MLA Naini Rajender | వనమహోత్సవంతో కాలనీల్లో పచ్చదనం పెంపు

Published: 22 Aug 2026 • 04:33 PM

* నగర మౌలిక వసతుల అభివృద్ధికి సమగ్ర చర్యలు

* వరంగల్ పశ్చిమ నియోజకవర్గ శాసనసభ్యులు నాయిని రాజేందర్ రెడ్డి

అకేరు న్యూస్ హనుమకొండ:

నగరంలో పచ్చదనం, పరిశుభ్రతను పెంపొందించడంతో పాటు ప్రజలకు మెరుగైన మౌలిక వసతులు కల్పించేందుకు సమగ్ర చర్యలు చేపడుతున్నట్లు వరంగల్ పశ్చిమ నియోజకవర్గ శాసనసభ్యులు నాయిని రాజేందర్ రెడ్డి తెలిపారు.

హనుమకొండ హంటర్‌ రోడ్‌లోని 49వ డివిజన్‌ లెక్చరర్స్‌ కాలనీ, సాయి బృందావన్‌ కాలనీలలో నిర్వహించిన వనమహోత్సవ కార్యక్రమానికి GWMC కమిషనర్ శ్రీ టి. వెంకన్నతో కలిసి ఎమ్మెల్యే ముఖ్య అతిథిగా హాజరయ్యారు. ఈ సందర్భంగా మొక్కలు నాటి, వాటి సంరక్షణ బాధ్యతను ప్రతి ఒక్కరూ తీసుకోవాలని ప్రజలకు పిలుపునిచ్చారు.

గత కొంతకాలంగా నగరంలోని వివిధ ప్రాంతాల్లో రోడ్లు, డ్రైనేజీలు, తాగునీరు తదితర మౌలిక వసతుల అభివృద్ధి పనులు కొనసాగుతున్నాయని ఎమ్మెల్యే తెలిపారు. ప్రతి డివిజన్‌లో స్థానిక అవసరాలకు అనుగుణంగా అభివృద్ధి పనులు చేపడుతున్నామని చెప్పారు.

వరంగల్ నగరానికి ఆధునిక అండర్‌గ్రౌండ్ డ్రైనేజీ వ్యవస్థ ఏర్పాటు చేయనున్నట్లు తెలిపారు. ఇందుకు సంబంధించిన టెండర్ ప్రక్రియ కొనసాగుతోందని, త్వరలో పనులు ప్రారంభమయ్యే అవకాశం ఉందన్నారు.

అండర్‌గ్రౌండ్ డ్రైనేజీ పనులతో పాటు అవసరమైన నీటి పైప్‌లైన్లు, రోడ్లు, సెంట్రల్ లైటింగ్ తదితర మౌలిక వసతులను సమగ్రంగా ఏర్పాటు చేయనున్నట్లు చెప్పారు. ఈ నేపథ్యంలో ప్రస్తుతం చేపట్టే శాశ్వత రోడ్ల పనుల విషయంలో సమన్వయంతో వ్యవహరించాలని, ప్రజాధనం వృథా కాకుండా ప్రణాళికాబద్ధంగా పనులు చేపట్టాలని సూచించారు.

నగరంలో తాగునీటి సమస్యకు శాశ్వత పరిష్కారం చూపే దిశగా రూ.530 కోట్లతో వివిధ అభివృద్ధి పనులు చేపడుతున్నట్లు ఎమ్మెల్యే తెలిపారు. నగర ప్రజలకు నిరంతరాయంగా తాగునీరు అందించేలా నీటి సరఫరా మౌలిక వసతులను బలోపేతం చేస్తున్నామని చెప్పారు.

వడ్డేపల్లి ఫిల్టర్‌ బెడ్‌లోని పాత నీటి నిల్వ వ్యవస్థలను ఆధునీకరించడంతో పాటు అవసరమైన చోట కొత్త నిర్మాణాలు చేపడుతున్నట్లు వివరించారు. తాగునీటి సరఫరాకు అత్యంత ప్రాధాన్యత ఇస్తూ అధికారులు సమన్వయంతో పనిచేయాలని సూచించారు.

కాలనీల్లో ప్రజలు ఎదుర్కొంటున్న సమస్యలను గుర్తించి ప్రాధాన్యత క్రమంలో పరిష్కరించేందుకు అధికారులు, ప్రజాప్రతినిధులు సమన్వయంతో పనిచేయాలని ఎమ్మెల్యే అన్నారు. స్థానిక ప్రజలు తమ సమస్యలను సంబంధిత అధికారుల దృష్టికి తీసుకువస్తే వాటి పరిష్కారానికి చర్యలు తీసుకుంటామని తెలిపారు.

* జిడబ్ల్యూఎంసీ కమిషనర్ టి. వెంకన్న

మాట్లాడుతూ లెక్చరర్స్‌ కాలనీ, సాయి బృందావన్‌ కాలనీలలో పచ్చదనం, పరిశుభ్రతను పెంపొందించే లక్ష్యంతో నిర్వహించిన వనమహోత్సవ కార్యక్రమం అభినందనీయమన్నారు. కాలనీ ప్రజలు పెద్ద సంఖ్యలో పాల్గొని మొక్కలు నాటడం సంతోషకరమన్నారు.

నాటిన మొక్కల సంరక్షణపై ప్రత్యేక శ్రద్ధ వహించాలని, నగర అభివృద్ధిలో ప్రజలు, అధికారులు సమన్వయంతో పనిచేస్తే మరింత మెరుగైన ఫలితాలు సాధించవచ్చని కమిషనర్ తెలిపారు.

ఈ కార్యక్రమంలో కాలనీ పెద్దలు, అధికారులు, ప్రజాప్రతినిధులు, కాలనీ సభ్యులు, స్థానిక ప్రజలు తదితరులు పాల్గొన్నారు.