Mahabubabad | విద్యార్థి గొంతు నొక్కిన సీఐ

Published: 20 Aug 2026 • 04:14 PM

* ఎస్పీ సీరియస్.. విధులకు దూరం

ఆకేరు న్యూస్, మహబూబాబాద్‌:
మహబూబాబాద్‌ కలెక్టరేట్‌ ముట్టడి సందర్భంగా పాలిటెక్నిక్ విద్యార్థులపై దౌర్జన్యానికి పాల్పడ్డారన్న ఆరోపణలు ఎదుర్కొంటున్న మహబూబాబాద్‌ టౌన్‌ సీఐ రఘుపతి రెడ్డిపై జిల్లా పోలీస్ యంత్రాంగం చర్యలు చేపట్టింది. బాధ్యతాయుతమైన పదవిలో ఉండి విద్యార్థుల పట్ల దురుసుగా ప్రవర్తించినందుకు గాను ఆయనను విధులకు దూరం పెడుతున్నట్లు మహబూబాబాద్ ఎస్పీ శబరీష్ వెల్లడించారు.

* అసలేం జరిగింది..

పాలిటెక్నిక్ విద్యార్థులు తమ డిమాండ్ల సాధన కోసం నిన్న మహబూబాబాద్ కలెక్టరేట్ ముందు నిరసన కార్యక్రమం చేపట్టారు. ఈ ఆందోళనను అడ్డుకునే క్రమంలో విద్యార్థులకు, పోలీసులకు మధ్య తీవ్ర తోపులాట జరిగింది. ఈ సమయంలో సీఐ రఘుపతి రెడ్డి ఓ విద్యార్థి గొంతు నులిమి, దౌర్జన్యంగా వెనక్కి నెట్టిన దృశ్యాలు సామాజిక మాధ్యమాల్లో తీవ్రంగా వైరల్ అయ్యాయి. శాంతియుతంగా నిరసన తెలుపుతున్న విద్యార్థుల పట్ల సీఐ వైఖరిపై విపక్షాలు, విద్యార్థి సంఘాలు మరియు ప్రజల నుండి తీవ్ర నిరసన వ్యక్తమైంది.

* డీఎస్పీ స్థాయి అధికారితో విచారణ..

ఈ ఘటనపై స్పందించిన జిల్లా ఎస్పీ శబరీష్, ఆరోపణలు ఎదుర్కొంటున్న సీఐ రఘుపతి రెడ్డిని విచారణ పూర్తయ్యే వరకు విధులకు దూరంగా ఉండాలని ఆదేశించారు. ఈ వ్యవహారం మొత్తంపై నిజానిజాలు తేల్చేందుకు డీఎస్పీ (DSP) స్థాయి అధికారిని విచారణాధికారిగా (Inquiry Officer) నియమించారు.
విచారణాధికారి సమర్పించే సమగ్ర ఎంక్వైరీ రిపోర్ట్ ఆధారంగా సీఐపై తదుపరి శాఖాపరమైన చట్టపరమైన చర్యలు ఉంటాయని ఎస్పీ స్పష్టం చేశారు.