Energy Efficiency Summit | పొదుపు విద్యుత్ అత్యంత చౌకైనది

Published: 16 Sep 2026 • 11:08 AM

* హైదరాబాద్‌లో ఎనర్జీ ఎఫిషియెన్సీ సమ్మిట్
* విద్యుత్ వృథాను అరికట్టాలి- భట్టి
* తెలంగాణలో పెరగనున్న విద్యుత్ డిమాండ్

ఆకేరు న్యూస్, హైదరాబాద్ : హైదరాబాద్‌లోని నోవాటెల్ వేదికగా ఏర్పాటు చేసిన ప్రతిష్టాత్మక 25వ ఎనర్జీ ఎఫిషియెన్సీ సమ్మిట్ ప్రారంభోత్సవంలో రాష్ట్ర డిప్యూటీ సీఎం, ఇంధన శాఖ మంత్రి మల్లు భట్టి విక్రమార్క ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ, మారుతున్న కాలానికి అనుగుణంగా విద్యుత్ నిర్వహణలో విప్లవాత్మక మార్పులు తీసుకురావాల్సిన అవసరం ఉందని స్పష్టం చేశారు.

*పొదుపు చేసే విద్యుత్ యూనిటే అత్యంత చౌకైనది..

కేవలం విద్యుత్ ఉత్పత్తి సామర్థ్యాన్ని పెంచడంపైనే కాకుండా, అందుబాటులో ఉన్న విద్యుత్‌ను సమర్థవంతంగా పొదుపు చేయడంపై కూడా సమాంతరంగా దృష్టి సారించాలని డిప్యూటీ సీఎం పిలుపునిచ్చారు. “అవసరం లేకుండా వృథా కాకుండా పొదుపు చేసే ప్రతీ విద్యుత్ యూనిట్.. కొత్తగా ఉత్పత్తి చేసే యూనిట్ కంటే చౌకైనది” అని ఆయన ఉద్ఘాటించారు. ఇంధన సామర్థ్యాన్ని కేవలం సాంకేతిక అంశంగా కాకుండా, రాష్ట్ర ఆర్థిక పోటీతత్వాన్ని పెంపొందించే ఒక బలమైన వ్యూహంగా చూడాలని సూచించారు.

*పెరుగుతున్న విద్యుత్ డిమాండ్..

రాష్ట్రంలో పారిశ్రామిక వేగవంతమైన పురోగతి, గ్లోబల్ డేటా సెంటర్లు, లైఫ్ సైన్సెస్ రంగాలు వేగంగా విస్తరిస్తున్న నేపథ్యంలో తెలంగాణలో రాబోయే రోజుల్లో విద్యుత్ డిమాండ్ ఊహించని రీతిలో పెరగనుందని తెలిపారు. ఈ డిమాండ్‌ను తట్టుకోవాలంటే స్మార్ట్ ఎనర్జీ మేనేజ్‌మెంట్ సిస్టమ్స్, అధునాతన శీతలీకరణ (Cooling Systems) వ్యవస్థలు మరియు నాణ్యమైన ఎలక్ట్రిక్ మోటార్లను వినియోగంలోకి తీసుకురావడం అత్యంత అవసరమని పేర్కొన్నారు.

*నూతన సాంకేతికతల విస్తరణ..

పరిశ్రమలు మరియు వాణిజ్య సంస్థల్లో ఇప్పటికే విజయవంతమైన ఇంధన సామర్థ్య (Energy Efficiency) సాంకేతికతలను మిగతా అన్ని రంగాలకు వేగంగా విస్తరించాలని కోరారు. ఆధునిక గ్రిడ్ టెక్నాలజీ ద్వారా విద్యుత్ సరఫరాలో జరిగే నష్టాలను (T&D Losses) మరియు వృథాను అరికట్టవచ్చని డిప్యూటీ సీఎం స్పష్టం చేశారు. ఈ సమ్మిట్‌లో పలువురు ఇంధన రంగానికి చెందిన నిపుణులు, పారిశ్రామికవేత్తలు మరియు ఉన్నతాధికారులు పాల్గొన్నారు.