Jani Master Dancers Association
ఆకేరు న్యూస్, హైదరాబాద్ : తెలుగు ఫిలిం అండ్ టీవీ డ్యాన్సర్స్ అండ్ డ్యాన్స్ డైరెక్టర్స్ అసోసియేషన్లో ఇటీవల చోటుచేసుకున్న పరిణామాలు టాలీవుడ్లో తీవ్ర చర్చకు దారితీశాయి. అసోసియేషన్ సమావేశానికి సంబంధించిన వీడియోలు సోషల్ మీడియాలో వైరల్ కావడంతో ప్రముఖ కొరియోగ్రాఫర్లు జానీ మాస్టర్, శేఖర్ మాస్టర్ మధ్య విభేదాలు తలెత్తాయనే ప్రచారం జరిగింది. ఈ నేపథ్యంలో జానీ మాస్టర్ మీడియా సమావేశంలో స్పందిస్తూ తమ మధ్య ఎలాంటి వ్యక్తిగత గొడవలు లేవని స్పష్టం చేశారు.సమావేశంలో జరిగిన వాగ్వాదానికి సంబంధించిన కొన్ని వీడియోలు మాత్రమే బయటకు రావడంతో తనకు, శేఖర్ మాస్టర్కు మధ్య గొడవ జరిగినట్లు ప్రచారం జరిగిందన్నారు.
* చిరంజీవి జోక్యంతో
వైరల్ అయిన వీడియోలు చూసిన అనంతరం మెగాస్టార్ చిరంజీవి తనను, శేఖర్ మాస్టర్ను మాట్లాడించారని జానీ మాస్టర్ వెల్లడించారు. ఇద్దరితో కలిసి మాట్లాడి సమస్యను పెద్దది చేయకుండా పరిష్కరించుకోవాలని సూచించారని తెలిపారు. చిరంజీవితో కలిసి భోజనం చేశామని, తమ మధ్య వ్యక్తిగత విభేదాలు లేవని ఆయన చెప్పారు.
* అసలు వివాదం ఎక్కడ మొదలైంది?
అసోసియేషన్ కార్యవర్గంలోని కొందరు సభ్యుల రాజీనామాలు, వారి స్థానాల్లో ఎన్నికలు నిర్వహించే అంశం వివాదానికి కేంద్రంగా మారింది. అసోసియేషన్ అధ్యక్షురాలు సుమలత ఏకపక్షంగా నిర్ణయాలు తీసుకుంటున్నారంటూ కొందరు సభ్యులు అభ్యంతరాలు వ్యక్తం చేయగా, సుమలత మాత్రం జనరల్ బాడీలో మెజారిటీ సభ్యుల అభిప్రాయంతోనే నిర్ణయాలు తీసుకున్నామని వెల్లడించారు.
* ఫెడరేషన్తోనూ వివాదం.. ఆపై సర్దుబాటు
అసోసియేషన్ వివాదం తర్వాత జానీ మాస్టర్ చేసిన కొన్ని వ్యాఖ్యలపై తెలుగు ఫిలిం ఇండస్ట్రీ ఎంప్లాయీస్ ఫెడరేషన్ అభ్యంతరం వ్యక్తం చేసింది. ఆయనకు షోకాజ్ నోటీసు ఇవ్వడంతో పాటు సహాయ నిరాకరణకు కూడా ఫెడరేషన్ నిర్ణయం తీసుకుంది. దీంతో వివాదం మరింత పెద్దదైంది. అయితే ఈ పరిణామం ఎక్కువ కాలం కొనసాగలేదు. జూలై 20న ఫెడరేషన్ జానీ మాస్టర్తో వివాదాన్ని పరిష్కరించినట్లు ప్రకటించి, సహాయ నిరాకరణ నిర్ణయాన్ని ఉపసంహరించుకుంది. ఫెడరేషన్ ఎదుట జానీ మాస్టర్ తన వివరణ ఇచ్చిన అనంతరం ఈ నిర్ణయం తీసుకున్నట్లు ఫెడరేషన్ అధ్యక్షుడు అనిల్ వల్లభనేని తెలిపారు.
About the Author
Please tell us what is wrong. Your report will be sent to the website team.
