Tyson Naidu| ‘టైసన్ నాయుడు’లో మాస్ ఫోక్ సాంగ్

Published: 04 Nov 2026 • 07:58 PM

* నవంబర్ 6న ‘మదరాసి రబ్బరు బొమ్మ’ విడుదల

* ఫస్ట్ సింగిల్‌తో మ్యూజిక్ ప్రమోషన్స్ ప్రారంభం

ఆకేరు న్యూస్, సినిమా: బెల్లంకొండ సాయి శ్రీనివాస్ హీరోగా నటిస్తున్న తాజా చిత్రం ‘టైసన్ నాయుడు’ నుంచి మ్యూజిక్ ప్రమోషన్స్‌కు శ్రీకారం చుట్టారు. ఈ సినిమాలోని తొలి పాట ‘మదరాసి రబ్బరు బొమ్మ’ను నవంబర్ 6న విడుదల చేయనున్నట్లు చిత్రబృందం ప్రకటించింది. ఈ పాట మాస్ ఫోక్ సాంగ్‌గా ప్రేక్షకులను అలరించనుంది.

సాగర్ కె చంద్ర దర్శకత్వం వహిస్తున్న ఈ యాక్షన్ ఎంటర్‌టైనర్‌ను 14 రీల్స్ ప్లస్ బ్యానర్‌పై రామ్ ఆచంట, గోపీ ఆచంట నిర్మిస్తున్నారు. ఇప్పటికే విడుదలైన పోస్టర్లు, టైటిల్ గ్లింప్స్ సినిమాపై ఆసక్తిని పెంచాయి.

తాజాగా విడుదల చేసిన పాట అనౌన్స్‌మెంట్ పోస్టర్‌లో హీరో బెల్లంకొండ సాయి శ్రీనివాస్, హీరోయిన్ సంప్రదాయ జానపద దుస్తుల్లో కనిపిస్తున్నారు. రంగురంగుల నేపథ్యంతో రూపొందించిన ఈ పోస్టర్ పాటపై అంచనాలను పెంచుతోంది.

ఈ చిత్రంలో బెల్లంకొండ సాయి శ్రీనివాస్‌ను గతంలో ఎన్నడూ చూడని యాక్షన్ అవతార్‌లో దర్శకుడు సాగర్ కె చంద్ర చూపించనున్నారు. దీంతో ఈ సినిమాపై ప్రేక్షకుల్లో ఆసక్తి నెలకొంది.

ఈ చిత్రానికి భీమ్స్ సిసిరోలియో సంగీతం అందిస్తున్నారు. ముఖేష్ జ్ఞానేష్, అనిత్ సినిమాటోగ్రఫీ బాధ్యతలు నిర్వహిస్తున్నారు. కోటగిరి వెంకటేశ్వరరావు ఎడిటర్‌గా, అవినాష్ కొల్లా ఆర్ట్ డైరెక్టర్‌గా వ్యవహరిస్తున్నారు. స్టన్ శివ, విజయ్, వెంకట్, రియల్ సతీష్ యాక్షన్ కొరియోగ్రఫీ అందిస్తున్నారు.

మొత్తానికి తొలి పాటతో మ్యూజిక్ ప్రమోషన్స్ ప్రారంభిస్తున్న ‘టైసన్ నాయుడు’ టీమ్.. ‘మదరాసి రబ్బరు బొమ్మ’తో ఎలాంటి మ్యూజికల్ సందడి చేస్తుందో చూడాలి.