Mahesh Kumar Goud| ఎమ్మెల్సీ రేసులో ఎవరు?

Published: 03 Oct 2026 • 04:21 PM Updated: 03 Oct 2026 • 04:33 PM

* ఆశావహులతో మహేష్ భేటీ

ఆకేరు న్యూస్, హైదరాబాద్: గ్రాడ్యుయేట్ ఎమ్మెల్సీ ఎన్నికల నేపథ్యంలో తెలంగాణ కాంగ్రెస్ పార్టీ కసరత్తును ముమ్మరం చేసింది. టీపీసీసీ అధ్యక్షుడు, ఎమ్మెల్సీ బొమ్మ మహేష్ కుమార్ గౌడ్ గ్రాడ్యుయేట్ ఎమ్మెల్సీ స్థానాలకు పోటీ చేయాలని భావిస్తున్న ఆశావహులతో సమావేశమయ్యారు. గాంధీభవన్‌లో జరిగిన ఈ భేటీలో ఎన్నికల సన్నద్ధత, అభ్యర్థుల ఎంపిక తదితర అంశాలపై చర్చించినట్లు సమాచారం.

తెలంగాణలోని నల్గొండ–ఖమ్మం–వరంగల్, మహబూబ్‌నగర్–రంగారెడ్డి–హైదరాబాద్ గ్రాడ్యుయేట్ ఎమ్మెల్సీ స్థానాలకు వచ్చే ఏడాది ఎన్నికలు జరగనున్న నేపథ్యంలో కాంగ్రెస్ ముందుగానే అభ్యర్థుల ఎంపికపై దృష్టి సారించింది. ఈ రెండు స్థానాల నుంచి పోటీ చేసేందుకు పలువురు కాంగ్రెస్ నేతలు ఆసక్తి చూపుతున్నారు.

ఆశావహుల రాజకీయ నేపథ్యం, పార్టీకి చేసిన సేవలు, గ్రాడ్యుయేట్ ఓటర్లతో ఉన్న సంబంధాలు తదితర అంశాలపై సమావేశంలో చర్చించినట్లు తెలుస్తోంది. అలాగే సామాజిక సమీకరణాలు, పార్టీ బలాబలాలు, ఎన్నికల వ్యూహాన్ని కూడా నాయకత్వం పరిగణనలోకి తీసుకుంటున్నట్లు సమాచారం.

పేర్లపై చర్చ

నల్గొండ–ఖమ్మం–వరంగల్ గ్రాడ్యుయేట్ ఎమ్మెల్సీ స్థానానికి రాంరెడ్డి సర్వోత్తమ్ రెడ్డి, పీవీ శ్రీనివాస్, లోకేశ్ యాదవ్, గుత్తా అమిత్ రెడ్డి, చనగాని దయాకర్ తదితరుల పేర్లు పరిశీలనలో ఉన్నట్లు వార్తలు వచ్చాయి.

మహబూబ్‌నగర్–రంగారెడ్డి–హైదరాబాద్ స్థానానికి శివసేన రెడ్డి, సామ రామ్మోహన్ రెడ్డి, బోదనపల్లి వేణుగోపాల్ రెడ్డి, మన్నె జీవన్ రెడ్డి, గౌరి సతీష్, శివచరణ్ రెడ్డి తదితరుల పేర్లు చర్చలో ఉన్నట్లు సమాచారం.

ఇప్పటికే ఆశావహుల నుంచి వివరాలను సేకరించిన కాంగ్రెస్.. రెండు స్థానాలకు సంబంధించి పేర్లను షార్ట్‌లిస్ట్ చేసే ప్రక్రియను కొనసాగిస్తున్నట్లు తెలుస్తోంది. తుది అభ్యర్థుల ఎంపికను పార్టీ అధిష్ఠానం నిర్ణయించనుంది.

సర్వోత్తమ్ రెడ్డి పేరు?

ఇదిలా ఉండగా, నల్గొండ–ఖమ్మం–వరంగల్ గ్రాడ్యుయేట్ ఎమ్మెల్సీ స్థానానికి కాంగ్రెస్ అభ్యర్థిగా రాంరెడ్డి సర్వోత్తమ్ రెడ్డి పేరు ఖరారైనట్లు సెప్టెంబర్ 30న కొన్ని మీడియా సంస్థలు నివేదించాయి. అయితే దీనిపై కాంగ్రెస్ పార్టీ నుంచి అధికారిక ప్రకటన వెలువడాల్సి ఉంది.

అభ్యర్థుల ఎంపికతో పాటు గ్రాడ్యుయేట్ ఓటర్ల నమోదు, ఎన్నికల కార్యాచరణపైనా కాంగ్రెస్ దృష్టి సారించినట్లు సమాచారం. అభ్యర్థులను ముందుగానే ఖరారు చేసి, గ్రాడ్యుయేట్ ఓటర్లను కలిసేందుకు వారికి తగిన సమయం కల్పించాలనే ఆలోచనలో పార్టీ ఉన్నట్లు తెలుస్తోంది.