మహారాష్ట్ర సీఎంతో సీఎం రేవంత్ కీలక భేటీ
* మహారాష్ట్ర సీఎంతో సీఎం రేవంత్ కీలక భేటీ
* 152 మీటర్ల ఎత్తుపై మహారాష్ట్ర సానుకూలం
* అధికారుల కమిటీ ఏర్పాటు
ఆకేరు న్యూస్, హైదరాబాద్: తెలంగాణలోని ఉమ్మడి ఆదిలాబాద్ జిల్లా సాగు, తాగునీటి అవసరాలకు కీలకమైన తుమ్మిడిహెట్టి బ్యారేజీ ప్రాజెక్టుపై మరో ముందడుగు పడింది. బ్యారేజీ ఎత్తును ప్రస్తుత ప్రతిపాదనలోని 148 మీటర్ల నుంచి 152 మీటర్లకు పెంచాలన్న తెలంగాణ ప్రభుత్వ విజ్ఞప్తిపై మహారాష్ట్ర ప్రభుత్వం సానుకూలంగా స్పందించింది. ఈ అంశంపై పూర్తి స్థాయి అధ్యయనం చేసి, తదుపరి నిర్ణయం తీసుకునేందుకు ఇరు రాష్ట్రాల అధికారులు కలిసి పనిచేయనున్నారు.
మహారాష్ట్ర రాజధాని ముంబైలోని సహ్యాద్రి ప్రభుత్వ అతిథి గృహంలో తెలంగాణ ముఖ్యమంత్రి ఎ. రేవంత్ రెడ్డి, మహారాష్ట్ర ముఖ్యమంత్రి దేవేంద్ర ఫడ్నవీస్ మధ్య కీలక సమావేశం జరిగింది. ఈ భేటీలో తెలంగాణ నీటిపారుదల శాఖ మంత్రి ఎన్. ఉత్తమ్ కుమార్ రెడ్డితో పాటు ఇరు రాష్ట్రాల ప్రభుత్వ ప్రధాన కార్యదర్శులు, నీటిపారుదల శాఖ ఉన్నతాధికారులు పాల్గొన్నారు. ప్రాణహిత నదిపై ప్రతిపాదించిన తుమ్మిడిహెట్టి బ్యారేజీ ఎత్తు పెంపు, నీటి లభ్యత, ముంపు ప్రభావం, పరిహారం, సాంకేతిక అంశాలపై చర్చించారు.
152 మీటర్ల ఎత్తుపై చర్చ
సమావేశంలో మంత్రి ఉత్తమ్ కుమార్ రెడ్డి తుమ్మిడిహెట్టి ప్రాజెక్టు ప్రాధాన్యతను పవర్ పాయింట్ ప్రజెంటేషన్ ద్వారా వివరించారు. 1975 అక్టోబర్ 6న అప్పటి ముఖ్యమంత్రులు జలగం వెంగళరావు, ఎస్.బి. చవాన్ మధ్య కుదిరిన ఒప్పందం నుంచి ప్రాజెక్టుకు సంబంధించిన చర్చల పరిణామాలను ప్రస్తావించారు.
2016లో బ్యారేజీ ఎత్తును 148 మీటర్లుగా నిర్ణయిస్తూ ఒప్పందం కుదిరినప్పటికీ, ఆ ఎత్తుతో తెలంగాణ సాగు, తాగునీటి అవసరాలను పూర్తిస్థాయిలో తీర్చడం కష్టమని తెలంగాణ ప్రభుత్వం భావిస్తోంది. విద్యుత్ వినియోగం, నిర్వహణ వ్యయాన్ని తగ్గిస్తూ గురుత్వాకర్షణ శక్తితో నీటిని తరలించేందుకు బ్యారేజీ ఎత్తును 152 మీటర్లకు పెంచాలని ప్రతిపాదించింది.
ఎత్తు పెంపు కారణంగా మహారాష్ట్ర పరిధిలో ముంపునకు గురయ్యే భూములకు నిబంధనల ప్రకారం పరిహారం చెల్లిస్తామని తెలంగాణ ప్రభుత్వం హామీ ఇచ్చినట్లు సమావేశంలో వివరించారు.
