Parakala Crime
Parakala Crime| ఆకేరు న్యూస్, పరకాల: వరంగల్ జిల్లా పరకాల పరిధిలో వృద్ధ మహిళలపై దాడి చేసి ఒకరిని హత్య చేసిన ఘటనను పోలీసులు ఛేదించారు. ఈ కేసులో రాంనగర్‌కు చెందిన నేరెళ్ల రమేష్‌ (38)ను అరెస్ట్ చేశారు. అతడి వద్ద నుంచి రెండు బంగారు పుస్తెలు, హత్యకు ఉపయోగించిన ఇనుప రాడ్‌, రక్తపు మరకలు ఉన్న దుస్తులను స్వాధీనం చేసుకున్నారు.
పైకప్పు నుంచి ప్రవేశం
పోలీసుల వివరాల ప్రకారం.. సెప్టెంబర్‌ 30 అర్ధరాత్రి ఆకులవాడలో ఒంటరిగా నివసిస్తున్న వృద్ధ మహిళల ఇంట్లోకి రమేష్‌ పైకప్పు మార్గంలో ప్రవేశించినట్లు విచారణలో తేలింది. అతడిని గమనించిన మహిళలు కేకలు వేయడంతో పక్కనే ఉన్న ఇనుప రాడ్‌తో వారిపై దాడి చేసినట్లు పోలీసులు తెలిపారు.
ఈ ఘటనలో కోడెల సుగుణ మృతి చెందగా, కోడెల లసుమక్క తీవ్రంగా గాయపడ్డారు. అనంతరం వారి వద్ద ఉన్న రెండు బంగారు పుస్తెలతో పాటు రూ.1,000 నగదును తీసుకుని నిందితుడు అక్కడి నుంచి పరారైనట్లు పోలీసులు వెల్లడించారు.
అనుమానంతో పట్టుబడి
ఘటనపై కేసు నమోదు చేసిన పరకాల పోలీసులు దర్యాప్తు ముమ్మరం చేశారు. శనివారం వెల్లంపల్లి రోడ్డులోని మున్సిపల్ కార్యాలయం వైపు పోలీసులు పెట్రోలింగ్‌ చేస్తుండగా రమేష్‌ అనుమానాస్పదంగా కనిపించాడు. పోలీసులను చూసి పారిపోయేందుకు ప్రయత్నించడంతో అతడిని అదుపులోకి తీసుకుని విచారించారు.
విచారణలో అతడిని రాంనగర్‌కు చెందిన నేరెళ్ల రమేష్‌, సదయ్య కుమారుడిగా, సెంట్రింగ్‌ కార్మికుడిగా పోలీసులు గుర్తించారు. అనంతరం కేసులో అతడిని అరెస్ట్ చేశారు.
ఆధారాలు స్వాధీనం
నిందితుడి వద్ద సుమారు రెండు గ్రాముల బరువున్న రెండు బంగారు పుస్తెలను పోలీసులు స్వాధీనం చేసుకున్నారు. వాటి విలువ సుమారు రూ.30 వేలు ఉంటుందని తెలిపారు. అలాగే అతడు చూపించిన ప్రదేశం నుంచి హత్యకు ఉపయోగించిన ఇనుప రాడ్‌, రక్తపు మరకలున్న ఆకుపచ్చ షర్టు, నీలిరంగు జీన్స్‌ ప్యాంటును స్వాధీనం చేసుకున్నారు.
సీసీ కెమెరాలపై సూచన
కేసును ఛేదించిన పరకాల సీఐ ఏ. ప్రవీణ్‌కుమార్‌, ఎస్‌ఐలు పవన్‌, రఘుపతిని ఏసీపీ సతీష్‌బాబు అభినందించారు. పోలీసు సిబ్బందికి తగిన రివార్డు అందించనున్నట్లు వరంగల్ పోలీస్‌ కమిషనర్‌ పేర్కొన్నారు. ఇలాంటి ఘటనలను అరికట్టేందుకు ఇళ్ల వద్ద సీసీ కెమెరాలు ఏర్పాటు చేసుకోవాలని ఏసీపీ ప్రజలకు సూచించారు.
About the Author
Please tell us what is wrong. Your report will be sent to the website team.
