Jobs | పరీక్ష లేదు.. మెరిట్, ఇంటర్వ్యూతో ఎంపిక

Published: 27 Sep 2026 • 01:04 PM Updated: 27 Sep 2026 • 01:14 PM

ఆకేరు న్యూస్, హనుమకొండ: తెలంగాణలోని నిరుద్యోగ మహిళలకు ప్రభుత్వం ఉద్యోగ అవకాశం కల్పించింది. హనుమకొండ జిల్లా మహిళా, శిశు, దివ్యాంగుల, వయోవృద్ధుల సంక్షేమ శాఖ పరిధిలో ఖాళీగా ఉన్న 55 అంగన్‌వాడీ టీచర్ పోస్టుల భర్తీకి నోటిఫికేషన్ విడుదలైంది. స్థానిక మహిళా అభ్యర్థులు ఈ పోస్టులకు దరఖాస్తు చేసుకోవచ్చు.

* ప్రాజెక్టుల వారీగా పోస్టులు..
భీమదేవరపల్లి ప్రాజెక్ట్: 23 పోస్టులు
హనుమకొండ అర్బన్ ప్రాజెక్ట్: 19 పోస్టులు
పరకాల ప్రాజెక్ట్: 13 పోస్టులు
మొత్తం: 55 పోస్టులు

ఈ పోస్టులకు ఇంటర్మీడియట్ (12వ తరగతి) ఉత్తీర్ణులైన స్థానిక మహిళా అభ్యర్థులు దరఖాస్తు చేసుకోవచ్చు. నియామక ప్రక్రియలో రాత పరీక్ష ఉండదు. అకడమిక్ మెరిట్, ఇంటర్వ్యూ ఆధారంగా ఎంపిక చేపడతారు.

* 100 మార్కులకు ఎంపిక

ఎంపిక ప్రక్రియ మొత్తం 100 మార్కులకు ఉంటుంది. ఇంటర్మీడియట్ మార్కులకు 70 మార్కుల వెయిటేజీ ఇవ్వనున్నారు. అనాథలకు 10, విధవలకు 5, దివ్యాంగులకు 5 మార్కుల ప్రాధాన్యత ఉంటుంది. జిల్లా సెలక్షన్ కమిటీ (DSC) నిర్వహించే ఇంటర్వ్యూకు 10 మార్కులు కేటాయించారు.

* వయోపరిమితి

జూలై 1, 2026 నాటికి 18 నుంచి 35 సంవత్సరాల మధ్య వయస్సు ఉన్న అభ్యర్థులు దరఖాస్తు చేసుకోవచ్చు. నిబంధనల ప్రకారం ఎస్సీ, ఎస్టీలకు 5 సంవత్సరాలు, ఓబీసీలకు 3 సంవత్సరాలు, దివ్యాంగులకు 10 సంవత్సరాల వయోసడలింపు వర్తిస్తుంది.

* దరఖాస్తుకు చివరి తేదీ

ఆన్‌లైన్ దరఖాస్తుల ప్రక్రియ సెప్టెంబర్ 22, 2026 నుంచి ప్రారంభమైంది. అర్హులైన అభ్యర్థులు అక్టోబర్ 6, 2026 సాయంత్రం 5 గంటల వరకు దరఖాస్తు చేసుకోవచ్చు. దరఖాస్తులను అధికారిక వెబ్‌సైట్ mis.tgwdcw.in ద్వారా సమర్పించాలి. చివరి తేదీ వరకు వేచి ఉండకుండా ముందుగానే దరఖాస్తు చేసుకోవాలని అధికారులు సూచించారు.