సుప్రీంకోర్టు (ఫైల్)
ఆకేరు న్యూస్, డెస్క్: కేంద్ర ప్రభుత్వం 2023లో తీసుకొచ్చిన ఎన్నికల కమిషనర్ల నియామక చట్టం (Election Commissioners Appointment Act) వ్యవహారంలో సుప్రీంకోర్టు (Supreme Court) కీలక పరిణామం చోటుచేసుకుంది. ఈ చట్టం రాజ్యాంగబద్ధతను సవాల్ చేస్తూ దాఖలైన పిటిషన్లను ఐదుగురు సభ్యుల రాజ్యాంగ ధర్మాసనం విచారించనుంది. ఈ కేసులో ఇద్దరు న్యాయమూర్తుల ధర్మాసనం గతంలో వెలువరించిన భిన్నాభిప్రాయాల తీర్పును రీకాల్ చేయాలని కోరుతూ దాఖలైన పిటిషన్ను ప్రత్యేకంగా విచారించేందుకు సుప్రీంకోర్టు నిరాకరించింది.
* ఐదుగురు సభ్యుల ధర్మాసనం ముందే అభ్యంతరాలు..
శుక్రవారం (నవంబర్ 20) సీజేఐ జస్టిస్ సూర్యకాంత్ నేతృత్వంలోని ధర్మాసనం ముందు ఈ పిటిషన్ ప్రస్తావనకు వచ్చింది. న్యాయవాది ప్రశాంత్ భూషణ్ ఈ పిటిషన్ను గతంలో తీర్పు ఇచ్చిన జస్టిస్ దీపాంకర్ దత్తా, జస్టిస్ సతీశ్ చంద్ర శర్మల ధర్మాసనం ముందే విచారించాలని కోరారు. అయితే ఈ అభ్యంతరాలతో పాటు రీకాల్ దరఖాస్తును ఐదుగురు సభ్యుల రాజ్యాంగ ధర్మాసనమే పరిశీలించవచ్చని సీజేఐ స్పష్టం చేశారు.
* ఏమిటీ 2023 నియామక చట్టం?..
కేంద్ర ప్రభుత్వం 2023లో చీఫ్ ఎలక్షన్ కమిషనర్ అండ్ అదర్ ఎలక్షన్ కమిషనర్స్ (అపాయింట్మెంట్, కండిషన్స్ ఆఫ్ సర్వీస్ అండ్ టర్మ్ ఆఫ్ ఆఫీస్) చట్టాన్ని తీసుకొచ్చింది. ఈ చట్టం ప్రకారం ప్రధాన ఎన్నికల కమిషనర్, ఇతర ఎన్నికల కమిషనర్ల ఎంపిక కమిటీలో ప్రధానమంత్రి, లోక్సభలో ప్రతిపక్ష నేత, ప్రధానమంత్రి నామినేట్ చేసిన కేంద్ర కేబినెట్ మంత్రి సభ్యులుగా ఉంటారు.
అంతకుముందు 2023లో సుప్రీంకోర్టు (Supreme Court ) ఇచ్చిన తీర్పు ప్రకారం ఎంపిక కమిటీలో ప్రధానమంత్రి, లోక్సభ ప్రతిపక్ష నేతతో పాటు భారత ప్రధాన న్యాయమూర్తి (Chief Justice of India) కూడా సభ్యుడిగా ఉండేవారు. అయితే కొత్త చట్టం ద్వారా సీజేఐ స్థానంలో కేంద్ర కేబినెట్ మంత్రిని చేర్చారు. ఈ మార్పు రాజ్యాంగబద్ధత (Constitutional Validity)ను సవాల్ చేస్తూ పలు పిటిషన్లు దాఖలయ్యాయి.
* ఇద్దరు న్యాయమూర్తుల మధ్య భిన్నాభిప్రాయాలు..
ఈ కేసులో సెప్టెంబర్ 23న జస్టిస్ దీపాంకర్ దత్తా, జస్టిస్ సతీశ్ చంద్ర శర్మలతో కూడిన ఇద్దరు సభ్యుల ధర్మాసనం భిన్నాభిప్రాయాలు వ్యక్తం చేసింది. ఈ చట్టంపై వచ్చిన సవాళ్లను ఇద్దరు న్యాయమూర్తుల ధర్మాసనమే విచారించవచ్చని జస్టిస్ దత్తా అభిప్రాయపడగా, కీలక రాజ్యాంగపరమైన ప్రశ్నలు ఇమిడి ఉన్నందున ఐదుగురు సభ్యుల రాజ్యాంగ ధర్మాసనం విచారించాలని జస్టిస్ శర్మ పేర్కొన్నారు. ఈ భిన్నాభిప్రాయాల నేపథ్యంలో కేసును రాజ్యాంగ ధర్మాసనానికి అప్పగించే ప్రక్రియకు మార్గం సుగమమైంది.
* ప్రయోజనాల సంఘర్షణపై అభ్యంతరం..
రీకాల్ పిటిషన్లో జస్టిస్ సతీశ్ చంద్ర శర్మకు ప్రయోజనాల సంఘర్షణ (Conflict of Interest) ఉండే అవకాశం ఉందని పిటిషనర్లు అభ్యంతరం వ్యక్తం చేశారు. ఆయన కుమారుడు ఎన్నికల సంఘం తరఫున న్యాయవాదిగా వ్యవహరిస్తున్నారని పిటిషన్లో పేర్కొన్నారు. ఈ అంశాన్ని ఐదుగురు సభ్యుల రాజ్యాంగ ధర్మాసనం ముందు లేవనెత్తవచ్చని సుప్రీంకోర్టు సూచించింది.
* చట్టంపై తుది నిర్ణయం రావాల్సిందే..
తాజాగా సుప్రీంకోర్టు తీసుకున్న నిర్ణయం 2023 ఎన్నికల కమిషనర్ల నియామక చట్టం రాజ్యాంగబద్ధతపై తుది తీర్పు కాదు. రీకాల్ పిటిషన్తో పాటు రిఫరెన్స్ ఉత్తర్వులపై వచ్చిన అభ్యంతరాలను కూడా రాజ్యాంగ ధర్మాసనం పరిశీలించనుంది. ఆ తర్వాతే ఈ చట్టం రాజ్యాంగానికి అనుగుణంగా ఉందా? లేదా? అనే అంశంపై విచారణ కొనసాగనుంది.
Also Read : బంగారం ధరలు ఢమాల్..!

Please tell us what is wrong. Your report will be sent to the website team.

