Telangana Government Prisoners Remission
* శిక్షా కాలం ముగిసింది.. ఉపాధి లభించింది..
ఆకేరు న్యూస్, హైదరాబాద్: తెలంగాణ రాష్ట్ర ఆవిర్భావ దినోత్సవాన్ని పురస్కరించుకుని రాష్ట్ర ప్రభుత్వం కీలక నిర్ణయం తీసుకుంది. జైళ్లలో సత్ప్రవర్తన కనబరిచిన 91 మంది జీవిత ఖైదీలను అధికారికంగా విడుదల చేసింది. జూన్ 1వ తేదీ అర్ధరాత్రి ప్రభుత్వం జారీ చేసిన జీవో నెంబర్ 54 మార్గదర్శకాల ప్రకారం రాష్ట్రవ్యాప్తంగా వివిధ జైళ్లలో శిక్ష అనుభవిస్తున్న ఖైదీలకు ఈ క్షమాభిక్ష లభించింది. విడుదలైన వారిలో 85 మంది పురుషులు, ఆరుగురు మహిళా ఖైదీలు ఉన్నారు. చర్లపల్లి కేంద్ర కారాగార ఆవరణలో మంగళవారం నిర్వహించిన ప్రత్యేక కార్యక్రమంలో జైళ్లశాఖ డైరెక్టర్ జనరల్ (DG) సౌమ్య మిశ్రా ముఖ్య అతిథిగా పాల్గొని, ఖైదీలను విడుదల చేశారు.
* శిక్షా కాలం ముగిసింది.. ఉపాధి లభించింది..
కేవలం జైలు నుంచి విడుదల చేయడమే కాకుండా, వారి పునరావాసం కోసం జైళ్లశాఖ అద్భుతమైన ఏర్పాట్లు చేసింది. విడుదలైన వారిలో 38 మంది ఖైదీలకు జైళ్లశాఖ ఆధ్వర్యంలో నడుస్తున్న ఇంధన (పెట్రోల్) బంకుల్లో ఉద్యోగ నియామక పత్రాలను డీజీ సౌమ్య మిశ్రా అందజేశారు. అదేవిధంగా, నలుగురు మహిళా ఖైదీలకు భవిష్యత్తులో స్వయం ఉపాధి పొందేందుకు వీలుగా కుట్టు మిషన్లను పంపిణీ చేశారు.
* తప్పులు దిద్దుకుని మంచి పౌరులుగా జీవించాలి- డీజీ సౌమ్య మిశ్రా…
ఈ సందర్భంగా జైళ్లశాఖ డీజీ సౌమ్య మిశ్రా మాట్లాడుతూ, జైలు నుంచి విడుదలైన వారు గతంలో చేసిన తప్పులను విస్మరించి, సమాజంలో బాధ్యతాయుతమైన పౌరులుగా కొత్త జీవితాన్ని ప్రారంభించాలని ఆకాంక్షించారు. ప్రభుత్వం కల్పించిన ఈ గొప్ప అవకాశాన్ని సద్వినియోగం చేసుకోవాలని సూచించారు.
అలాగే, సుప్రీంకోర్టు మార్గదర్శకాలకు అనుగుణంగా ఏడాదిలో మూడు సార్లు (ప్రతి 4 నెలలకు ఒకసారి) ఖైదీల సత్ప్రవర్తనను గుర్తించి, వారికి క్షమాభిక్ష ప్రసాదించేలా ప్రభుత్వానికి ప్రతిపాదనలు పంపుతామని ఈ సందర్భంగా ఆమె హామీ ఇచ్చారు.
* నిబంధనలు ఉల్లంఘిస్తే కఠిన చర్యలు!
జైళ్లశాఖ ఐజీలు వై. రాజేష్ (అడ్మిన్), ఎన్. మురళీబాబు (వెల్ఫేర్) మాట్లాడుతూ.. ఈ క్షమాభిక్ష జీవో నిబంధనలకు లోబడి వర్తిస్తుందని స్పష్టం చేశారు. విడుదలైన ఖైదీలు మళ్లీ ఏదైనా నేరాలకు పాల్పడితే, వారి క్షమాభిక్ష రద్దవుతుందని, మిగిలిన శిక్షా కాలాన్ని కూడా పూర్తిగా జైల్లోనే అనుభవించాల్సి ఉంటుందని హెచ్చరించారు.
* ఆనంద డోలికల్లో ఖైదీల కుటుంబాలు…
దాదాపు 15 నుండి 16 ఏళ్ల పాటు జైలు శిక్ష పూర్తి చేసుకుని, క్షమాభిక్షపై విడుదలైన ఖైదీలు ప్రభుత్వానికి, జైళ్ల శాఖకు కృతజ్ఞతలు తెలిపారు. గత దశాబ్ద కాలంగా జైళ్లలో వసతులు, భోజన సౌకర్యాలు మెరుగయ్యాయని, న్యాయ సహాయం కూడా లభించిందని వారు పేర్కొన్నారు. జైలు అధికారులు, సిబ్బంది తమను ఎల్లప్పుడూ ఆదరించారని, స్వయం ఉపాధి కోర్సులతో పాటు ఉన్నత విద్యను కూడా అందించారని భావోద్వేగానికి లోనయ్యారు.
ఈ కార్యక్రమంలో జైళ్లశాఖ డీఐజీలు డి. శ్రీనివాస్, ఎం. సంపత్, చంచల్గూడ, వరంగల్, సంగారెడ్డి, చర్లపల్లి జైళ్ల సూపరింటెండెంట్లు ఎన్. శివకుమార్ గౌడ్, కళాసాగర్, సంతోష్ కుమార్ రాయ్, జి. ప్రమోద్, ప్రత్యేక మహిళా జైలు సూపరింటెండెంట్ టి. వెంకటలక్ష్మి శ్రీనాథ్, చర్లపల్లి ఓపెన్ జైలు సూపరింటెండెంట్ డి. భరత్ తదితరులు పాల్గొన్నారు.
About the Author