ఆదిలాబాద్ అభివృద్ధే లక్ష్యం
సమావేశంలో సీఎం రేవంత్ రెడ్డి మాట్లాడుతూ తెలంగాణ, మహారాష్ట్ర మధ్య ఉన్న చారిత్రక, సాంస్కృతిక అనుబంధాన్ని గుర్తుచేశారు. ముఖ్యంగా ఆదిలాబాద్ ప్రాంతంలోని గిరిజనులు, ఆదివాసీలకు సాగు, తాగునీటి సౌకర్యాలు కల్పించాల్సిన అవసరాన్ని వివరించారు.
కొమురం భీమ్ పోరాట స్ఫూర్తిని ప్రస్తావిస్తూ గిరిజన ప్రాంతాల్లో అభివృద్ధి అవకాశాలను విస్తరించాల్సిన బాధ్యత ఇరు రాష్ట్రాలపై ఉందని పేర్కొన్నారు. ఆదిలాబాద్‌లో ప్రతిపాదిత రక్షణ, పౌర విమానాశ్రయాల అభివృద్ధి కూడా సరిహద్దు ప్రాంతాల్లో రవాణా, ఆర్థిక కార్యకలాపాలకు దోహదపడుతుందని వివరించారు.
తుమ్మిడిహెట్టి ప్రాజెక్టు పూర్తయితే నీటిపారుదలతో పాటు ప్రాంతీయ అభివృద్ధికి కూడా ఉపయోగపడుతుందని తెలంగాణ ప్రభుత్వం అభిప్రాయపడింది.
అధికారుల కమిటీ ఏర్పాటు
తెలంగాణ ప్రతిపాదనలపై మహారాష్ట్ర సీఎం దేవేంద్ర ఫడ్నవీస్ సానుకూలంగా స్పందించారు. 148 మీటర్ల ఎత్తుకు సంబంధించిన ఒప్పందాన్ని పునఃపరిశీలించి, 152 మీటర్ల ప్రతిపాదనపై అధ్యయనం చేసేందుకు మహారాష్ట్ర ప్రభుత్వం సిద్ధంగా ఉందని తెలిపారు.
ఇరు రాష్ట్రాల నీటిపారుదల శాఖ ముఖ్య కార్యదర్శుల నేతృత్వంలో అధికారుల కమిటీని ఏర్పాటు చేసి, ప్రాజెక్టుకు సంబంధించిన కీలక అంశాలను పరిశీలించాలని సూచించారు. ఈ కమిటీ ప్రధానంగా నీటి లభ్యత, ముంపునకు గురయ్యే భూముల విస్తీర్ణం, పరిహారం, సాంకేతిక ప్రత్యామ్నాయాలను అధ్యయనం చేయనుంది. అవసరమైన సాంకేతిక పరిశీలనలను కేంద్ర జల సంఘం (CWC) ద్వారా వేగవంతం చేసే అంశంపైనా చర్చించారు.
తుది నిర్ణయంపై ఉత్కంఠ
తుమ్మిడిహెట్టి బ్యారేజీ ఎత్తును 152 మీటర్లకు పెంచే ప్రతిపాదనపై మహారాష్ట్ర సానుకూలంగా స్పందించడం ప్రాజెక్టు భవిష్యత్తుపై ఆసక్తిని పెంచింది. అయితే ఎత్తు పెంపునకు తుది ఆమోదం లభించిందని చెప్పలేం. అధికారుల కమిటీ అధ్యయనం, సాంకేతిక పరిశీలనలు, ముంపు పరిహారం వంటి అంశాలపై స్పష్టత వచ్చిన తర్వాతే తదుపరి నిర్ణయం తీసుకునే అవకాశం ఉంది.
ఇరు రాష్ట్రాల ప్రభుత్వాలు సమన్వయంతో ముందుకు సాగితే తుమ్మిడిహెట్టి ప్రాజెక్టుపై దీర్ఘకాలంగా కొనసాగుతున్న చర్చలకు పరిష్కారం లభించే అవకాశముంది. ముఖ్యంగా ఉమ్మడి ఆదిలాబాద్ జిల్లా ప్రజల సాగు, తాగునీటి అవసరాలపై ఈ ప్రాజెక్టు పురోగతి ప్రభావం చూపనుంది.
About the Author
Please tell us what is wrong. Your report will be sent to the website team.
