Pavala Shyamala Shelter Home
* అనాథాశ్రమానికి టాలీవుడ్ నటి
ఆకేరు న్యూస్, హైదరాబాద్: తెలుగు సినీ పరిశ్రమలో వందలాది చిత్రాల్లో క్యారెక్టర్ ఆర్టిస్ట్గా, హాస్యనటిగా మెప్పించిన సీనియర్ నటి పావలా శ్యామల పరిస్థితి అత్యంత దయనీయంగా మారింది. గత కొంతకాలంగా ఆర్థిక ఇబ్బందులు, అనారోగ్యంతో బాధపడుతున్న ఆమె.. తాజాగా నడిరోడ్డుపై దిక్కులేని స్థితిలో కనిపించడం అందరినీ కలిచివేస్తోంది.
* రోడ్డుపై వదిలేసి వెళ్లిన గుర్తుతెలియని వ్యక్తులు..
హైదరాబాద్లోని ఎర్రగడ్డ ప్రభుత్వ ఛాతీ ఆసుపత్రి (సనత్ నగర్ చెస్ట్ హాస్పిటల్) వద్ద పావలా శ్యామల, ఆమె కూతురు మాధవిలను గుర్తుతెలియని వ్యక్తులు వదిలి వెళ్ళిపోయారు. వీరిని గమనించిన ఆసుపత్రి సిబ్బంది వెంటనే స్పందించి ఉన్నతాధికారులకు సమాచారం అందించారు. వైద్యులు ఆమెకు ప్రాథమిక పరీక్షలు నిర్వహించగా, ఛాతీకి సంబంధించిన ఎలాంటి అనారోగ్య సమస్యలు లేవని తేలింది.
* ఉస్మానియాకు తరలింపు.. మళ్లీ వెనక్కి..
దీంతో మెరుగైన వైద్య పరీక్షల నిమిత్తం అధికారులు ఆమెను ఉస్మానియా జనరల్ ఆసుపత్రికి తరలించారు. అయితే, ఉస్మానియా ఆసుపత్రిలో తాము ఉండలేకపోతున్నామంటూ పావలా శ్యామల, ఆమె కూతురు తీవ్ర ఆవేదన వ్యక్తం చేశారు. అక్కడ ఉండలేక, శనివారం మళ్లీ తిరిగి ఎర్రగడ్డ ఛాతీ ఆసుపత్రికే చేరుకున్నారు.
* పోలీసుల చొరవతో అనాథాశ్రమానికి..
బాధితుల పరిస్థితిని చూసి చలించిపోయిన ఛాతీ ఆసుపత్రి అధికారులు వెంటనే స్థానిక పోలీసులకు సమాచారం అందించారు. రంగంలోకి దిగిన పోలీసులు పావలా శ్యామల, ఆమె కుమార్తెకు కౌన్సిలింగ్ నిర్వహించారు. ప్రస్తుతానికి వారిని చూసుకోవడానికి ఎవరూ లేకపోవడంతో, వారి రక్షణ మరియు సంరక్షణ నిమిత్తం నగరంలోని ఒక సురక్షితమైన అనాథాశ్రమానికి తరలించారు.
ఒకప్పుడు వెండితెరపై ప్రేక్షకులను నవ్వించిన నటి, నేడు కనీస ఆసరా లేక ఇలా అనాథాశ్రయం పాలు కావడం పట్ల సినీ విశ్లేషకులు, అభిమానులు తీవ్ర విచారం వ్యక్తం చేస్తున్నారు. మా ప్రభుత్వం మరియు సినీ ఇండస్ట్రీ (మా అసోసియేషన్) స్పందించి ఆమెకు శాశ్వత నీడ, ఆర్థిక సహాయం అందించాలని కోరుతున్నారు.
About the Author
