iPhone 18 Pro Max | ధర ఎంతో తెలుసా?

Published: 10 Sep 2026 • 07:19 PM Updated: 10 Sep 2026 • 07:37 PM

* 48MP కెమెరా, A20 ప్రో చిప్, 45 గంటల బ్యాటరీ..

* భారత్‌లో ప్రారంభ ధర రూ.1.79 లక్షలు

ఆకేరు న్యూస్, డెస్క్: ఐఫోన్ ప్రియులు ఎప్పుడెప్పుడా అని ఎదురుచూస్తున్న ఐఫోన్ 18 ప్రో మ్యాక్స్ మార్కెట్‌లోకి వచ్చేసింది. యాపిల్ ఈ ఫ్లాగ్‌షిప్ ఫోన్‌లో కెమెరా, పనితీరు, బ్యాటరీ, ఏఐ ఫీచర్లపై ప్రధానంగా ఫోకస్ చేసింది. ముఖ్యంగా ఐఫోన్‌లో తొలిసారిగా వేరియబుల్ ఎపర్చర్ కెమెరాను తీసుకురావడం ఆసక్తికరంగా మారింది.

* 48MP కెమెరాతో కొత్త అనుభూతి

ఐఫోన్ 18 ప్రో మ్యాక్స్‌లో 48MP ఫ్యూజన్ మెయిన్ కెమెరా ఉంది. వేరియబుల్ ఎపర్చర్ టెక్నాలజీతో వెలుతురు, డెప్త్ ఆఫ్ ఫీల్డ్‌కు అనుగుణంగా ఎపర్చర్ ఆటోమేటిక్‌గా మారుతుంది. తక్కువ వెలుతురులోనూ మెరుగైన ఫొటోలు తీయడానికి ఇది ఉపయోగపడుతుంది. ప్రో యూజర్లు నాలుగు ఎపర్చర్ సెట్టింగ్స్‌ను మాన్యువల్‌గా మార్చుకునే అవకాశం కూడా ఉంది.

* ఫొటో జర్నలిస్టులకు ఉపయోగపడే ఫీచర్

ఫొటోలో మార్పులు చేశారా లేదా గుర్తించేందుకు యాపిల్ రిఫరెన్స్ ఇమేజ్ ఫీచర్‌ను తీసుకొచ్చింది. ఒరిజినల్ ఇమేజ్‌తో పోల్చి ఎడిటింగ్ జరిగిందో లేదో గుర్తించేందుకు ఇది ఉపయోగపడుతుంది. ఏఐతో క్రియేట్ లేదా ఎడిట్ చేసిన ఇమేజెస్‌ను గుర్తించేందుకు SynthID సపోర్ట్ కూడా ఉంది.

* A20 ప్రో చిప్‌తో పవర్‌ఫుల్ పెర్ఫార్మెన్స్

ఐఫోన్ 18 ప్రో మ్యాక్స్‌లో 2-నానోమీటర్ టెక్నాలజీతో రూపొందించిన A20 ప్రో చిప్‌సెట్‌ను ఉపయోగించారు. A19 ప్రోతో పోలిస్తే 50 శాతం ఎక్కువ మెమరీ బ్యాండ్‌విడ్త్ ఉందని సమాచారం. గేమింగ్, హెవీ టాస్క్‌ల సమయంలో వేడిని నియంత్రించేందుకు వేపర్ ఛాంబర్ కూలింగ్ సిస్టమ్‌ను కూడా అప్‌గ్రేడ్ చేశారు.

* 45 గంటల బ్యాటరీ లైఫ్

బ్యాటరీ విషయంలోనూ యాపిల్ భారీ అప్‌గ్రేడ్ చేసింది. eSIM-ఓన్లీ మోడల్స్ 45 గంటల వరకు వీడియో ప్లేబ్యాక్ అందిస్తాయి. కేవలం 5 నిమిషాల వైర్డ్ ఛార్జింగ్‌తో 7 గంటల వీడియో ప్లేబ్యాక్ పొందవచ్చని కంపెనీ పేర్కొంది. ఫోన్ iOS 27తో పనిచేస్తుంది. కొత్త ఆపిల్ ఇంటెలిజెన్స్, అప్‌గ్రేడెడ్ సిరి ఏఐ ఫీచర్లు ఇందులో ఉన్నాయి.

* భారత్‌లో ధర ఎంత?

ఐఫోన్ 18 ప్రో మ్యాక్స్ 256GB, 512GB, 1TB, 2TB స్టోరేజ్ వేరియంట్లలో లభిస్తుంది. భారత్‌లో ధరలు ఇలా ఉన్నాయి:

256GB: రూ.1,79,900

512GB: రూ.2,04,900

1TB: రూ.2,54,900

2TB: రూ.3,29,900

భారత్ సహా 65కు పైగా దేశాల్లో సెప్టెంబర్ 12 నుంచి ప్రీ-ఆర్డర్లు ప్రారంభమై, సెప్టెంబర్ 18 నుంచి విక్రయాలు ప్రారంభమవుతాయని సమాచారం.

* అమెరికాతో పోలిస్తే భారత్‌లో ధర ఎక్కువ

256GB ఐఫోన్ 18 ప్రో మ్యాక్స్ అమెరికాలో 1,299 డాలర్ల నుంచి ప్రారంభమవుతుండగా, భారత్‌లో అదే వేరియంట్ రూ.1,79,900గా ఉంది. ప్రస్తుత మారకపు లెక్కల ప్రకారం అమెరికా ధర సుమారు రూ.1.24 లక్షలకు సమానం. అంటే కనిపించే ప్రారంభ ధరలోనే భారత్, అమెరికా మధ్య గణనీయమైన వ్యత్యాసం ఉంది. అయితే అమెరికా ధరల్లో రాష్ట్ర, స్థానిక సేల్స్ ట్యాక్స్‌లు కలిపి ఉండవు.

ఐఫోన్ 18 ప్రో మ్యాక్స్‌లో కొత్త కెమెరా టెక్నాలజీ, A20 ప్రో చిప్, ఏఐ ఫీచర్లు, భారీ బ్యాటరీ లైఫ్ వంటి అప్‌గ్రేడ్స్‌ను యాపిల్ అందించింది. అయితే రూ.1.79 లక్షల ప్రారంభ ధరతో ఇది ప్రీమియం సెగ్మెంట్‌లోనే కొనసాగుతోంది.

అధికారిక వెబ్‌సైట్ : https://www.apple.com/in/iphone-18-pro/