని కమిషనర్ టి. వెంకన్న అధికారులను ఆదేశించారు. బుధవారం ఆయన నగరంలోని ప్రముఖ నిమజ్జన ప్రాంతమైన చిన్నవడ్డేపల్లి చెరువును స్వయంగా సందర్శించి, క్షేత్రస్థాయిలో జరుగుతున్న ఇంజినీరింగ్, పారిశుద్ధ్య, రహదారి విస్తరణ పనులను సుదీర్ఘంగా పరిశీలించారు.
* భక్తుల సౌకర్యాలే ప్రాధాన్యం..
వరంగల్ నగరంతో పాటు పరిసర ప్రాంతాల నుంచి గణేష్ విగ్రహాలు అత్యధిక సంఖ్యలో తరలివచ్చే అవకాశం ఉందని, భక్తులకు ఎలాంటి అసౌకర్యం కలగకుండా అంతరాయం లేని ఏర్పాట్లు పూర్తి చేయాలని కమిషనర్ సూచించారు.
శాఖల సమన్వయం : ఇరిగేషన్, జిడబ్ల్యూఎంసి, ఆర్అండ్బి (R&B), విద్యుత్ మరియు పోలీసు శాఖలు సంయుక్తంగా సమన్వయంతో పనిచేయాలి.
గుర్రపుడెక్క తొలగింపు : ఇటీవల కురిసిన వర్షాల కారణంగా చెరువులోకి భారీగా కొట్టుకొచ్చిన గుర్రపుడెక్కను యంత్రాల ద్వారా తక్షణమే పూర్తిగా తొలగించాలి. నిమజ్జన ఘాట్ల వద్ద నిరంతర పారిశుద్ధ్య పర్యవేక్షణ, సరిపడా వెలుతురు కోసం తాత్కాలిక హైమాస్ట్ లైటింగ్, రహదారుల మరమ్మతులు వేగవంతం చేయాలి.
* దేశాయిపేటలో పారిశుద్ధ్య తనిఖీలు..
అనంతరం 12వ డివిజన్ పరిధిలోని దేశాయిపేట ప్రాంతంలో కమిషనర్ వెంకన్న విస్తృత తనిఖీలు చేపట్టారు. ప్రధాన రహదారులు, వీధులు, డివైడర్ల పారిశుద్ధ్య పరిస్థితిని పరిశీలించారు. ప్రతి ఇల్లు తిరిగి తడి, పొడి చెత్తను వేర్వేరుగా మాత్రమే సేకరించాలని, పారిశుద్ధ్య సేకరణలో ఎలాంటి జాప్యం ఉండకూడదని స్పష్టం చేశారు.
మెకానికల్ స్వీపింగ్ మిషన్ల ద్వారా ప్రధాన రహదారులను, డివైడర్లను క్రమం తప్పకుండా శుభ్రం చేయాలని ఆదేశించారు. నగర సౌందర్యానికి విఘాతం కలిగిస్తూ ఏర్పాటు చేసే అనధికార బిల్బోర్డులు, ఫ్లెక్సీలు, అడ్వర్టైజింగ్ బోర్డులను వెంటనే తొలగించాలని జవాన్లు, శానిటరీ ఇన్స్పెక్టర్లను ఆదేశించారు.
విధుల్లో నిర్లక్ష్యం వహించే సిబ్బందిపై కఠిన చర్యలు ఉంటాయని కమిషనర్ హెచ్చరించారు. ఈ కార్యక్రమంలో సీఎంహెచ్ఓ డాక్టర్ రాజారెడ్డి, ఎంహెచ్ఓ డాక్టర్ రాజేష్, శానిటరీ ఇన్స్పెక్టర్ ప్రశాంత్, సూపర్వైజర్ గోల్కొండ శ్రీను తదితర అధికారులు పాల్గొన్నారు.
About the Author
Please tell us what is wrong. Your report will be sent to the website team.
