SBI Clerk Recruitment 2026 | ఒకేసారి 9,124 ఉద్యోగాలు!

ఆకేరు న్యూస్, డెస్క్: దేశంలోనే అతిపెద్ద ప్రభుత్వ రంగ బ్యాంక్ అయిన స్టేట్ బ్యాంక్ ఆఫ్ ఇండియా (SBI) నిరుద్యోగులకు భారీ ఉద్యోగ అవకాశాన్ని కల్పించింది. క్లరికల్ కేడర్‌లోని జూనియర్ అసోసియేట్స్ (Customer Support & Sales) పోస్టుల భర్తీకి నోటిఫికేషన్ విడుదల చేసింది.

దేశవ్యాప్తంగా మొత్తం 9,124 పోస్టులను భర్తీ చేయనున్నారు. ఇందులో 7,680 రెగ్యులర్ ఖాళీలు, 1,444 బ్యాక్‌లాగ్ ఖాళీలు ఉన్నాయి. తెలంగాణలో 260 రెగ్యులర్ పోస్టులు అందుబాటులో ఉన్నాయి.

* ముఖ్యమైన తేదీలు

ఈ పోస్టులకు ఆన్‌లైన్ దరఖాస్తు ప్రక్రియ ఆగస్టు 11, 2026 నుంచి ప్రారంభమైంది. అర్హత ఉన్న అభ్యర్థులు ఆగస్టు 31, 2026 వరకు SBI అధికారిక వెబ్‌సైట్ ద్వారా దరఖాస్తు చేసుకోవచ్చు.

* విద్యార్హత

అభ్యర్థులు గుర్తింపు పొందిన విశ్వవిద్యాలయం నుంచి ఏదైనా విభాగంలో గ్రాడ్యుయేషన్ డిగ్రీ పూర్తి చేసి ఉండాలి. డిగ్రీ చివరి సంవత్సరం లేదా చివరి సెమిస్టర్ చదువుతున్న వారు కూడా దరఖాస్తు చేసుకోవచ్చు. అయితే డిసెంబర్ 31, 2026 నాటికి డిగ్రీ ఉత్తీర్ణతకు సంబంధించిన ధ్రువపత్రాలను సమర్పించాల్సి ఉంటుంది.

అభ్యర్థులు దరఖాస్తు చేసుకునే రాష్ట్రానికి సంబంధించిన స్థానిక భాషపై ప్రావీణ్యం కలిగి ఉండాలి.

* వయోపరిమితి

ఏప్రిల్ 1, 2026 నాటికి అభ్యర్థుల వయస్సు 20 నుంచి 28 సంవత్సరాల మధ్య ఉండాలి. అంటే 02-04-1998 నుంచి 01-04-2006 మధ్య జన్మించిన వారు అర్హులు. ప్రభుత్వ నిబంధనల ప్రకారం రిజర్వ్‌డ్ కేటగిరీలకు వయో సడలింపు ఉంటుంది.

* జీతం ఎంతంటే?

ఎంపికైన అభ్యర్థులకు రూ.24,050 నుంచి రూ.64,480 వరకు వేతన శ్రేణి ఉంటుంది. దీనికి అదనంగా DA, ఇతర అలవెన్సులు వర్తిస్తాయి. మెట్రో నగరాల్లో అలవెన్సులతో కలిపి ప్రారంభ వేతనం నెలకు సుమారు రూ.46,000 వరకు ఉండొచ్చని నోటిఫికేషన్‌లో పేర్కొన్న వివరాల ఆధారంగా సమాచారం.

* ఎంపిక విధానం

అభ్యర్థుల ఎంపిక మూడు దశల్లో జరుగుతుంది. ముందుగా ప్రిలిమినరీ పరీక్ష, ఆ తర్వాత మెయిన్ పరీక్ష, చివరగా Local Language Proficiency Test (LLPT) నిర్వహిస్తారు. ప్రిలిమినరీ పరీక్ష 100 మార్కులకు, మెయిన్ పరీక్ష 200 మార్కులకు ఉంటుంది. తుది ఎంపికలో మెయిన్ పరీక్ష మార్కులకు ప్రాధాన్యం ఉంటుంది.

ప్రిలిమినరీ పరీక్షను సెప్టెంబర్ 2026లో, మెయిన్ పరీక్షను నవంబర్ 2026లో నిర్వహించే అవకాశం ఉంది.

* దరఖాస్తు రుసుము

* తెలుగు రాష్ట్రాల్లో పరీక్షా కేంద్రాలు

తెలంగాణలో హైదరాబాద్, కరీంనగర్, ఖమ్మం, వరంగల్ నగరాల్లో పరీక్షా కేంద్రాలను ఏర్పాటు చేశారు.

ఆంధ్రప్రదేశ్‌లో అనంతపురం, గుంటూరు/విజయవాడ, కడప, కాకినాడ, కర్నూలు, నెల్లూరు, రాజమండ్రి, తిరుపతి, విశాఖపట్నం, విజయనగరం, చీరాలలో పరీక్షా కేంద్రాలు ఉన్నాయి.

* ఎలా దరఖాస్తు చేయాలి?

అర్హత ఉన్న అభ్యర్థులు SBI అధికారిక వెబ్‌సైట్‌లోని రిక్రూట్‌మెంట్ విభాగాన్ని సందర్శించి ఆన్‌లైన్‌లో దరఖాస్తు చేసుకోవాలి. వ్యక్తిగత, విద్యార్హత వివరాలను నమోదు చేసి అవసరమైన పత్రాలను అప్‌లోడ్ చేసి, వర్తించే దరఖాస్తు రుసుమును చెల్లించి ఫారమ్‌ను సమర్పించాలి.

దరఖాస్తు చివరి తేదీ: ఆగస్టు 31, 2026.

అధికారిక వెబ్‌సైట్ : 

https://sbi.bank.in/web/careers

అధికారిక ప్రకటన : 

https://sbi.bank.in/webfiles/uploads/files_2627/08/JA_2026_Detailed_Advt_Eng.pdf

About the Author

aakerutelugunews

Administrator

Visit Website View All Posts